ເຮືອບິນ ເອມີເຣດ ຈາກເມືອງດູໄບ ມາ ເມືອງມຸມໄບ ຕຳຝູງນົກ ແຕ່ສາມາດນຳຜູ້ໂດຍສານລົງປອດໄພ

  ວັນທີ 22 ພຶດສະພາ 2024, ສຳນັກຂ່າວສານ AFP ລາຍງານຈາກ ເມືອງມຸມໄບ ປະເທດອິນເດຍ ວ່າ: ໃນວັນທີ 20 ພຶດສະພາ 2024 ເວລາ 20:50 ໂມງ ຕາມເວລາທ້ອງຖິ່ນຂອງອິນເດຍ. ພາຍຫລັງເຮືອບິນຂອງສາຍການບິນ ເອມີເຣດ ຖ້ຽວບິນ EK508, ເຊິ່ງເປັນສາຍການບິນແຫ່ງຊາດຂອງສະຫະລັດອາຣັບເອມີເຣດ (UAE), ໄດ້ອອກເດີນທາງຈາກເມືອງດູໄບ ມາ ເມືອງມຸມໄບ ແລ້ວໄປຕຳໃສ່ຝູງນົກ ຟລາມິງໂກ ທີ່ລະດັບຄວາມສູງຈາກໜ້າດິນ ປະມານ 300 ແມັດ ເຮັດໃຫ້ຝູງນົກຕາຍຢ່າງໜ້ອຍ 39 ຕົວ ກ່ອນເຮືອບິນຈະລົງຈອດຢູ່ສະໜາມບິນສາກົນມຸມໄບ.

 ເຮືອບິນລຳດັ່ງກ່າວ ມີຜູ້ໂດຍສານ 300 ກວ່າຄົນ ແລະ ສາມາດລົງຈອດໄດ້ຢ່າງປອດໄພໃນເວລາ 21:15 ໂມງ, ສ່ວນເຮືອບິນລຳດັ່ງກ່າວ ກໍໄດ້ຮັບຄວາມເສຍຫາຍເນື່ອງຈາກການຕຳກັບຝູງນົກ.