ປະກາດຫາເຈົ້າຂອງຝູງງົວຈຳນວນຫລາຍ ໃຫ້ມາເອົາສັດລ້ຽງຂອງທ່ານໄປເຂົ້າຄອກດ່ວນ

ວັນທີ 15 ພຶດສະພາ 2024, ພົບເຫັນຝູງງົວຈຳນວນຫລາຍ ທີ່ເຈົ້າຂອງປ່ອຍປະລະເລີຍ ປ່ອຍໃຫ້ສັດລ້ຽງອອກມາຢູ່ທາງຫລວງທີ່ມີລົດສັດຈອນໄປ-ມາຈຳນວນຫລາຍ ຢູ່ເຂດບ້ານສີວິໄລ ເມືອງໄຊທານີ ນະຄອນຫລວງວຽງຈັນ, ສ່ຽງກໍ່ໃຫ້ເກີດອຸປະຕິເຫດ ແລະ ສ້າງຄວາມເປິເປື້ອນໃຫ້ຕົວເມືອງ.

ດຳລັດວ່າດ້ວຍການປັບໃໝຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບການຈະລາຈອນທາງບົກ ມາດຕາ II ການລ້ຽງສັດ ຫລື ການປ່ອຍສັດລ້ຽງ ໄດ້ລະບຸວ່າ: ກໍລະນີມີການລ້ຽງສັດ ຫລື ປ່ອຍສັດລ້ຽງຢູ່ຕາມທາງຫລວງ ຊຶ່ງຈະພາໃຫ້ມີຄວາມສ່ຽງຕໍ່ການເກີດອຸປະຕິເຫດ ເຈົ້າຂອງສັດຈະຖືກປັບໃໝ 30.000 ກີບ ຕໍ່ໂຕ ເປັນຕົ້ນ ແບ້, ມ້າ, ງົວ, ຄວາຍ.

ກໍລະນີ ເກີດອຸປະຕິເຫດຍ້ອນສັດລ້ຽງ ຊຶ່ງໄດ້ສ້າງຄວາມເສຍຫາຍຕໍ່ ໂຄງສ້າງ, ໂຄງປະກອບ, ສິ່ງປະກອບ ແລະ ສິ່ງປ້ອງກັນຄວາມປອດໄພ ຂອງທາງຫລວງ ເຈົ້າຂອງ ຫລື ຜູ້ດູແລສັດ ຕ້ອງຮັບຜິດຊອບໃຊ້ແທນຄ່າເສຍຫາຍທີ່ເກີດຂຶ້ນທັງໝົດ.

ສໍາລັບກໍລະນີ ເກີດອຸບັດເຫດຢູ່ທາງດ່ວນ ຍ້ອນສັດລ້ຽງ ໂດຍເຈົ້າຂອງທາງດ່ວນ ໄດ້ສ້າງຮົ້ວ ຫລື ສິ່ງປ້ອງກັນສັດ ຢ່າງຖືກຕ້ອງຕາມມາດຕະຖານເຕັກນິກໃຫ້ເຈົ້າຂອງສັດລ້ຽງ ເປັນຜູ້ຮັບຜິດຊອບຄ່າເສຍຫາຍທັງໝົດ, ຖ້າຫາກເຈົ້າຂອງທາງດ່ວນສ້າງຮົ້ວ ຫລືສິ່ງປ້ອງກັນສັດ ບໍ່ໄດ້ຕາມມາດຕະຖານເຕັກນິກໃຫ້ເຈົ້າຂອງທາງດ່ວນ ເປັນຜູ້ຮັບຜິດຊອບຄ່າເສຍຫາຍທັງໝົດ.