ອາເມລິກາພົບຜູ້ຕິດເຊື້ອໄຂ້ຫວັດສັດປີກ H5N1 ພົວພັນການລະບາດໃນຟາມງົວນົມ ຄົນໃໝ່

      ວັນທີ 22 ພຶດສະພາ, ສູນຄວບຄຸມ ແລະ ປ້ອງກັນພະຍາດຂອງອາເມລິກາ ລາຍງານການກວດພົບຜູ້ຕິດເຊື້ອໄວຣັສໄຂ້ຫວັດສັດປີກຊະນິດຮຸນແຮງ ສາຍພັນ H5N1 ຄົນໃໝ່ ໃນລັດມິຊິແກນ ເຊິ່ງຖືເປັນຜູ້ຕິດເຊື້ອຄົນທີ 2 ທີ່ກ່ຽວພັນກັບການລະບາດຂອງສາຍພັນ H5N1 ໃນງົວນົມຂອງຫລາຍລັດ.

     ລາຍງານລະບຸວ່າ: ຜູ້ຕິດເຊື້ອຄົນໃໝ່ເປັນກໍາມະກອນຢູ່ຟາມງົວນົມທີ່ກວດພົບເຊື້ອໄວຣັສໄຂ້ຫວັດສັດປີກ ສາຍພັນ H5N1 ໃນງົວ ແລະ ມີອາການທາງດວງຕາເທົ່ານັ້ນ. ຂະນະທີ່ສູນຄວບຄຸມ ແລະ ປ້ອງກັນພະຍາດຂອງອາເມລິກາ ເຝົ້າຕິດຕາມລະບົບເຝົ້າລະວັງພະຍາດໄຂ້ຫວັດສັດປີກຢ່າງໃກ້ຊິດ ໂດຍສະເພາະລັດທີ່ໄດ້ຮັບຜົນກະທົບ ແລະ ຍັງບໍ່ພົບສັນຍານຜິດປົກກະຕິຂອງພະຍາດໃນມະນຸດ ລວມທັງການເຝົ້າລະວັງກຸ່ມອາການ.

     ການກວດພົບຜູ້ຕິດເຊື້ອໃໝ່ຈະບໍ່ປ່ຽນແປງການປະເມີນຄວາມສ່ຽງຈາກເຊື້ອໄວຣັສໄຂ້ຫວັດສັດປີກ ສາຍພັນ H5N1 ຕໍ່ສຸຂະພາບສາທາລະນະຊົນໃຫ້ຢູ່ໃນລະດັບຕໍ່າຂອງສູນດັ່ງກ່າວ, ແຕ່ຜູ້ໃກ້ຊິດ ຫລື ສໍາຜັດນົກ ຫລື ສັດອື່ນໆ ທີ່ຕິດເຊື້ອເປັນເວລາດົນ ຫລື ບໍ່ມີການປ້ອງກັນ ຫລື ຢູ່ໃນສະພາບແວດລ້ອມທີ່ມີນົກ ຫລື ສັດອື່ນໆ ທີ່ຕິດເຊື້ອມີຄວາມສ່ຽງຕິດເຊື້ອສູງຂຶ້ນ.