ກອງປະຊຸມຄະນະກຳມະການຄຸ້ມຄອງໄພພິບັດອາຊຽນ ຄັ້ງທີ 31 ໄດ້ຫາລືຫລາຍບັນຫາ
ກອງປະຊຸມຄະນະກຳມະການຄຸ້ມຄອງໄພພິບັດອາຊຽນ ຄັ້ງທີ 31 ໄດ້ໄຂຂຶ້ນໃນວັນທີ 17 ຕຸລານີ້ ທີ່ແຂວງຫວງພະບາງ ໂດຍການເປັນປະທານຂອງທ່ານ ປະສົງ ວົງຄໍາຈັນ ຫົວໜ້າກົມສັງຄົມສົງເຄາະ ກະຊວງແຮງງານ ແລະ ສະຫວັດດີການສັງຄົມ, ປະທານຄະນະກຳມະການຄຸ້ມຄອງໄພພິບັດອາຊຽນ, ມີເຈົ້າໜ້າທີ່ອາວຸໂສອາຊຽນ, ກອງເລຂາອາຊຽນ, ສູນປະສານງານຊ່ວຍເຫລືອດ້ານມະນຸດສະທຳອາຊຽນ (AHA Centre) ແລະ ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງຜົນຂອງກອງປະຊຸມສຸດຍອດອາຊຽນຄັ້ງທີ 30 ທີ່ພົວພັນເຖິງວຽກງານໄພພິບັດ, ພ້ອມທັງໄດ້ປຶກສາຫາລືກ່ຽວກັບຜົນຂອງການຈັດຕັ້ງປະຕິບັດໂຄງການຂອງບັນດາໜ່ວຍງານຕ່າງໆເຊັ່ນ: ກິດຈະກຳການຫລຸດຜ່່ອນຄວາມສ່ຽງໄພພິບັດ, ກິດຈະກຳການຄົ້ນຄວ້າປະເມີນຂໍ້ມູນດ້ານນິຕິກຳ ແລະ ການຈັດຕັ້ງປະຕິບັດຂອງບັນດາປະເທດສະມາຊິກອາຊຽນ. ນອກນີ້ ຍັງໄດ້ເຫັນດີໃຫ້ມີການທົບທວນຄືນສັນຍາວ່າດ້ວຍການຄຸ້ມຄອງໄພພິບັດ, ຄົ້ນຄວ້າບັນດາກິດຈະກຳຖະແຫລງການອາຊຽນ “ໜຶ່ງອາຊຽນໜຶ່ງການຕອບໂຕ້ຢູ່ພາຍໃນອາຊຽນ” ແລະ ຄວາມເປັນໄປໄດ້ໃນການຈັດຕັ້ງບັນດາກິດຈະກໍາການຊ່ວຍເຫລືອດ້ານການເງິນ ເພື່ອສ້າງຄວາມເຂັ້ມແຂງການຕອບໂຕ້ໄພພິບັດ, ການເປີດກວ້າງການຮ່ວມມືກັບສາກົນເຊັ່ນ: ກອງປະຊຸມໂລກວ່າດ້ວຍການຫລຸດຜ່ອນຄວາມສ່ຽງໄພພິບັດໂລກ ແລະ ອື່ນໆ.
