ລັດຖະມົນຕີປ້ອງກັນປະເທດຟີລິບປິນ ປະກາດສຳເລັດການສູ້ຮົບ ຢູ່ເມືອງມາລາວີແລ້ວ
ທ່ານ ເດລຟິນ ໂລເຣນຊານາ ລັດຖະມົນຕີປ້ອງກັນປະເທດຟີລິບປິນ ປະກາດວ່າ: ປະຕິບັດການສູ້ຮົບລະຫວ່າງກອງທັບກັບກຸ່ມຕິດອາວຸດຢູ່ເມືອງມາລາວີ ທາງພາກໃຕ້ຂອງຟີລິບປິນໄດ້ສຳເລັດແລ້ວ, ພາຍຫລັງດຳເນີນມາເປັນໄລຍະເວລາ 5 ເດືອນ.
ທ່ານ ໂລເຣນຊານາ ຖະແຫລງຕໍ່ສື່ມວນຊົນລະຫວ່າງກອງປະຊຸມລັດຖະມົນຕີປ້ອງກັນປະເທດລະດັບພາກພື້ນ ໃນວັນທີ 23 ຕຸລານີ້ ໂດຍປະກາດວ່າ: ບໍ່ມີສະມາຊິກກຸ່ມຕິດອາວຸດທີ່ຈົງຮັກພັກດີຕໍ່ກຸ່ມລັດອິດສະລາມ (IS) ເຫລືອຢູ່ໃນເມືອງມາລາວີອີກຕໍ່ໄປ. ພົນເອກ ເອດົວໂດ ອາໂນ ຜູ້ບັນຊາການທະຫານສູງສຸດຟີລິບປິນ ຖະແຫລງວ່າ: ພົບສົບສະມາຊິກກຸ່ມກະບົດຢ່າງໜ້ອຍ 42 ຄົນໃນອາຄານ 2 ແຫ່ງ ແລະ ຢູ່ມັດສະຢິດແຫ່ງໜຶ່ງໃນພື້ນທີ່ສູ້ຮົບ. ທັງນີ້ກຸ່ມກະບົດ ເຊິ່ງສະໜັບສະໜູນກຸ່ມ IS ບຸກຍຶດເມືອງມາລາວີຂອງຟີລິບປິນ ຖືວ່າເປັນໄພຕໍ່ຄວາມໝັ້ນຄົງແຫ່ງຊາດຄັ້ງຮ້າຍແຮງທີ່ສຸດຂອງປະເທດໃນຮອບຫລາຍປີ.
