ວຽກງານພັດທະນາຊົນນະບົດ-ແກ້ໄຂຄວາມທຸກຍາກ

- 448142090 912744114213229 8980116779860024581 n - ວຽກງານພັດທະນາຊົນນະບົດ-ແກ້ໄຂຄວາມທຸກຍາກ
- kitchen vibe - ວຽກງານພັດທະນາຊົນນະບົດ-ແກ້ໄຂຄວາມທຸກຍາກ

ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້ ໄດ້ລາຍງານໃນວາລະດຳເນີນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ຕອນບ່າຍວັນທີ 12 ມິຖຸນາ 2024 ນີ້ວ່າ: ໃນໄລຍະຜ່ານມາ ລັດຖະບານ ໄດ້ນຳພາ-ຊີ້ນໍາ ຈັດຕັ້ງປະຕິບັດວຽກງານພັດທະ ນາຊົນນະບົດ ແລະ ແກ້ໄຂຄວາມທຸກຍາກ ຕາມ 6 ທິດນໍາ ແລະ 12 ທິດທາງ, ຈັດສັນງົບປະມານເຂົ້າໃສ່ການພັດທະນາຊົນນະບົດ ແລະ ແກ້ໄຂຄວາມທຸກຍາກ ໃນແຕ່ລະປີຢ່າງຕໍ່ເນື່ອງ. ໃນນີ້, ງົບປະມານການລົງທຶນຂອງລັດ ປີ 2021 ຈໍານວນ 122 ຕື້ກວ່າກີບ, ປີ 2022 ຈໍານວນ 136 ຕື້ກີບ, ປີ 2023 ຈໍານວນ 178 ຕື້ກີບ; ການປ່ອຍສິນເຊື່ອ ຂອງທະນາຄານນະໂຍບາຍ 2.871 ຕື້ກວ່າກີບ. ໃນນັ້ນ, ຈຳນວນ 1.733 ຕື້ກວ່າກີບ ໄດ້ປ່ອຍໃຫ້ 1.345 ບ້ານ ແລະ 76 ເມືອງທຸກຍາກ. ນອກນີ້, ຍັງມີງົບປະມານຊ່ວຍເຫລືອລ້າ, ກູ້ຢືມ, ການປະກອບສ່ວນຂອງຜູ້ປະກອບການ ແລະ ຂອງປະຊາຊົນ ທີ່ບັນດາຂະແໜງການກ່ຽວຂ້ອງຂັ້ນສູນກາງ ແລະ ທ້ອງຖິ່ນ ຈັດຕັ້ງປະຕິບັດໂຄງການຕ່າງໆ ເປັນຈຳນວນຫລາຍສົມຄວນ ໂດຍສະເພາະງົບປະມານຈາກທະນາຄານໂລກ, ທະນາຄານພັດທະນາອາຊີ, ອົງການ ຈັດຕັ້ງສາກົນ ເພື່ອການພັດທະນາ, ການຮ່ວມມື 2 ຝ່າຍ ກັບປະເທດເພື່ອນມິດ ແລະ ອື່ນໆ.

ພ້ອມນີ້, ລັດຖະບານ ຍັງໄດ້ຖືສຳຄັນ ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນ ແລະ ໄດ້ຊີ້ນຳຈັດຕັ້ງປະຕິບັດຢ່າງຕໍ່ເນື່ອງ ດ້ວຍການປັບປຸງ ແລະ ກໍ່ສ້າງພື້ນຖານໂຄງລ່າງຮັບໃຊ້ການຜະລິດ ແລະ ການດຳລົງຊີວິດ ຂອງປະຊາຊົນ ໄປພ້ອມກັບການຈັດສັນພູມລຳເນົາ ແລະ ອາຊີບ; ການປັບປຸງຍົກລະດັບຊີວິດການເປັນຢູ່ ຂອງປະຊາຊົນໃນເຂດຊົນນະບົດ, ຫ່າງໄກສອກ ຫລີກ, ເຂດລຽບຕາມຊາຍແດນ, ເຂດພື້ນຖານການປະຕິວັດເກົ່າ ເປັນຕົ້ນ ເສັ້ນທາງ, ໄຟຟ້າ, ລະບົບການສື່ສານ, ຊົນລະປະທານ, ນໍ້າລິນ-ນໍ້າສະອາດ, ສູນບໍລິການເຕັກນິກກະສິກໍາ, ຕະຫລາດ, ຫ້ອງການກຸ່ມບ້ານ, ສຸກສາລາ, ໂຮງຮຽນ ແລະ ສິ່ງສາທາລະນຸປະໂພກອື່ນໆ. ນອກນັ້ນ, ຍັງໄດ້ສຸມໃສ່ພັດທະນາຮອບດ້ານ ຢູ່ 45 ຈຸດສຸມ ພັດທະນາ ທີ່ເປັນບຸລິມະສິດ ລະຫວ່າງ ສູນກາງ ແລະ ທ້ອງຖິ່ນ, ຈຸດສຸມກຸ່ມບ້ານພັດທະນາ ລຽບຕາມຊາຍແດນ ການຮ່ວມມືຂອງສອງກົມການເມືອງ ລາວ-ຫວຽດນາມ (ຈຸດສຸມກຸ່ມບ້ານຜາແດງ ເມືອງກວນ ແຂວງຫົວພັນ; ຈຸດສຸມກຸ່ມບ້ານນໍ້າຮາງ ເມືອງສຳພັນ ແຂວງຜົ້ງສາລີ); ຈຸດສຸມຍຸດທະສາດແນວຫລັງ (ຈຸດສຸມກຸ່ມບ້ານຄັງວຽງ ເມືອງໝອກ ແຂວງຊຽງຂວາງ; ຈຸດສຸມຜາເຈຍ ເມືອງນານ ແຂວງຫລວງພະບາງ); ຈຸດສຸມເຂດທີ່ໝັ້ນ ຂອງການປະຕິວັດ (ຈຸດສຸມກຸ່ມບ້ານລາວຮຸ່ງ-ພຽງສາ ເມືອງຊຽງຄໍ້ ແຂວງຫົວພັນ) ແລະ ຈຸດສຸມອື່ນໆ.

- Visit Laos Visit SALANA BOUTIQUE HOTEL - ວຽກງານພັດທະນາຊົນນະບົດ-ແກ້ໄຂຄວາມທຸກຍາກ

ຜ່ານການຈັດຕັ້ງປະຕິບັດ, ເຮັດໃຫ້ຊົນນະບົດ ໄດ້ຮັບການພັດທະນາດີຂຶ້ນເປັນກ້າວໆ ເປັນຕົ້ນ ຮາກຖານການເມືອງ ໄດ້ຮັບການປັບປຸງໃຫ້ເຂັ້ມແຂງ, ພື້ນຖານເສດຖະກິດ-ສັງຄົມ ໄດ້ຮັບການພັດທະ ນາ, ຊີວິດການເປັນຢູ່ ຂອງປະຊາຊົນບັນດາເຜົ່າ ໄດ້ຮັບການປັບປຸງຍົກລະດັບດີຂຶ້ນ, ພື້ນຖານໂຄງລ່າງດ້ານຄົມມະນາຄົມ ກໍຄື ລະບົບສາທາລະນຸປະໂພກ ໄດ້ຮັບການຂະຫຍາຍຕົວ ໄປຮອດເຂດຫ່າງໄກສອກຫລີກ, ສ້າງເງື່ອນໄຂສະດວກ ໃຫ້ແກ່ການດຳເນີນການຜະລິດ-ທຸລະກິດ ແລະ ການບໍລິການ, ປະຊາຊົນ ສາມາດເຂົ້າເຖິງການບໍລິການດ້ານການສຶກສາ, ສາທາລະນະສຸກ, ການບໍລິການດ້ານເງິນຝາກ ແລະ ສິນເຊື່ອ ແລະ ໄດ້ຮັບໂພຊະນາການຫລາຍຂຶ້ນ.

ຮອດປີ 2023 ທົ່ວປະເທດ ມີຄອບຄົວພົ້ນທຸກ 1.026.083 ຄອບຄົວ, ຄອບຄົວບໍ່ພົ້ນທຸກຍັງເຫລືອ 208.231 ຄອບຄົວ. ໃນນັ້ນ, ບ້ານພົ້ນທຸກ 5.855 ບ້ານ, ບ້ານບໍ່ພົ້ນທຸກຍັງເຫລືອ 2.547 ບ້ານ, ເມືອງພົ້ນທຸກ 71 ເມືອງ, ເມືອງບໍ່ພົ້ນທຸກຍັງເຫລືອ 77 ເມືອງ, ຄອບຄົວພັດທະນາ 841.454 ຄອບຄົວ, ບ້ານພັດທະນາ 2.828 ບ້ານ, ບ້ານໃຫຍ່ເປັນຕົວເມືອງໃນຊົນນະບົດ 31 ຈຸດ ແລະ ມີເມືອງເຂັ້ມແຂງຮອບດ້ານ 9 ເມືອງ (ສຳລັບ ຕົວເລກການຈັດຕັ້ງປະຕິບັດ ໃນປີ 2024 ແມ່ນຈະປະເມີນໃນທ້າຍປີນີ້).

- 4 - ວຽກງານພັດທະນາຊົນນະບົດ-ແກ້ໄຂຄວາມທຸກຍາກ
- 5 - ວຽກງານພັດທະນາຊົນນະບົດ-ແກ້ໄຂຄວາມທຸກຍາກ
- 3 - ວຽກງານພັດທະນາຊົນນະບົດ-ແກ້ໄຂຄວາມທຸກຍາກ