ຮອງລັດຖະມົນຕີກະຊວງການຕ່າງປະເທດລົງກວດກາຊາຍແດນຮ່ວມກັບຝ່າຍກໍາປູເຈຍ

- 445787513 904620431692264 1615597847523373143 n - ຮອງລັດຖະມົນຕີກະຊວງການຕ່າງປະເທດລົງກວດກາຊາຍແດນຮ່ວມກັບຝ່າຍກໍາປູເຈຍ
- kitchen vibe - ຮອງລັດຖະມົນຕີກະຊວງການຕ່າງປະເທດລົງກວດກາຊາຍແດນຮ່ວມກັບຝ່າຍກໍາປູເຈຍ

ລະຫວ່າງວັນທີ 28-31 ພຶດສະພາ 2024 ນີ້, ທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດ, ປະທານຄະນະອະນຸກໍາມະການເຕັກນິກຊາຍແດນຮ່ວມ ລາວ-ກໍາປູເຈຍ ຮ່ວມກັບ ທ່ານ ໄອ ວຸທີ ຮອງລັດຖະມົນຕີປະຈໍາຄະນະກໍາມະການຊາຍແດນ ແຫ່ງ ຣາຊະອານາຈັກກໍາປູເຈຍ, ປະທານຄະນະອະນຸກໍາມະການເຕັກນິກຊາຍແດນຮ່ວມ ກໍາປູເຈຍ-ລາວ, ພ້ອມດ້ວຍຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສູນກາງ ແລະ ແຂວງທີ່ກ່ຽວຂ້ອງຂອງທັງສອງຝ່າຍ ໄດ້ລົງກວດກາຊາຍແດນບາງຈຸດ ທີ່ນອນຢູ່ໃນຈໍານວນທີ່ໄດ້ສໍາຫລວດແລ້ວ 86% ແຕ່ຍັງບໍ່ເປັນເອກະພາບການແກ້ໄຂ ຄື: ຈຸດຄາດກະທີ່ຕັ້ງຫລັກໝາຍຊາຍແດນເລກທີ 002 ແລະ ຈຸດຄາດກະທີ່ຕັ້ງຫລັກໝາຍເລກທີ 003 ຢູ່ ເມືອງມູນລະປະໂມກ ແລະ ເມືອງຈອມກະສານ, ບໍລິເວນຫລັກໝາຍຊາຍແດນເລກທີ 033-033/3, 031-031/1 ແລະ 032-032/6 ຢູ່ ເມືອງໂຂງ ແລະ ເມືອງໂບໄຣໂອສະໄວແສນໃຈ, ທີ່ຂຶ້ນກັບແຂວງຈໍາປາສັກ ສປປ ລາວ ແລະ ແຂວງຊຽງແຕງ, ແຂວງເພຣຍວິເຮຍ ຣາຊະອານາຈັກກໍາປູເຈຍ.

ພາຍຫລັງການລົງກວດກາຮ່ວມ, ປະທານຄະນະອະນຸກໍາມະການເຕັກນິກຊາຍແດນຮ່ວມ ທັງສອງຝ່າຍໄດ້ປະຊຸມປຶກສາຫາລືຜົນການກວດກາຢູ່ພື້ນທີ່ຕົວຈິງຮ່ວມກັນ ໂດຍໄດ້ແລກປ່ຽນທັດສະນະໃນການແກ້ໄຂບໍລິເວນຊາຍແດນດັ່ງກ່າວ ສອງຝ່າຍໄດ້ມີການແລກປ່ຽນທັດສະນະຢ່າງກົງໄປກົງມາ, ພາຍໃຕ້ບັນຍາກາດແຫ່ງຄວາມສາມມັກຄີ ແລະ ເຂົ້າອົກ-ເຂົ້າໃຈເຊິ່ງກັນ ແລະ ກັນ ອັນໄດ້ເຮັດໃຫ້ສອງຝ່າຍສາມາດສ້າງຄວາມຄືບໜ້າອັນສໍາຄັນໃນການແກ້ໄຂບັນຫາຊາຍແດນ ລະຫວ່າງສອງປະເທດຮ່ວມກັນ.

- Visit Laos Visit SALANA BOUTIQUE HOTEL - ຮອງລັດຖະມົນຕີກະຊວງການຕ່າງປະເທດລົງກວດກາຊາຍແດນຮ່ວມກັບຝ່າຍກໍາປູເຈຍ

ໃນໂອກາດການເຄື່ອນໄຫວຮ່ວມກັນໃນຄັ້ງນີ້, ຄະນະຜູ້ແທນທັງສອງຝ່າຍໄດ້ເຂົ້າຮ່ວມພິທີປັກຫລັກໝາຍຊາຍແດນ ເລກທີ 034 ເພື່ອເປັນສັນຍາລັກແຫ່ງການເລີ່ມຕົ້ນການກໍ່ສ້າງຫລັກໝາຍຊາຍແດນແບບໃໝ່ ກໍຄື ການບູລະນະຫລັກໝາຍຊາຍແດນ ລະຫວ່າງສອງປະເທດ ລາວ ແລະ ກໍາປູເຈຍ ໃຫ້ມີຄວາມແໜ້ນໜາຖາວອນ ແລະ ໃຫຍ່ກວ່າເກົ່າ ເພື່ອປ່ຽນແທນຫລັກໝາຍຊາຍແດນເກົ່າ ໂດຍການເຂົ້າຮ່ວມເປັນສັກຂີພິຍານຂອງຜູ້ຕາງໜ້າຂະແໜງ ການກ່ຽວຂ້ອງຂອງສູນກາງ ແລະ ອໍານາດການປົກຄອງທ້ອງຖິ່ນ ຂັ້ນແຂວງ, ເມືອງ ແລະ ບ້ານຊາຍແດນຂອງທັງສອງປະເທດ.

ການເຄື່ອນໄຫວຮ່ວມກັນ ຂອງຄະນະຜູ້ແທນຊາຍແດນຂອງສອງປະເທດໃນຄັ້ງນີ້, ພາຍໃຕ້ບັນຍາກາດແຫ່ງການຮ່ວມມືອັນດີ ລະຫວ່າງສອງປະເທດທີ່ນັບມື້ແໜ້ນແຟ້ນ, ເປັນການຜັນຂະຫຍາຍຕາມເຈດຕະນາລົມຂອງການ ນໍາຂັ້ນສູງ ກໍຄື ລັດຖະບານຂອງສອງປະເທດ ທີ່ຊຸກຍູ້ໃຫ້ສອງຝ່າຍຕັດສິນໃຈແກ້ໄຂບັນຫາຊາຍແດນທີ່ຍັງຄົງຄ້າງໃຫ້ມີຄວາມຄືບໜ້າຢ່າງຕໍ່ເນື່ອງ ແລະ ສໍາເລັດເທື່ອລະກ້າວ, ເປັນການຈັດຕັ້ງປະຕິບັດສົນທິສັນຍາ ວ່າດ້ວຍ ການກໍານົດຊາຍແດນປະເທດ ລະຫວ່າງ ສປປ ລາວ ແລະ ຣາຊະອານາຈັກກໍາປູເຈຍ ທີ່ໄດ້ລົງນາມໃນວັນທີ 13 ກຸມພາ 2023 ແລະ ຍັງເປັນການເຜີຍແຜ່ໃຫ້ອໍານາດການປົກຄອງທ້ອງຖິ່ນ ກໍຄື ປະຊາຊົນຂອງສອງປະເທດ ເຂົ້າໃຈໄດ້ເຖິງຄວາມໝາຍຄວາມສໍາຄັນຂອງວຽກງານຊາຍແດນ ກໍຄື ຄວາມເອົາໃຈໃສ່ຂອງພັກ ແລະ ລັດຖະບານ ໃນການສ້າງຊາຍແດນລະຫວ່າງສອງປະເທດ ໃຫ້ມີຄວາມຈະແຈ້ງ ເປັນທີ່ຮັບຮູ້ໄດ້ງ່າຍສໍາລັບປະຊາຊົນ ແລະ ສ້າງຄວາມສະດວກໃຫ້ແກ່ເຈົ້າໜ້າທີ່ ໃນການຄຸ້ມຄອງຊາຍແດນ ແລະ ຫລັກໝາຍຊາຍແດນ ທັງເປັນການປະກອບສ່ວນເຂົ້າໃນການສ້າງຊາຍແດນ ລະຫວ່າງສອງປະເທດໃຫ້ກາຍເປັນຊາຍແດນແຫ່ງສັນຕິພາບ, ສະຖຽນລະພາບ, ມິດຕະພາບ, ການຮ່ວມມື ແລະ ການພັດທະນາທີ່ຍືນຍົງຢ່າງແທ້ຈິງ.

ຂ່າວ-ພາບ: ກຕທ

- 5 - ຮອງລັດຖະມົນຕີກະຊວງການຕ່າງປະເທດລົງກວດກາຊາຍແດນຮ່ວມກັບຝ່າຍກໍາປູເຈຍ
- 3 - ຮອງລັດຖະມົນຕີກະຊວງການຕ່າງປະເທດລົງກວດກາຊາຍແດນຮ່ວມກັບຝ່າຍກໍາປູເຈຍ
- 4 - ຮອງລັດຖະມົນຕີກະຊວງການຕ່າງປະເທດລົງກວດກາຊາຍແດນຮ່ວມກັບຝ່າຍກໍາປູເຈຍ