ຮັກແຜ່ນດິນທີ່ສວຍງາມ ແລະ ຮັ່ງມີ

- 109812 pic 33 - ຮັກແຜ່ນດິນທີ່ສວຍງາມ ແລະ ຮັ່ງມີ
- Untitled design - ຮັກແຜ່ນດິນທີ່ສວຍງາມ ແລະ ຮັ່ງມີ

ໂດຍ: ທິດ​ກໍ່າ

ກ່າວ​ເຖິງ​ປະ​ເທດ​ລາວ​ສວຍ​ງາມ​ ​ແລະ ຮັ່ງມີ​ນັ້ນ ຈົນ​ວ່າ​ມີ​ເອກະສານ​ສະບັບ​ໜຶ່ງ​ທີ່​ທິດ​ກໍ່າ​ໄດ້​ຄົ້ນຄວ້າ​ຮໍ່າຮຽນ ນັບ​ແຕ່​ມື້​ເລີ່​ມຕົ້ນ​ເຂົ້າ​ເຮັດ​ການ​ປະຕິວັດ​ຈົນ​ມາ​ຮອດ​ປັດຈຸບັນ​ກໍ​ໄດ້ 40 ກວ່າ​ປີ​ແລ້ວ ມັນ​ກໍ​ຍັງ​ເປັນ​ພາບ​ແຫ່ງ​ຄວາມ​ຊົງ​ຈຳ​ໃນ​ຊີວິດ​ທີ່​ໄດ້​ເກີດ​ມາ​ເປັນ​ຊາດ​ລາວ ​ແລະ ຄົນ​ລາວ. ຈຸດປະສົງ​ໃນ​ການຄົ້ນຄວ້າ​ຮໍ່​າຮຽນ​ເອກະສານ​ສະບັບ​ນີ້​ກໍ​ເພື່ອ​ໃຫ້​ເຮົາ​ຮູ້​ເລື່ອງ​ລາວ​ປະຫວັດສາດ​ຄວາມ​ເປັນ​ມາ​ຂອງ​ປະ​ເທດ​ເຮົາ ນັບ​ແຕ່​ມື້ກຳ​ເນີ​ດ​ເກີດ​ຂຶ້ນ​ແຕ່​ລະ​ຍຸກ​ແຕ່​ລະສະ​ໄໝ​ຈົນ​ມາ​ຮອດ​ຍຸກ​ປັດຈຸບັນ. ​ເນື້ອ​ໃນ​ຂອງ​ເອກະສານ​ນີ້​ຍັງ​ໄດ້​ເລົ່າ​ເຖິງ​ຄວາມ​ກວ້າງ​ໃຫຍ່​ໄພສານ, ຄວາມ​ສວຍ​ສົດ​ງົດ​ງາມ ​ແລະ ຄວາມ​ອຸດົມ​ສົມບູນ​ທີ່​ບົ່ມ​ຊ້ອນ​ຂອງ​ປະ​ເທດ. ນອກຈາກ​ນັ້ນ ຍັງ​ໄດ້​ພັນ​ລະນາ​ເຖິງ​ຊາຕາກຳ​ໃນ​ບາງຊ່ວງ, ບາງ​ໄລຍະ ​ແລະ ບາງ​ຍຸກ​ສະ​ໄໝ​ທີ່​ເຄີຍ​ເລື່ອງ​ລື​ດ້ວຍ​ອຳນາດ, ​ໂດດ​ເດັ່ນ​ໄປ​ດ້ວຍ​ຄວາມ​ຈະ​ເລີ​ນຮຸ່ງ​ເຮືອງ​ສີວິ​ໄລ ​ໂດຍ​ສະ​ເພາະ​ແມ່ນ​ໃນ​ຍຸກ​ຂອງ​ພະ​ເຈົ້າຟ້າ​ງຸ່ມ​ມະຫາລາດ, ​ເຈົ້າສຸລິຍະ​ວົງສາ ທຳ​ມະກະລາ​ດ ​ແລະ ​ເຈົ້າ​ໄຊ​ເສດ​ຖາ​ທິລາດ. ນອກຈາກ​ຄວາມ​ເລື່ອງ​ລື​ທີ່​ກ່າວ​ມາ​ຂ້າງ​ເທິງ​ນີ້​ແລ້ວ ປະ​ເທດ​ລາວ​ລ້ານ​ຊ້າງ​ຂອງ​ພວກ​ເຮົາ​ໃນ​ສະ​ໄໝ​ກ່ອນ​ຍັງ​ໄດ້​ຕົກ​ຢູ່​ໃນ​ໄລຍະ​ຊາຕາ​ອາພັບ, ​ເຄີຍ​ຖືກ​ຮຸກ​ຮານ​ຈາກ​ສັດຕູ​ຕ່າງ​ຊາດ​ຈົນ​ກາຍ​ເປັນ​ເມືອງ​ຂຶ້ນ ​ແລະ ປະ​ເທດ​ຊາດ​ຕ້ອງ​ໄດ້​ເສຍ​​ເອກະລາດ, ອະທິປະ​ໄຕ, ດິນ​ດອນ​ຕອນ​ຫຍ້າ, ​ເສຍ​ຊັບ​ໃນ​ດິນ, ສິນ​​ໃນ​ນ້ຳ ​ແລະ ​ເສຍ​ພົນລະ​ເມືອງ​ໄປຫລາຍ​ສິບ​ລ້ານ​ຄົນ.

ນີ້​ຄື​ສິ່ງ​ທີ່​ພິສູດ​ຂອງ​ປະຫວັດສາດ​ລາວ ກໍ​ຄື​ຂະ​ບວນວິວັດ​ແຫ່ງ​ການ​ເຕີບ​ໃຫຍ່​ຂະຫຍາຍຕົວ ​ແລະ ຄົງ​ຕົວ​ຂອງ​ປະ​ເທດ​ລາວ​ລ້ານ​ຊ້າງ​ອັນ​ແສນ​ຮັກ ​ແລະ ຫວງ​ແຫນ​ຂອງ​ພວກ​ເຮົາ, ​ແຕ່​ພໍ​ຕົກ​ມາ​ໃນ​ໄລຍະ​ສ້າງສາ ​ແລະ ພັດທະນາ​ປະ​ເທດ​ຊາດ​ໃນ​ຜືນ​ແຜ່ນດິນ​ທີ່​ຄົງ​ເຫລືອ​ຢູ່, ພັກ ​ແລະ ລັດຖະບານ​ເຮົາ​ກໍ​ໄດ້​ສຸມ​ໃສ່​ເຮັດ​ທຸກ​ສິ່ງ​ທຸກ​ຢ່າງ ​ເພື່ອ​ຄວາມ​ສົມບູນ​ພູນ​ສຸກ​ຂອງ​ປະຊາຊົນ ​ແລະ ​ເພື່ອ​ຄວາມ​ຈະ​ເລີ​ນຮຸ່ງ​ເຮືອງ​ຮັ່ງມີ​ຂອງ​ປະ​ເທດ​ຊາດ. ປັດຈຸບັນ​ປະ​ເທດ​ລາວ​ພວມ​ໄດ້​ຮັບ​ການ​ສ້າງສາ​ພັດທະນາ ​ແລະ ກ້າວ​ໄປ​ຢ່າງ​ບໍ່​ຢຸດ​ຢັ້ງ. ສິ່ງ​ທີ່​ໄດ້​ຢັ້ງຢືນ​ນັບ​ແຕ່​ປະ​ເທດ​ໄດ້​ກ້າວ​ເຂົ້າສູ່​ໄລຍະ​ໃໝ່​ມາ​ນີ້ ​ເບິ່ງ​ອັນ​ໃດ​ກໍ​ມີ​ການ​ບູລະນະ​ປັບປຸງ ​ແລະ ປ່ຽນ​ແປງ​ໄປ​ຢ່າງຮອບດ້ານ ​ເປັນຕົ້ນ​ໃນ​ດ້ານ​ການ​ເມືອງ​ກໍ​ເຫັນ​ວ່າ​ນັບ​ມື້ມີ​ຄວາມ​ສະຫງົບ​ໝັ້ນຄົງ, ຊີວິດ​ການ​ເປັນ​ຢູ່​ຂອງ​ປະຊາຊົນ​ບັນດາ​ເຜົ່າ​ກໍ​ນັບ​ມື້​ໄດ້​ຮັບ​ການ​ເຊີດ​ຊູ​ດີ​ຂຶ້ນ​ເທື່ອ​ລະ​ກ້າວ, ກຽດ​ສັກ​ສີ, ຊື່​ສຽງ​ຂອງ​ປະ​ເທດ​ຊາດ​ນັບ​ມື້ກວ້າງ​ໄກ ​ແລະ ​ໄດ້​ຮັບ​ການ​ເຊື່ອ​ໝັ້ນຈາກ​ພາກພື້ນ ​ແລະ ສາກົນ​ເປັນ​ຢ່າງ​ດີ. ສິ່ງ​ທີ່​ສະ​ແດງ​ໃຫ້​ເຫັນ​ຢ່າງ​ປະຈັກ​ຕານັ້ນ​ໃນ​ປັດຈຸບັນ​ລາວ​ເຮົາ​ໄດ້​ມີ​ການ​ພົວພັນ​ການ​ທູດ​ກັບ​ບັນດາ​ປະ​ເທດ​ຕ່າງໆ​ໃນ​ທົ່ວ​ໂລກ 100 ກວ່າ​ປະ​ເທດ, ດ້ານ​ເສດຖະກິດ​ກໍ​ນັບ​ມື້ມີ​ການ​ຂະຫຍາຍຕົວ ​ແລະ ​ເຕີບ​ໃຫຍ່​ຢ່າງ​ຕໍ່​ເນື່ອງໜັກ​ແໜ້ນ, ອັດຕາ​ສະ​ເລ່ຍລວມຍອດ​ຜະລິດ​ຕະພັນ​ສັງຄົມ​ແຫ່ງ​ຊາດ​ກໍ​ຢູ່​ໃນ​ລະດັບ 6-7% ຕໍ່​ປີ, ດ້ານ​ວັດທະນະທຳ-ສັງຄົມ​ກໍ​ນັບ​ມື້​ໄດ້​ຮັບ​ການ​ເຊີດ​ຊູ ​ແລະ ​ເສີມ​ຂະຫຍາຍ​ຂຶ້ນມາ​ໃໝ່​ບົນ​ພື້ນຖານ​ຮາກ​ເຫງົ້າ ​ແລະ ຕົ້ນກຳ​ເນີ​ດ​ແຫ່ງ​ວັດທະນະທຳ​ທີ່​ມີ​ເອກະລັກ​ສະ​ເພາະ​ຂອງ​ເຊື້ອຊາດ ​ແລະ ຮີ​ດຄອງ​ປະ​ເພນີ​ອັນ​ຍອດ​ຍິ່ງ​ຂອງ​ປະຊາຊົນ​ບັນດາ​ເຜົ່າ. ທຸກ​ສິ່ງ​ທຸກ​ຢ່າງ​ທີ່​ທິດ​ກໍ່າ​ໄດ້​ຍົກ​ເອົາ​ມາ​ເວົ້າສູ່​ກັນ​ຟັງ​ນີ້ ມັນ​ເປັນ​ບາດກ້າວ​ແຫ່ງ​ການ​ປ່ຽນ​ແປງ​ໃໝ່​ຂອງ​ຊາດ​ລາວ, ຄົນ​ລາວ​ເຊິ່ງບໍ່​ທັນ​ເຄີຍ​ມີ​ໃນ​ຍຸກ​ປະຫວັດສາດ​ສອງ​ສາມ​ຮ້ອຍ​ປີຜ່ານມາ.

ອີກ​ສິ່ງ​ໜຶ່ງ​ທີ່​ພວກ​ເຮົາ​ບໍ່​ຄວນ​ລືມ​ນັ້ນ, ປະ​ເທດ​ລາວ​ຂອງ​ພວກ​ເຮົາ​ຍັງ​ມີ​ຊັບພະຍາກອນ​ທຳ​ມະ​ຊາດ​ທີ່​ບົ່ມ​ຊ້ອນ​ໄວ້​ຢ່າງ​ຫລວງຫລາຍ, ຊັບພະຍາກອນ​ເຫລົ່າ​ນີ້​ໄດ້​ກາຍ​ເປັນ​ທຶນຮອນ ​ແລະ ​ເປັນ​ທ່າ​ແຮງ​ໃຫ້​ເສດຖະກິດ-ສັງຄົມ​ແຫ່ງ​ຊາດ​ໄດ້​ຢ່າງ​ມະຫາສານ​ເຊັ່ນ: ດິນ​ດອນ​ຕອນ​ຫຍ້າ, ​ແມ່ນ້ຳລຳ​ເຊ, ພູຜາ​ປ່າ​ໄມ້, ຮ່ອມ​ຫ້ວຍ​ພູ​ເຂົາ ​ແລະ ທຳ​ມະ​ຊາດ​ອັນ​ສວຍ​ສົດ​ງົດ​ງາມ. ນອນ​ຢູ່​ໃນ​ສິ່ງ​ທີ່​ບົ່ມ​ຊ້ອນ​ເຫລົ່າ​ນີ້​ຍັງ​ມີ​​ແຮ່​ທາດ​ຫລາຍ​ຊະນິດ, ມີ​ແກ້ງ​ຕາດ​ຫາດ​ຊາຍ, ມີ​ເຫວ​​ເລິກ​ສູງ​ຊັນ, ປ່າຕຶບ​ດົງ​ໜາ, ມີ​ຖ້ຳມີ​ຮູ​ພູ​ເຂົາ​ທີ່​ສວຍ​ງາມ​ລຶກລັບ​ໜ້າ​ງຶດງໍ້​ອັດສະຈັນ.

- Wave100S AD to Website 2020 0 - ຮັກແຜ່ນດິນທີ່ສວຍງາມ ແລະ ຮັ່ງມີ

​ເພາະສະນັ້ນ, ຕາມ​ທິດ​ກໍ່າ​ວ່າ ມາ​ເຖິງ​ໂອກາດ​ນີ້ ພວກ​ເຮົາ​​ເກີດ​ມາ​ເປັນ​ຄົນ​ລາວ​ຊາດ​ລາວ​ກໍ​ຕ້ອງ​ໄດ້​ພາກັນ​ຖະໜຸຖະໜອມ ​ແລະ ປົກ​ປັກ​ຮັກສາ​ແຫ​ລ່ງທຳ​ມະ​ຊາດ​ອັນ​ສວຍ​ງາມ ​ແລະ ຮັ່ງມີ​ເຫລົ່າ​ນີ້​ໃຫ້​ຢູ່​ຄຽງ​ຄູ່​ກັບ​ຄົນ​ລາວ​ຕະຫລອດ​ໄປ. ສິ່ງ​ທີ່​ສະ​ແດງ​ອອກ​ໃນ​ຄຳ​ວ່າ ຄົນ​ຮັກ​ຊາດ ຮັກ​ແຜ່ນດິນ​ນັ້ນ ກໍ​ຍ່ອມ​ສະ​ແດງ​ອອກ​ໃນ​ຫລາຍ​ດ້ານ ​ເປັນຕົ້ນ​ໃນ​ໂອກາດ​ປີ​ທ່ອງ​ທ່ຽວ​ລາວ 2018 ທີ່​ຈະ​ມາ​ເຖິງ​ນີ້ ພວ​ກ​ເຮົາ​ກໍ​ຍາດ​ເອົາ​ໂອກາດ ​ແລະ ກ້າ​ສະ​ແດງ​ອອກ​ໃຫ້​ແຂກ​ຕ່າງ​ດ້າວ​ທ້າວ​ຕ່າງ​ແດນ​ເຫັນ​ຄວາມ​ຮັກ​ຊາດ, ຮັກ​ບ້ານ​ເກີດ​ເມືອງ​ນອນ​ຂອງ​ເຮົາ ຄື​ອັນ​ທີ​ໜຶ່ງ​ເປັນ​ເຈົ້າການ​ຮັກສາ​ຄວາມ​ສະຫງົບ ​ແລະ ຄວາມ​ເປັນ​ລະບຽບ​ຮຽບຮ້ອຍ​ໃນ​ສັງຄົມ, ອັນ​ທີ​ສອງ​ຕ້ອງ​ຮັກສາ​ຄວາມ​ສະອາດ​ສະອາງ ​ແລະ ຄວາມ​ຈົບ​ຄວາມ​ງາມ​ຂອງ​ບ້ານ​ເມືອງ. ອັນ​ສາມ​ພ້ອມ​ພາກັນ​ມີ​ອັດທະຍາ​ໄສ​ໄມຕີ​ຕໍ່​ແຂກ​ບ້ານ​ແຂກ​ເມືອງ ຕະຫລອດ​ການ​ນຸ່ງ​ການ​ຖື​ກໍ​ຕ້ອງ​ສະ​ແດງ​ອອກ​ໃນ​ດ້ານ​ວັດທະນະທຳ ​ແລະ ຮີດຄອງ​ປະ​ເພນີ​ອັນ​ດີງາມ​ຂອງ​ຊາດ. ອັນ​ທີ​ສີ່​ການ​ກິນ​ການ​ຢູ່​ກໍ​ຕ້ອງ​​ໃຫ້​ພໍ​ເໝາະ​ພໍດີ, ການ​ບໍລິການ​ດ້ານ​ຕ່າງໆ ​ແລະ ການຈຳໜ່າຍ​ສິນຄ້າ​ກໍ​ບໍ່​ສວຍ​ໂອກາດ​ຂຶ້ນລາຄາ ​ເຮັດ​ໃຫ້​ແຂກ​ບ້ານ​ແຂກ​ເມືອງ​ເຂົາ​ພາກັນ​ຕິດ​ໃຈ​ຍ້ອງຍໍ​ຊົມ​ເຊີຍ​ມາ​ທ່ຽວ​ເມື​ອງລາວ​ມາ​ແລ້ວ​ກໍ​ຢາກ​ມາ​ອີກ.

- WhatsApp Image 2020 05 27 at 5 - ຮັກແຜ່ນດິນທີ່ສວຍງາມ ແລະ ຮັ່ງມີ
- WhatsApp Image 2020 05 27 at 5 - ຮັກແຜ່ນດິນທີ່ສວຍງາມ ແລະ ຮັ່ງມີ
error: Alert: ເນື້ອຫາຂ່າວມີລິຂະສິດ !!