ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້

ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້ - 76c374d8caf8fdc3be5951b0a5a053ad - ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້
ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້ - kitchen vibe - ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້

      ທີມນັກວິທະຍາສາດຮ່ວມກັນພັດທະນາຢາທີ່ຈະຊ່ວຍກະຕຸ້ນໃຫ້ແຂ້ວແທ້ສາມາດປົ່ງຂຶ້ນມາໃໝ່ໄດ້ອີກ ຫວັງມາແທນການໃສ່ແຂ້ວປອມ.

      ປົກກະຕິແລ້ວ ແຂ້ວຂອງຄົນມີ 2 ຊຸດຄື: ແຂ້ວນໍ້ານົມ ແລະ ແຂ້ວແທ້ ເມື່ອເຕີບໃຫຍ່ຮອດໄວຜູ້ໃຫຍ່ ແຂ້ວນໍ້ານົມຈະຫລຸດອອກ ປ່ຽນເປັນແຂ້ວແທ້ທັງໝົດ. ຈາກນີ້ ຖ້າເປັນພະຍາດ ຫລື ເກີດຄວາມເສຍຫາຍຕໍ່ເຫງືອກ ແລະ ແຂ້ວ ລວມທັງເມື່ອເຂົ້າສູ່ໄວຜູ້ເຖົ້າ ຈົນເຮັດໃຫ້ແຂ້ວແທ້ຫລຸດອອກ ຫລື ຕ້ອງລົກຖິ້ມ ຈະບໍ່ມີແຂ້ວໃໝ່ຂຶ້ນມາທົດແທນ ຕ້ອງໃສ່ແຂ້ວປອມເຂົ້າໄປແທນ.

ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້ - Visit Laos Visit SALANA BOUTIQUE HOTEL - ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້

      ເຖິງຢ່າງໃດກໍຕາມ, ເມື່ອບໍ່ດົນມານີ້ ມີທີມນັກວິທະຍາສາດໄດ້ພະຍາຍາມພັດທະນາຢາທີ່ສາມາດຊ່ວຍໃຫ້ຮ່າງກາຍສ້າງແຂ້ວແທ້ເຫລັ້ມໃໝ່ຂຶ້ນມາໄດ້ ຫລັງຈາກຫລຸດອອກໄປແລ້ວ ແລະ ເລີ່ມການທົດລອງນໍາສັດໃນຫ້ອງທົດລອງມາແຕ່ປີ 2023.

     ຖ້າບໍ່ມີຫຍັງຜິດພາດ ອາດເປັນໄປໄດ້ວ່າໄລຍະທ້າຍປີ 2024 ຈະມີການທົດລອງຢາຊ່ວຍໃຫ້ແຂ້ວແທ້ປົ່ງຂຶ້ນມາໃໝ່ຊຸດທໍາອິດນໍາມະນຸດ ໂດຍກໍານົດວ່າຈະມີການທົດລອງຢູ່ໂຮງໝໍມະຫາວິທະຍາໄລກຽວໂຕ ເລີ່ມແຕ່ເດືອນກັນຍາ 2024 ຮອດເດືອນສິງຫາ 2025.

      ສໍາລັບຄົນເຈັບຜູ້ເຂົ້າຮ່ວມການທົດລອງ ກໍານົດຄຸນສົມບັດໄວ້ວ່າ: ຈະຕ້ອງມີອາຍຸລະຫວ່າງ 30-64 ປີ ທີ່ມີແຂ້ວກາມຫລຸດ ຫລື ສູນເສຍແຂ້ວກາມຢ່າງໜ້ອຍ 1 ປີ ໂດຍຈະເປັນການທົດລອງໃຊ້ຢາປິ່ນປົວຂະໜານໃໝ່ ເພື່ອທົດລອງປະສິດທິພາບຂອງຢາທີ່ມີຕໍ່ສະພາບແຂ້ວຂອງມະນຸດ ຫລັງຈາກໄດ້ທົດລອງນໍາໜູ ແລະ ໂຕເຟີເຣັດມາແລ້ວ ແລະ ພົບວ່າແຂ້ວຂອງພວກມັນປົ່ງຂຶ້ນມາໃໝ່ໄດ້ດີ ບໍ່ມີຜົນຂ້າງຄຽງ.

     ທ່ານ ຄັດສຶ ທາຄາຮາຊິ ຫົວໜ້າພະແນກໄສຍະກໍາຊ່ອງປາກ ແລະ ທັນຕະກໍາຂອງໂຮງໝໍຄິຕາໂນະ ເຊິ່ງເປັນຫົວໜ້າທີມວິໄຈໂຄງການນີ້ກ່າວເຖິງເປົ້າໝາຍຂອງໂຄງການໄວ້ວ່າ: ທີມງານຕ້ອງການຊ່ວຍເຫລືອຄົນທີ່ຕ້ອງລໍາບາກເພາະສູນເສຍແຂ້ວແທ້ ເຊິ່ງປັດຈຸບັນຍັງບໍ່ມີວິທີຮັກສາຢ່າງຖາວອນ.

     ຢາທີ່ຄາດວ່າຈະຊ່ວຍເລັ່ງໃຫ້ແຂ້ວແທ້ສາມາດປົ່ງຂຶ້ນມາໃໝ່ໄດ້ນີ້ຈະໄປຢຸດຢັ້ງການເຮັດວຽກຂອງໂປຣຕີນ ຫລື ຈຸລັງໂຕໜຶ່ງທີ່ເອີ້ນວ່າ: Uterine sensitization-associated gene-1 (USAG-1) ເຊິ່ງເປັນໂຕກົດການປົ່ງໃໝ່ຂອງແຂ້ວເອົາໄວ້.

      ເມື່ອປິດກັ້ນການມີປະຕິສໍາພັນລະຫວ່າງໂປຣຕີນໂຕນີ້ກັບໂປຣຕີນໂຕອື່ນໆ ຈະໄປກະຕຸ້ນໃຫ້ໂປຣຕີນ BMP (Bone morphogenetic protein) ທີ່ກ່ຽວກັບການສ້າງກະດູກ ກັບມາເຮັດວຽກ ສົ່ງຜົນເຮັດໃຫ້ກະດູກໃນຮ່າງກາຍປົ່ງຂຶ້ນໃໝ່ ເຊິ່ງການເລືອກກົດການເຮັດວຽກຂອງໂປຣຕີນ USAG-1 ຈະເຮັດໃຫ້ມີຜົນກະຕຸ້ນສະເພາະແຂ້ວທີ່ຈະປົ່ງຂຶ້ນມາໃໝ່.

      ຈາກຜົນການທົດລອງຜ່ານມາ ທັງໜູ ແລະ ເຟີເຣັດ ເຊິ່ງມີໂປຣຕີນ USAG-1 ຄືມະນຸດ ມີແຂ້ວປົ່ງຂຶ້ນມາໃໝ່ໄດ້ຫລັງຈາກຮັບຢານີ້ເຂົ້າໄປ ເຊິ່ງຖືວ່າເປັນສັນຍານທີ່ດີ.

       ທ່ານ ທາຄາຮາຊິ ເຮັດວຽກຄົ້ນຄວ້າກ່ຽວກັບການເຮັດໃຫ້ແຂ້ວປົ່ງຂຶ້ນມາໃໝ່ມາເກືອບ 20 ປີແລ້ວ ແລະ ຫວັງວ່າຢາຮັກສາຂະໜານໃໝ່ນີ້ຈະສາມາດນໍາໄປໃຊ້ໄດ້ຫລາຍຮູບແບບ ບໍ່ແມ່ນໃຊ້ສະເພາະກັບຜູ້ທີ່ມີບັນຫາເລື່ອງແຂ້ວ, ແຕ່ທ່ານຢາກຈະໃຫ້ໃຊ້ໄດ້ກັບທຸກໆຄົນທີ່ສູນເສຍແຂ້ວແທ້ໄປແລ້ວ ບໍ່ວ່າຈະອາຍຸເທົ່າໃດ.

     ການທົດລອງຊຸດທໍາອິດຈະໃຊ້ເວລາ 11 ເດືອນ ແລະ ຈາກນັ້ນ ທີມວິໄຈຈະວາງແຜນວ່າຈະທົດລອງໃຊ້ຢານີ້ນໍາຄົນໄຂ້ລຸ້ນອາຍຸລະຫວ່າງ 2-7 ປີ ທີ່ມີແຂ້ວບໍ່ມີຢ່າງໜ້ອຍ 4 ເຫລັ້ມ ເນື່ອງຈາກແຂ້ວຜິດປົກກະຕິມາແຕ່ເກີດເຮັດໃຫ້ມີແຂ້ວບໍ່ຄົບ.

      ຄົນໄຂ້ເດັກທີ່ມີສະພາບດັ່ງກ່າວມີຢູ່ໜ້ອຍ ເພາະເປັນພະຍາດຫາຍາກ ເຊິ່ງມີຜົນຕໍ່ປະຊາກອນໂລກພຽງ 1% ເທົ່ານັ້ນ ທີມງານຈຶ່ງເລັ່ງຫາຄົນໄຂ້ຜູ້ເຂົ້າຮ່ວມການທົດລອງນັບແຕ່ຕອນນີ້.

      ນອກຈາກນີ້, ທີມວິໄຈຍັງມີແຜນຈະທົດລອງກັບຄົນໄຂ້ໄວຜູ້ໃຫຍ່ທີ່ແຂ້ວແມງ ຫລື ສູນເສຍແຂ້ວເພາະສະພາບແວດລ້ອມອື່ນໆຈໍານວນ 1-5 ເຫຼັ້ມ.

      ຖ້າທຸກຢ່າງເປັນໄປຕາມແຜນ ຢາເລັ່ງແຂ້ວໃໝ່ປົ່ງໃໝ່ໄດ້ນີ້ຈະສາມາດວາງຈໍາໜ່າຍໃນທາງການຄ້າໄດ້ພາຍໃນປີ 2030.

ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້ - 4 - ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້
ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້ - 5 - ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້
ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້ - 3 - ນັກວິທະຍາສາດພັດທະນາຢາຊ່ວຍເຮັດໃຫ້ແຂ້ວແທ້ປົ່ງມາໃໝ່ໄດ້