ສສຊ ເປັນຫວ່ງ​ຄູອາສາເຂດຊົນນະບົດ

- Teacher - ສສຊ ເປັນຫວ່ງ​ຄູອາສາເຂດຊົນນະບົດ
- Untitled design - ສສຊ ເປັນຫວ່ງ​ຄູອາສາເຂດຊົນນະບົດ

ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII ທີ່ພວມດໍາເນີນໃນປັດຈຸບັນນີ້, ເຫັນວ່າມີຫລາຍບັນຫາພົ້ນເດັ່ນທີ່ສະມາຊິກສະພາແຫ່ງຊາດໃນແຕ່ລະເຂດເລືອກຕັ້ງໄດ້ຍົກຂຶ້ນສະເໜີຕໍ່ລັດຖະບານ ກໍຄືສະພາແຫ່ງຊາດເພື່ອຄົ້ນຄວ້າພິຈາລະນາແກ້ໄຂ ແລະ ໜຶ່ງໃນນັ້ນແມ່ນບັນຫາຊາຕາກໍາຂອງຄູອາສາສະໝັກທີ່ສິດສອນຢູ່ເຂດຊົນນະບົດຫ່າງໄກສອກຫລີກທີ່ມີຄວາມຫຍຸ້ງຍາກລໍາບາກ ແລະ ບໍ່ມີຄວາມແນ່ນອນວ່າຈະເປັນລັດຖະກອນເມື່ອໃດ.

ບັນຫາດັ່ງກ່າວ, ສສຊ ໄດ້ຖືກຍົກຂຶ້ນມາສະເໜີໃນວາລະຂອງການປະກອບຄໍາເຫັນຕໍ່ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາປີ 2017 ແລະ ແຜນການໃນປີຕໍ່ໄປ, ໂດຍ ສສຊ ​ໄດ້​ສະ​ເໜີ​ລັດຖະບານ​ຄົ້ນຄວ້າ​ພິຈາລະນາ​ນະ​ໂຍບາຍ​ຊຸກຍູ້​ສົ່ງ​ເສີມ​ຄູ​ສອນ​ຢູ່​ເຂດ​ຊົນນະບົດຫ່າງໄກຊອກຫລີກ​ໃຫ້ເໝາະສົມກວ່າເກົ່າ, ລວມທັງ​ການຈັດສັນໂຄຕາລັດຖະກອນໃຫ້ມີຄວາມຍຸຕິທໍາ​, ເພາະໄລຍະຜ່ານມາເຫັນວ່າມີຄູ​ອາສາສະໝັກຫລາຍຄົນທີ່ສິດສອນຢູ່ເຂດຫ່າງໄກມາຫລາຍປີແຕ່ຍັງບໍ່ໄດ້ຮັບໂຄຕາລັດຖະກອນ​ ແລະ ກົງກັນຂ້າມພັດເຫັນວ່າ​ຄູສອນຢູ່ຕົວ​ເມືອງແມ່ນ​ຈະ​ໄດ້ໂຄຕາລັດຖະກອນ​ໄວ​ກວ່າ.

ດັ່ງທ່ານ​ນາງ ສູນ​ໄຖ ​ໄຊ​ຍະ​ແສງ ສະມາຊິກ​ສະພາ​ແຫ່ງ​ຊາດ​ເຂດ​ເລືອກ​ຕັ້ງທີ 14 ​ແຂວງ​ສາລະ​ວັນ ມີ​ຄຳ​ເຫັນ​ວ່າ: ສາລະ​ວັນ​ເປັນ​​ແຂວງ​ໜຶ່ງ​ທີ່​ມີ​ຕົວ​ເລກ​ການ​ປະລະ​ການ​ຮຽນ​ສູງ, ເຊິ່ງມີສາເຫດມາຈາກ​ສະພາບ​ຄອບຄົວ​ທຸກ​ຍາກ, ໂຮງຮຽນ​ຢູ່​ຫ່າງ​ໄກ ​ແລະ ບໍ່​ມີ​ຫໍ​ພັກ​ໃຫ້​ນັກຮຽນ​ທີ່ຢູ່ເຂດ​ຫ່າງ​ໄກ ແລະ ອີກບັນຫາສໍາຄັນໜຶ່ງແມ່ນສະພາບ​ຂາດ​​ເຂີນ​ຄູສອນ​ຕ້ອງ​ໄດ້​ຮັບ​ການ​ແກ້​ໄຂ​ຢ່າງ​ຮີບ​ດ່ວນຍ້ອນສະພາບຄູສອນລາອອກ, ສະນັ້ນສະເໜີລັດຖະບານຄວນຄົ້ນຄວ້າວິທີທາງແກ້ໄຂ ແລະ ຈັດສັນງົບປະມານເຂົ້າໃນການສົ່ງເສີມຄູໃນເຂດຊົນນະບົດໃຫ້ມີຊິວີດການເປັນຢູ່ດີຂຶ້ນກວ່າເກົ່າ.

ຂະນະ​ທີ່​ທ່ານ​ນາງ ​ແສງ​ສຸວັນ ຊຸຍ​ພະ​ສິດ ສະມາຊິກ​ສະພາ​ແຫ່ງ​ຊາດ​ເຂດ​ເລືອກ​ຕັ້ງທີ 15 ​ແຂວງ​ຈຳປາ​ສັກ ​ໄດ້​ສະ​ເໜີ​ວ່າ: ປັດຈຸບັນສະພາບການສຶກສາ ໃນເຂດຊົນນະບົດຍັງ​ມີ​ຄວາມ​ຫຍຸ້ງຍາກ ​ແລະ ສິ່ງ​ທ້າ​ທາຍ​ຫລາຍດ້ານ, ໂດຍ​ສະ​ເພາະຫລາຍທ້ອງຖິ່ນຍັງ​ມີ​ຄວາມ​ຕ້ອງການ​ຄູ​ເປັນ​ຈຳນວນ​ຫລາຍ ​ເພື່ອ​ມາ​ຮັບ​ໃຊ້​ວຽກ​ງາການສິດສອນລູກຫລານ, ​ແຕ່​ສັງ​ເກດ​ເຫັນ​ວ່າ​ຜ່ານ​ມາຢູ່ຫລາຍທ້ອງຖິ່ນມີ​ຄູ​ອາສາ​ສະໝັກຈໍານວນບໍ່ໜ້ອຍຍັງ​ບໍ່​ທັນ​ໄດ້​ເປັນ​ລັດຖະກອນ, ຈຶ່ງ​ເຮັດ​ໃຫ້​ມີ​ສະພາບການ​ຂາດ​ເຂີນ​ຄູ, ໂຮງຮຽນບາງແຫ່ງ​ມີ​ຄູປະຈຳ​ພຽງ​ແຕ່ 2-3 ຄົນ ແລະ  ນັບ​ແຕ່​ປີ 2015 ​ເປັນຕົ້ນມາ, ຫລາຍ​ໂຮງຮຽນໃນ​ເຂດຊົນນະບົດ​ແມ່ນ​ບໍ່​ຮັບ​ຄູ​ອາສາສະໝັກ, ຈຶ່ງ​ສະເໜີໃຫ້ລັດຖະບານຄົ້ນຄວ້າ​ການ​ເພີ່ມ​ໂກ​ຕາລັດຖະກອນໃຫ້​ຄູ​ຢູ່​ເຂດ​ຊົນນະບົດ​ຕື່ມ.

- Wave100S AD to Website 2020 0 - ສສຊ ເປັນຫວ່ງ​ຄູອາສາເຂດຊົນນະບົດ

​ທ່ານ​ນາງ ມະນີ​ວັນ ​ເຢຍປາວ​ເຣີ ສະມາຊິກ​ສະພາ​ແຫ່ງ​ຊາດ ​ເຂດ​ເລືອກ​ຕັ້ງທີ 7 ​ແຂວງ​ຫົວພັນ ​ໄດ້ມີຄຳ​ເຫັນ​ວ່າ: ປັດຈຸບັນ​, ​ມີ​ຫລາຍ​ທ້ອງ​ຖິ່ນ​ພົບບັນຫາ​ຂາດ​ເຂີນ​ຄູສອນ, ​ເຊິ່ງ​ຜ່ານ​ມາເຖິງວ່າລັດຖະບານໄດ້ຈັດສັນໂຄຕາລັດຖະກອນໃຫ້ຂະແໜງການສຶກສາເປັນຈໍານວນ​ຫລາຍ, ແຕ່ປາກົດວ່າ​ບໍ່​ໄດ້​ບັນຈຸ​ເຂົ້າ​ໃນ​ຂົງເຂດ​ວຽກງານທີ່​ມີ​ຄວາມ​ຈຳ​ເປັນ, ໂດຍສ່ວນ​ໃຫຍ່​ຈະຈັດສັນໃຫ້ໃນວຽກງານອື່ນ ແລະ ​ໃນເຂດ​ຕົວ​ເມືອງ, ຊຶ່ງເປັນສາເຫດໜຶ່ງທີ່ມີສະພາບ​ຄູ​ເຫລືອ​ບໍ່ພໍ. ຂະນະດຽວກັນ, ວຽກ​ງານ​ດ້ານ​ການ​ສຶກສາ​ກໍ​ຍັງ​ມີ​ການ​ເລືອກ​ເຂົ້າຮຽນ​ສາຍ​ປະລິນຍາ​ຕີ​ຫລາຍ​ກວ່າ​ຮຽນວິຊາ​ຊີບ, ຍ້ອນ​​ບໍລິສັດ​ຕ່າງໆ​ໄດ້​ພາກັນ​ຕັ້ງເງື່ອນໄຂ​ໃນ​ການ​ສະໝັກ​ວຽກ ​ໂດຍ​ກຳນົດ​ເອົາ​ແຕ່​ຜູ້​ທີ່​ຮຽນ​ຈົບ​ປະລິນຍາ​ຕີ​ເທົ່າ​ນັ້ນ ຈຶ່ງ​ເຮັດ​ໃຫ້​ນັກ​ສຶກສາ​ເກີດ​ມີ​ແນວ​ຄິດ​ຢາກ​ເຂົ້າຮຽນ​ໃນ​ສາ​ຍປະລິນຍາ​ຕີ​ຫລາຍ​ກວ່າ​ສາຍ​ວິຊາ​ຊີບ​ເຖິງ​ວ່າ​ທາງ​ລັດຖະບານ​ໄດ້​ມີ​ການ​ເພີ່ມ​ທຶນ​ການ​ສຶກສາ​ໃນ​ສາຍ​ວິຊາ​ຊີບ​ຕື່ມ​ແຕ່​ກໍ​ຍັງ​ມີ​ຄົນ​ຮຽນ​ໜ້ອຍ.

- WhatsApp Image 2020 05 27 at 5 - ສສຊ ເປັນຫວ່ງ​ຄູອາສາເຂດຊົນນະບົດ
- WhatsApp Image 2020 05 27 at 5 - ສສຊ ເປັນຫວ່ງ​ຄູອາສາເຂດຊົນນະບົດ
error: Alert: ເນື້ອຫາຂ່າວມີລິຂະສິດ !!