ປກສ ເມືອງພີນ ຈັບຜູ້ຄ້າຂາຍຢາເສບຕິດ ພ້ອມຂອງກາງ ຢາບ້າ 12 ມັດ ມາດຳເນີນຄະດີ

ເຈົ້າໜ້າທີ່ໜ່ວຍງານຕຳຫລວດສະກັດກັ້ນ ແລະ ຕ້ານຢາເສບຕິດ ປກສ ເມືອງພີນ ແຂວງສະຫວັນນະເຂດ ລາຍງານວ່າ: ວັນທີ 6 ພຶດສະພາ 2024ນີ້ ໄດ້ຮັບລາຍງານຈາກພົນລະເມືອງດີວ່າ ມີເປົ້າໝາຍຄ້າ-ຂາຍ ຢາເສບຕິດ (ຢາບ້າ) ຂັບຂີ່ລົດຈັກຍີ່ຫໍ້ຮອນດາ ຄລິກໄອ ສີແດງ, ບໍ່ມີປ້າຍທະບຽນ ມາຈາກບ້ານ ສະໜູນໄຊ ເມືອງພະລານໄຊ ແຂວງສະຫວັນນະເຂດ ມາຕາມເສັ້ນທາງເລກ 9 ມຸ່ງໜ້າມາເມືອງພີນ, ສະນັ້ນເຈົ້າໜ້າທີ່ຈຶ່ງໄດ້ຕິດຕາມ ແລະ ກັກຕົວເປົ້າໝາຍໄດ້ 1 ຄົນ ຊື່ທ້າວ ເກີດ ອາຍຸ 25 ປີ ຢູ່ບ້ານ ສະກີພີນ ເມືອງເຊໂປນ ແຂວງສະຫວັນນະເຂດ ຢູ່ເຂດບ້ານອຸດົມໄຊ (ເຊທ່າມວກ) ເມືອງພີນ.

ຜ່ານການກວດຄົ້ນຕົນຕົວ ແລະ ກວດຄົ້ນພາຫະນະຂອງຜູ້ກ່ຽວພົບເຫັນໂທລະສັບ 1 ໜ່ວຍ, ຢາບ້າ 12 ມັດ ຢູ່ໃນກ້ອງເບາະລົດຈັກ ເຊິ່ງເປັນລົດຜູ້ກ່ຽວຂັບຂີ່ມາ, ເຈົ້າໜ້າທີ່ຈຶ່ງໄດ້ນຳຕົວຜູ້ກ່ຽວພ້ອມຂອງກາງມາສືບສວນ-ສອບສວນຂະຫຍາຍຜົນຫາຜູ້ຮ່ວມຂະບວນການມາດຳເນີນຄະດີຕາມກົດໝາຍ.