ສະພາບອາກາດຮ້ອນ ກະທົບລາຍໄດ້ຄົນຂັບລົດຕັກຊີຢູ່ມຽນມາ

      ອຸນຫະພູມທີ່ກໍາລັງເພີ່ມສູງໃນຫລາຍພື້ນທີ່ຂອງມຽນມາ ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ ລວມທັງຜູ້ເຮັດອາຊີບຂັບລົດຕັກຊີ.

      ວັນທີ 6 ພຶດສະພາ, ສໍານັກຂ່າວຊິນຮົວລາຍງານວ່າ: ກົມອຸຕຸນິຍົມວິທະຍາ ແລະ ອຸທົກກະສາດຂອງມຽນມາ ລະບຸວ່າ: ຫລາຍພື້ນທີ່ໃນປະເທດເຊັ່ນ: ເມືອງຢາງກຸ້ງ ກໍາລັງຜະເຊີນອຸນຫະພູມສູງເຖິງ 40 ອົງສາ.

     ທ່າມກາງອຸນຫະພູມທີ່ຮ້ອນອົບເອົ້າທົ່ວປະເທດ, ກະຊວງສາທາລະນະສຸກຂອງມຽນມາຈຶ່ງອອກປະກາດເຕືອນ ໃຫ້ປະຊາຊົນໃຊ້ມາດຕະການປ້ອງກັນທີ່ຈໍາເປັນເພື່ອຄວາມປອດໄພຂອງຕົນເອງ ພ້ອມໃຫ້ແນວທາງປະຕິບັດໃນການໃຊ້ຊີວິດ ທ່າມກາງສະພາບອາກາດຮ້ອນ ແລະ ວິທີຫລຸດໂອກາດການສໍາຜັດລັງສີອຸນຕາໄວໂອເລດຈາກແສງແດດ ເຊິ່ງເປັນອັນຕະລາຍຕໍ່ສຸຂະພາບ.

     ທ່ານ ອູ ເຕັນ ຕັນ ຄົນຂັບລົດຕັກຊີຢູ່ເມືອງມັນທະເລ ກ່າວວ່າ: ອຸນຫະພູມທີ່ຮ້ອນເຮັດໃຫ້ລາຍໄດ້ຂອງຕົນຫລຸດເຄິ່ງໜຶ່ງ ເນື່ອງຈາກຜູ້ທີ່ຈໍາເປັນຕ້ອງອອກໄປທາງນອກເທົ່ານັ້ນ ຈະອອກຈາກເຮືອນທ່າມກາງສະພາບອາກາດຮ້ອນແບບນີ້.

     ທັງນີ້, ມັນທະເລ ເຊິ່ງເປັນເມືອງໃຫຍ່ອັນດັບສອງຂອງມຽນມາ ແລະ ມີຈໍານວນຄົນຂີ່ລົດຈັກຫລາຍກວ່າເມື່ອທຽບໃສ່ຈໍານວນຄົນຂັບລົດໃຫຍ່ ຜະເຊີນວັນຮ້ອນທີ່ສຸດຂອງເດືອນເມສາໃນວັນທີ 28 ເມສາຜ່ານມາ ໂດຍອຸນຫະພູມສູງເຖິງ 44,8 ອົງສາ. ນອກຈາກນີ້ ທາງການເມືອງມັນທະເລລາຍງານຈໍານວນຜູ້ເສຍຊີວິດຈາກພະຍາດລົມແດດຫລາຍກວ່າ 50 ຄົນ ໃນເດືອນຜ່ານມາ.