ວັນທີ 22 ພຶດສະພາ 2024 ແຂວງຫົວພັນ ສະເຫລີມສະຫລອງວັດອົງຕື້ ຄົບຮອບ 11 ປີ, ພະເຈົ້າອົງຕື້ ຄົບຮອບ 459 ປີ.  ນຳໂດຍ ສາທຸໃຫຍ່ ອ່ອນແກ້ວ ສິດທິວົງ ຄະນະປະຈຳສູນກາງ, ຜູ້ຊ່ວຍປະທານສູນກາງ ອພສ; ຍາທ່ານໃຫຍ່ ວັນຄຳ ວົງສາສຸລິນ ຄະນະປະຈຳສູນກາງ, ຫົວໜ້າກຳມາທິການປົກຄອງ ສູນກາງ ອພສ,  ພ້ອມດ້ວຍພຣະສົງສູນກາງ, ຕ່າງແຂວງ ແລະ ພຣະສົງພາຍໃນແຂວງຫົວພັນ.

ຝ່າຍຄາລະວາດນຳໂດຍ ທ່ານ ພັນຄຳ ວິພາວັນ ອາດີດນາຍົກລັດຖະມົນຕີ, ທ່ານ ຄຳແພງ ໄຊສົມແພງ ເຈົ້າແຂວງຫົວພັນ ພ້ອມດ້ວຍການນຳແຂວງ ແລະ ອາດີດການນຳແຂວງເຂົ້າຮ່ວມ.

ປື້ມປະຫວັດຄວາມເປັນມາ ຂອງພຣະເຈົ້າອົງຕື້ ເມືອງໂສຍ ແຂວງຫົວພັນ ໄດ້ຮັບການຊີ້ນຳໂດຍ ທ່ານ ປອ ພັນຄຳ ວິພາວັນ ອາດີດນາຍົກລັດຖະມົນຕີ; ຮິບໂຮມ-ຄົ້ນຄວ້າ ແລະ ຂຽນໂດຍ ທ່ານ ຄຳພັນ ພິມມະວົງ; ກວດແກ້ ແລະ ຮຽບຮຽງ ໂດຍ ທ່ານ ສົມພັນ ແພງຄຳມີ, ທ່ານ ປອ ຄຳພອນ ນຸນນະດີ ແລະ ທ່ານ ປອ ຄຳໝັ້ນ ສີພັນໄຊ; ອຸປະຖຳການພິມໂດຍ ທ່ານ ນາງ ສີຈັນ ວິພາວັນ. ເຊິ່ງເນື້ອໃນປະກອບດ້ວຍ 19 ພາກ ທີ່ກ່າວເຖິງ ປະຫວັດຄວາມເປັນມາຂອງພຣະເຈົ້າອົງຕື້ ເລີ່ມຈາກສະພາບລວມກ່ອນຈະມີການຫຼໍ່ພຣະ, ບັນດາປັດໃຈ ແລະ ສາເຫດທີ່ພາໃຫ້ມີການຫຼໍ່ພຣະ, ໄລຍະຫ້າງຫາກະກຽມ, ການດຳເນີນການສ້າງຫຼໍ່, ການສະເຫຼີມສະຫຼອງສົມໂພດ ລວມເຖິງເນື້ອໃນທີ່ອະທິບາຍເຖິງລັກສະນະ, ຈຸດພິເສດ, ຂະໜາດສັດສ່ວນຂອງອົງພຣະ ແລະ ໜັງສືທີ່ສະຫຼັກໄວ້ໃນແທ່ນນັ່ງ. ພ້ອມນັ້ນ, ເນື້ອໃນຂອງປື້ມຍັງໄດ້ເລົ່າເຖິງປະຫວັດຂອງພຣະອົງຕື້ນັບແຕ່ມື້ສ້າງຫຼໍ່ເຖິງປັດຈຸບັນ.