ບັນຫາສິນບົນ ແລະ ນະໂຍບາຍບຳນານ

- advert banner 728 90 728x90 - ບັນຫາສິນບົນ ແລະ ນະໂຍບາຍບຳນານ

ໂດຍ: ວິ​ເສດ ສະ​ແຫວ​ງສຶກສາ

- new3 - ບັນຫາສິນບົນ ແລະ ນະໂຍບາຍບຳນານ

ມື້ນີ້​ມີ​ເລື່ອງ​ແຕກ​ຕ່າງ ​ແຕ່​ບໍ່​ເຖິງ​ຂັ້ນຍ່າງ​ສວນ​ທາງ​ກັນ​ມາ​ເວົ້າສູ່​ຟັງ ທັງ​ໝົດ​ເປັນ​ເລື່ອງ​ກ່ຽວ​ກັບ​ມາດ​ຕະການ​ຄຸ້ມ​ຄອງ​ລັດ​ຄຸ້ມຄອງ​ສັງຄົມ ​ແລະ ​ເສດຖະກິດ​ໃນ​ຕ່າງ​ແດນ ​ເຊັ່ນ​ຄະດີ​ຮັບ​ສິນ​ບົນ ​ແລະ ​ເລື່ອງ​ກ່ຽວ​ກັບ​ນະ​ໂຍບາຍ​ຫລຸດ​ອາຍຸ​ກະສຽນ​ບຳນານ ​ເຊິ່ງມີ​ລາຍ​ລະອຽດ​ດັ່ງ​ຕໍ່​ໄປ​ນີ້: ບັນຫາ​ຮັບ​ສິນ​ບົນ ຄະດີ​ນີ້​ເກີດຂຶ້ນກັບ​ສະມາຊິກ​ສະພາ​ສູງ ຫລື ວຸດ​ທິສະພາ​ສະຫະລັດ​ອາ​ເມ​ລິ​ກາ ຈາກ​ພັກ​ປະຊາທິປະ​ໄຕ (Democrat) ຊື່​ທ່ານ ​ໂຣ​ເບີດ ​ເມ​ເນັນ​ເດັດ (Robert Menendez) ອາຍຸ 63 ປີ. ຄະດີ​ຮັບ​ສິນ​ບົນ​ຂອງ​ທ່ານ​ຜູ້​ແທນ​ສະພາ​ສູງ​ຄົນ​ນີ້ ຕິດ​ພັນ​ກັບ​ການ​ມີ​ຜົນ​ປະ​ໂຫຍ​ດຮ່ວມ​ກັນ​ກັບ​ນັກທຸລະກິດ​ຮັ່ງມີ​ສີ​ສຸກ​ຄົນ​ໜຶ່ງ​ຢູ່​ລັດ​ຟະ​ລໍຣີດາ ຊື່​ທ່ານ ຊາ​ໂລມ​ອນ ​ເມນ​ເກັນ. ຂ່າວ​ໜັງສືພິມ The Nation ສະບັບ​ວັນ​ທີ 8 ​ເດືອນ​ກັນຍາ​ປີ​ນີ້ ​ໃຫ້​ລາຍ​ລະອຽດ​ວ່າ: ສິນ​ບົນ​ທີ່​ທ່ານ​ຜູ້​ແທນ ​ໂຣ​ເບີດ ​ໄດ້​ຮັບ​ນັ້ນມີ​ຫລາຍ​ຮູບ​ຫລາຍ​ສີ ​ເຊັ່ນ​ຄວາມ​ສະດວກ​ສະບາຍ​ໃນ​ການທ່ອງທ່ຽວ ​ແລະ ພັກຜ່ອນ. ຕົວຢ່າງ​ເຂົາ​ຮັບ​ການ​ບໍລິການ​ເດີນທາງ​ບໍ່​ເສຍ​ຄ່າ​ດ້ວຍ​ເຄື່ອງ​ບິນ​ອາຍ​ພົ່ນ​ພິ​ເສດສ່ວນ​ຕົວ ​ແລະ ​ໄປ​ພັກຜ່ອນ​ຢູ່​ຕາມຣີສອດ​ຫລູຫລາ​ລາຄາ​ແພງ ​ເຊິ່ງ​ແມ່ນ​ນັກທຸລະກິດ​ເປັນ​ຜູ້​ຈົກ​ເງິນ​ຈ່າຍ. ນອກຈາກ​ນັ້ນ ​ເຂົາ​ຍັງ​ຖືກ​ກ່າວ​ຫາ​ວ່າ​ໄດ້​ຮັບ​ເງິນ​ຈາກ​ນັກທຸລະກິດ​ຈຳນວນ 750.000 ​ໂດ​ລາ ​ໃນ​ການ​ລົງ​ຫາ​ສຽງ​ຮັບ​ສະ​ໝັກ​ເລືອກ​ຕັ້ງ​ເປັນ​ຜູ້​ແທນ​ສະພາ​ສູງ. ​ແນ່ນອນ​ເມື່ອ “ຊີ້ນ​ມາ-ປາກໍ​ຕ້ອງ​ໄປ”, ທ່ານ​ຜູ້​ແທນ ​ໂຣ​ເບີດ ​ໄດ້​ໃຊ້​ອຳນາດ​ໜ້າ​ທີ່​ຕຳ​ແໜ່​ງຂອງ​ຕົນ​ໃນ​ນາມ​ສະມາຊິກ​ສະພາ​ສູງ​ປົ​ກປ້ອງ​ຜົນ​ປະ​ໂຫຍ​ດຂອງ​ນັກທຸລະກິດ ​ເຊັ່ນ​ໄດ້​ຊ່ວຍ​ໃຫ້​ບໍລິສັດ​ຂອງ​ນັກທຸລະກິດ​ຄົນ​ນີ້​ບັນລຸ​ການ​ເຊັນ​ສັນຍາ​ທຸລະ​ກິດ​ມູນ​ຄ່າ​ສູງ​ກັບ​ກົມ​ພາສີ​ຂອງ​ປະ​ເທດ​ໂດ​ມີ​ກັນ, ຊ່ວຍ​ເພື່ອນ​ຍິງ​ສັນຊາດ​ບຣາຊິນ, ​ໂດ​ມີ​ນິກັນ ​ແລະ ອູ​ແກຼນຂອງ​ນັກທຸລະກິດ​ໃຫ້​ໄດ້​ວີ​ຊາ​ສະຫະລັດ. ບໍ່​ພຽງ​ທໍ່​ນັ້ນ, ທ່ານ​ຜູ້​ແທນ​ສະພາ​ສູງ​ຍັງ​ໄດ້​ຊ່ວຍ​ກະ​ໂຕ​ນັກທຸລະກິດ​ໃຫ້​ຊະນະ​ຄະດີ​ຂັດ​ແຍ່ງ​ຕ່າງໆ​ກັບ​ທາງ​ການ​ສະຫະລັດ​ອີກ​ດ້ວຍ. ສະຫລຸບ​ແລ້ວ ທ່ານ​ຜູ້​ແທນ ​ໂຣ​ເບີດ ຕິດ​ຄະດີ​ທັງ​ໝົດ 14 ​ເລື່ອງ: ມີ​ຄະດີ​ສົມຮູ້​ຮ່ວມ​ຄິດ ​ແລະ 8 ຄະດີ​ທີ່​ພົວພັນ​ກັບ​ການ​ຮັບ​ສິນ​ບົນ ​ເຊິ່ງມີ​ຂຶ້ນລະຫວ່າງ​ປີ 2006 ຫາ 2013. ຂ່າວ​ບອກ​ວ່າ: ທ່ານ​ຜູ້​ແທນ ​ໂຣ​ເບີດ ​ໄດ້​ປະຕິ​ເສດ​ທຸກ​ຂໍ້​ກ່າວ​ຫາ​ຈົນ​ນ້ຳລາຍ​ແຫ້ງ. ຄະດີ​ນີ້​ຈະ​ລົງ​ເອີ່ຍ​ກັນ​ແບບ​​ໃດ​ນັ້ນກໍ​ຄົງ​ເປັນ​ໄປ​ຕາມ​ກົດໝາຍ​ແນ່ນອນ. ຕໍ່​ໄປ​ແມ່ນ​ເລື່ອງ ນະ​ໂຍບາຍ​ຫລຸດ​ກະສຽນອາຍຸ​ບຳນານ. ຂ່າວ​ນີ້​ອ່າວ​ແປກ ​ເພາະ​ໃນ​ປັດຈຸບັນ​ທ່າ​ອ່ຽງຂອງ​ຫລາຍ​ປະ​ເທດ​ແມ່ນ​ປັບ​ຂຶ້ນອາຍຸ​ກະສຽນ​ບຳນານ​ຈາກ​ມາດຕະຖານ 60 ​ເປັນ 63, 65, 67 ປີ ບວກ​ກັບ​ນະ​ໂຍບາຍ​ນຳ​ໃຊ້​ຄວາມ​ຮູ້​ຄວາມ​ສາມາດ​ຊ້ຳ​ເຖົ້າຂອງ​ພະນັກງານ​ບຳນານ, ​ເຊັ່ນ​ຢູ່​ປະ​ເທດ​ໄທ ຫວ່າງ​ບໍ່​ເຫິງ​ມາ​ນີ້​ກໍ​ໄດ້​ມີ​ການ​ລະດົມ​ນຳ​ໃຊ້​ຄູ​ອາຍຸ​ສູງ​ທີ່​ກຽມ​ບຳນານ ຫລື ບຳນານ​ແລ້ວ​ຄືນ​ໃໝ່​ໃນ​ຂອບ​ເວລາ​ຈຳກັດ ​ເພື່ອ​ແກ້​ໄຂ​ບັນຫາ​ຂາດ​ແຄນ​ຄູ​-ອາຈານ, ຢູ່​ຍີ່ປຸ່ນ​ບ່ອນ​ທີ່​ຈຳນວນ​ຄົນ​ເຖົ້າມີ​ທ່າ​ອ່ຽງລົ້ນປະ​ເທດ​ກໍ​ໄດ້​ມີ​ການ​ປັບ​ຂຶ້ນອາຍຸ​ເຂົ້າບຳນານ. ນອກ​ນັ້ນ ກໍ​ຍັງ​ໄດ້​ນຳ​ໃຊ້​ພະນັກງານ​ທີ່​ເລີຍ​ອາຍຸ 65 ປີ ​ໂດຍ​ສະ​ເພາະ​ໃນ​ຂະ​ແໜງ​ການບິນ ​ເພາະ​ມີ​ສະພາບ​ຂາດ​ແຄນ​ນັກ​ບິນ, ​ແຕ່​ນັກ​ບິນ​ເຖົ້າ​ເຫລົ່າ​ນີ້​ມີ​ເວລາ​ບິນ​ຈຳກັດ ​ແລະ ຕ້ອງ​ມີ​ນັກ​ບິນ​ຊ່ວຍ​ຢູ່​ຮຽງ​ຂ້າງ. ສ່ວນ​ຢູ່​ປະ​ເທດ​ໂປ​ໂລ​ຍນັ້ນພັດ​ຕ່າງ. ​ໃນ​ປີ 2012 ລັດຖະບານ​ຊຸດ​ເກົ່າ​ໄດ້​ປັບ​ຂຶ້ນອາຍຸ​ກະສຽນ​ບຳນານ​ເປັນ 67 ປີ ​ແຕ່​ລັດຖະບານ​ຊຸດ​ປັດຈຸບັນ​ພັດ​ປັບ​ລົງ​ເປັນ 60 ປີ​ສຳລັບ​ແມ່ຍິງ ​ແລະ 65 ປີ​ສຳລັບ​ຜູ້​ຊາຍ. ຂ່າວ​ບອກ​ວ່າ ນະ​ໂຍບາຍ​ນີ້​ໄດ້​ຮັບ​ສຽງ​ສະໜັບສະໜູນ​ຢ່າງ​ລົ້ນ​ເຫລືອ​ຈາກ​ປະຊາຊົນ. ສ່ວນ​ພວກ​ບໍ່​ເຫັນ​ພ້ອມ​ບອກ​ວ່າ ການ​ປັບ​ຫລຸດ​ອາຍຸ​ບຳນານ​ຈະ​ສ້າງ​ຄວາມ​ກົດ​ດັນ​ຕໍ່​ງົບປະມານ​ຂອງ​ລັດ ​ແລະ ຕໍ່​ຄ່າ​ແຮງ​ງານ​ທີ່​ພວມ​ເຕີບ​ໃຫຍ່​ຢ່າງ​ໄວວາ​ທີ່​ສຸດ​ໃນ​ຮອບ​ຫ້າ​ປີຜ່ານມາ ວ່າ​ຊັ້ນ !.

- lattana 1 - ບັນຫາສິນບົນ ແລະ ນະໂຍບາຍບຳນານ
error: Content is protected !!