ຈັບຕົວນາຍໜ້າ 3 ຄົນຢູ່ແຂວງຊຽງຂວາງທີ່ຕົວະຍົວະຍິງສາວໃຫ້ແຕ່ງງານກັບຄົນຈີນໄດ້ເງິນຄ່າດອງ 150 ລ້ານກີບ
ວັນທີ 27 ພຶດສະພາ 2024 ນີ້, ຂ່າວ ປກສ ແຂວງຊຽງຂວາງ ລາຍງານວ່າ: ເຈົ້າໜ້າທີ່ພະແນກສະກັດກັ້ນ ແລະ ຕ້ານການຄ້າມະນຸດ ປກສ ແຂວງຊຽງຂວາງ ໄດ້ກັກຕົວນາຍໜ້າທີ່ຕົວະຍົວະເອົາຍິງສາວໄປເປັນເມຍຄົນຈີນໂດຍບໍ່ຖືກຕ້ອງຕາມລະບຽບກົດໝາຍ 3 ຄົນຄື: ນາງໄມ ອາຍຸ 33 ປີ, ນາງທອງ 54 ປີ, ນາງ ພອນ 39 ປີ, ທັງ 3 ຄົນ ແມ່ນປະຊາຊົນບ້ານຈອມສີ ເມືອງຄຳ ແຂວງຊຽງຂວາງ.
ຜ່ານການສອບສວນຂອງເຈົ້າໜ້າທີ່ພວກກ່ຽວຮັບສາລະພາບວ່າ: ໄດ້ເຄື່ອນໄຫວຕົວະຍົວະເອົາຍິງສາວຄົນບ້ານດຽວກັນໄປເປັນເມຍຄົນຈີນແທ້, ເຊິ່ງເລີ່ມເຄື່ອນໄຫວແຕ່ປີ 2016 ເປັນຕົ້ນມາ ແລະ ມີຜູ້ຕົກເປັນເຍື່ອຈຳນວນຫລາຍ ໃນນັ້ນຈຳນວນໜຶ່ງແມ່ນໄດ້ສົ່ງໄປຢູ່ຈີນແລ້ວ ແລະ ຈຳນວນໜຶ່ງແມ່ນຍັງຢູ່ລາວ. ສ່ວນຫລາຍແມ່ນເປັນຍິງອາຍຸ 18-20 ປີ, ໂດຍເປັນນາຍໜ້າໃຫ້ຄົນຈີນທີ່ຢູ່ແຂວງຫລວງນ້ຳທາ ແລະ ໄດ້ໃຫ້ກຸນອຸບາຍຕໍ່ຜູ້ປົກຄອງຍິງສາວວ່າມີຄົນຈີນທີ່ເປັນຄົນໂສດ ແລະ ມີເງິນຫລາຍຢາກໄດ້ເມຍເປັນຄົນລາວ ຖ້າຫາກຕົກລົງແຕ່ງງານແມ່ນຈະໄດ້ເງິນຄ່າດອງ 150 ລ້ານກີບ, ຫລັງຕົວະໄດ້ແລ້ວແມ່ນໄດ້ໄປສົ່ງໃຫ້ຄົນຈີນຢູ່ຊາຍແດນບໍ່ເຕນ-ບໍ່ຫານ ແຂວງຫລວງນ້ຳທາ ເພື່ອຂ້າມໄປປະເທດຈີນ. ໃນການເປັນນາຍໜ້ານີ້ແມ່ນໄດ້ຮັບຄ່າຕອບແທນ 20-35 ລ້ານກີບ ຕໍ່ຄົນ ຕໍ່ຄັ້ງ.
ຕໍ່ການກະທຳດັ່ງກ່າວຂອງພວກກ່ຽວແມ່ນເປັນການຜິດໃນສະຖາການຄ້າມະນຸດ, ດັ່ງນັ້ນເຈົ້າໜ້າທີ່ຈຶ່ງນຳຕົວມາດຳເນີນຄະດີຕາມລະບຽບກົດໝາຍ ແລະ ຂະຫຍາຍຜົນຫາຜູ້ຮ່ວມຂະບວນການ.
