ອິດສະລາແອນສັ່ງຊາວປາແລັສຕິນອົບພະຍົບອອກຈາກເມືອງຣາຟາເພີ່ມອີກ ເຖິງວ່າອາເມລິກາຄັດຄ້ານ

     ອິດສະລາແອນຕ້ອງການໃຫ້ປະຊາຊົນຢູ່ເມືອງຣາຟາຂອງເຂດກາຊາອົບພະຍົບອອກຈາກພື້ນທີ່ອີກ ທັງທີ່ອາເມລິກາຕໍ່ຕ້ານເລື່ອງນີ້ຢ່າງໜັກ.

     ວັນທີ 11 ພຶດສະພາ, ສໍານັກຂ່າວຕ່າງປະເທດລາຍງານວ່າ: ກອງທັບອິດສະລາແອນປະກາດໃຫ້ປະຊາຊົນຢູ່ເມືອງຣາຟາ ທາງຕອນໃຕ້ຂອງເຂດກາຊາ ອົບພະຍົບອີກໃນຫລາຍເຂດ ໂດຍກໍານົດໃຫ້ຜູ້ທີ່ອົບພະຍົບທັງໝົດໄປລວມກັນຢູ່ “ເຂດມະນຸດສະທໍາ” ຢູ່ເມືອງອັລ ມາວາຊີ.

     ເຖິງຢ່າງໃດກໍຕາມ, ກ່ອນໜ້ານີ້ ກອງທັບອິດສະລາແອນປະກາດໃຫ້ປະຊາຊົນຢູ່ເຂດຕາເວັນອອກເມືອງຣາຟາຕ້ອງອົບພະຍົບອອກຈາກພື້ນທີ່ ເຊິ່ງສະຫະປະຊາຊາດ (UN) ລາຍງານວ່າ: ມີປະຊາຊົນອົບພະຍົບອອກມາແລ້ວຫລາຍກວ່າ 80.000 ຄົນ ແລະ ພື້ນທີ່ທີ່ອິດສະລາແອນກໍານົດໃຫ້ເປັນເຂດປອດໄພ ມີອານາເຂດຄວບຄຸມພຽງ 30 ຕາກິໂລແມັດ ມີຄ້າຍອາໄສ 9 ແຫ່ງ, ຄລີນິກ 3 ແຫ່ງ ແລະ ສາງສິນຄ້າອີກ 6 ແຫ່ງ.

     ທັງນີ້, ນາຍົກລັດຖະມົນຕີ ເບນຈາມິນ ເນທັນຢາຮູ ຜູ້ນໍາອິດສະລາແອນ ກ່າວວ່າ: ອິດສະລາແອນພ້ອມເດີນໜ້າປະຕິບັດການພາກພື້ນດິນຢູ່ເມືອງຣາຟາ “ດ້ວຍຕົນເອງ” ພາຍຫລັງປະທານາທິບໍດີ ໂຈ ໄບເດັນ ຜູ້ນໍາອາເມລິກາ ກ່າວວ່າ: ຈະຢຸດການສະໜັບສະໜູນດ້ານອາວຸດທັງໝົດ ຖ້າອິດສະລາແອນປະຕິບັດການທາງທະຫານພາກພື້ນດິນຢູ່ເມືອງຣາຟາ.

     ຂະນະທີ່ກະຊວງການຕ່າງປະເທດອາເມລິກາເຜີຍແຜ່ລາຍງານ “ມີເຫດຜົນໃຫ້ປະເມີນໄດ້ວ່າ” ອິດສະລາແອນ ເຊິ່ງໄດ້ຮັບການຊ່ວຍເຫລືອດ້ານອາວຸດຈາກລັດຖະບານວໍຊິງຕັນ ໃຊ້ອາວຸດດັ່ງກ່າວ “ໃນທາງບໍ່ສອດຄ່ອງກັບມາດຕະຖານສິດທິມະນຸດສາກົນ” ລະຫວ່າງການເຮັດສົງຄາມກັບກຸ່ມຮາມັດຢູ່ເຂດກາຊາ ເຊິ່ງຍືດເຍື້ອມາແຕ່ວັນທີ 7 ຕຸລາ 2023.

     ລາຍງານລະບຸວ່າ: “ຍັງບໍ່ສາມາດສະຫລຸບໄດ້ຢ່າງຊັດເຈນ” ກ່ຽວກັບເລື່ອງນີ້ ແລະ ການປະເມີນ “ຍັງບໍ່ສໍາເລັດສົມບູນ”. ນອກຈາກນີ້ ເນື້ອໃນລາຍງານຍັງບໍ່ໄດ້ລະບຸຢ່າງເຈາະຈົງວ່າອິດສະລາແອນລະເມີດກົດໝາຍສາກົນໃນສົງຄາມເຂດກາຊາ ຫລື ບໍ່.