ກອງປະຊຸມສະພາເລັ່ງແກ້ບັນຫາພັດທະນາປະເທດຊາດ
ໂດຍ: ກ້ອງສ່ອງ ອິດສະຫລະ
ດັ່ງພວກເຮົາຮັບຮູ້ນໍາກັນແລ້ວວ່າ, ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 8 ໄດ້ໄຂຂຶ້ນມາແຕ່ວັນທີ 16 ຕຸລາຜ່ານມາ ແລະ ຈະດໍາເນີນໄປຮອດກາງເດືອນພະຈິກ 2017 ຈຶ່ງຈະອັດລົງ. ຕາມຜູ້ຂຽນວ່າ ກອງປະຊຸມຄັ້ງນີ້ສຸດທີ່ມີຄວາມໝາຍສໍາຄັນຍິ່ງຕໍ່ພາລະກໍາປະຫວັດສາດຂອງຊາດ ຍ້ອນວ່າບັນຫາຕ່າງໆທີ່ໄດ້ເອົາມາຄົ້ນຄວ້າ ແລະ ປຶກສາຫາລືໃນສະພານີ້ ມັນລ້ວນແລ້ວແຕ່ເປັນບັນຫາອັນສໍາຄັນຮີບດ່ວນທີ່ພົວພັນເຖິງຊາຕາກໍາຂອງປະເທດຊາດ. ອີກປະການໜຶ່ງ ເຮົາເຫັນວ່າສະພາແຫ່ງຊາດນັ້ນເປັນອົງກອນຈັດຕັ້ງສູງສຸດອົງກອນໜຶ່ງຂອງປະເທດທີ່ມີພາລະບົດບາດກວດກາ, ກວດສອບ ແລະ ຕັດສິນບັນຫາໃຫຍ່ໆສໍາຄັນໃນການເຄື່ອນໄຫວຂອງລັດຖະບານ. ນອກນັ້ນ, ສະພາແຫ່ງຊາດຍັງມີພາລະບົດບາດເພື່ອເຮັດໜ້າທີ່ຕໍ່ອໍານາດນິຕິບັນຍັດ ທັງອໍານາດບໍລິຫານ ແລະ ຕຸລາການ. ເພາະສະນັ້ນຈຶ່ງເວົ້າໄດ້ວ່າ ກອງປະຊຸມສະພາແຕ່ລະຄັ້ງນັ້ນຈຶ່ງຖືເປັນກອງປະຊຸມທີ່ມີຄວາມສໍາຄັນຍິ່ງຕໍ່ພາລະກິດຂອງຊາດໃນປັດຈຸບັນ ແລະ ອານາຄົດ.
ແນວໃດກໍດີ, ກອງປະຊຸມໄດ້ຜ່ານພົ້ນມາເປັນເວລາໜຶ່ງອາທິດແລ້ວ, ເທົ່າທີ່ຜູ້ຂຽນໄດ້ຕິດຕາມບັນຍາກາດກໍເຫັນວ່າມີອັນປ່ຽນໃໝ່ ແລະ ພັດທະນາໄປໃນຫລາຍບາດກ້າວ ຖ້າທຽບໃສ່ຍຸກກ່ອນ ຍ້ອນວ່າສະໄໝກ່ອນສ່ວນຫລາຍແມ່ນຂ້ອນຂ້າງຈໍາກັດໃນການເວົ້າວ່າປະກອບຄໍາເຫັນຂອງບັນດາຜູ້ແທນ, ການສະເໜີແນະປະກອບຄໍາຄິດຄໍາເຫັນ ຫລື ມີປາກສຽງໃນການຕໍານິວິເຄາະບັນຫາຕ່າງໆທີ່ເອົາມາຄົ້ນຄວ້າພິຈາລະນາໃນກອງປະຊຸມສະພາກໍມີອັນຈໍາກັດ ຫລືວ່າ ຖ້າມີກໍແມ່ນໜ້ອຍ. ແຕ່ພໍຕົກມາໃນຍຸກນີ້ຈົນເຖິງຂັ້ນຕົກໃສ່ໃຫ້ຜູ້ແທນແຕ່ລະເຂດໃຫ້ພາກັນເວົ້າ ແລະ ປະກອບຄໍາເຫັນ. ນອກຈາກນັ້ນ ຍັງໄດ້ເປີດສາຍດ່ວນໃຫ້ປະຊາຊົນພາຍໃນຊາດປະກອບຄໍາຄິດຄໍາເຫັນສະເໜີແນະ ເຫັນອັນໃດຢາກໃຫ້ທາງສະພາ ແລະ ລັດຖະບານແກ້ກໍໃຫ້ພາກັນໂທເຂົ້າສາຍດ່ວນ ເປັນຕົ້ນການຕໍາໜິສົ່ງຂ່າວໃນການເຮັດວຽກຂອງຜູ້ແທນ ກໍຄືລັດຖະບານຕໍ່ການບໍລິຫານບ້ານເມືອງພາຍໃນປະເທດ. ອີກສິ່ງໜຶ່ງທີ່ເຮົາເຫັນວ່າມີການປ່ຽນແປງ ແລະ ພັດທະນາຢ່າງກ້າວໄກຂອງກອງປະຊຸມສະພານັ້ນແມ່ນໄດ້ຈົກເອົາທັງອັນດີ ແລະ ອັນຮ້າຍຂຶ້ນມາເວົ້າວ່າ ໂດຍໃຫ້ອົງການກວດສອບຂອງພັກ ແລະ ລັດຖະບານເປັນຕົວເກງນໍາເອົາການກະທໍາຜິດວິໄນ, ສິ່ງຂາດຕົກບົກຜ່ອງໃນດ້ານການບໍລິຫານວຽກງານຂອງບັນດາຂະແໜງການ ນັບແຕ່ຂັ້ນທ້ອງຖິ່ນຂຶ້ນຮອດສູນກາງ. ນີ້ຄືນິຕິໃໝ່ຂອງສະພາໃນຍຸກປ່ຽນແປງໃໝ່ ແລະ ຍຸກພັດທະນາ.
ແນວໃດກໍດີ, ເທົ່າທີ່ຜູ້ຂຽນໄດ້ຕິດຕາມກອງປະຊຸມຄັ້ງນີ້ຈ້ອນໆເຂົ້າມາມັນກໍນອນຢູ່ໃນ 3 ຂົງເຂດ ຫລືວ່າ 3 ຂອດໃຫຍ່ ເປັນຕົ້ນຂອດວຽກ, ຂອດຄົນ ແລະ ຂອດເງິນ. ເວົ້າເຖິງຂັ້ນຂອດຂອງວຽກກໍແມ່ນໄດ້ກວດກາຄືນການຈັດຕັ້ງປະຕິບັດໃນໄລຍະຜ່ານມາ ແລະ ທິດແກ້ໄຂໃນຂັ້ນຕໍ່ໄປ. ສໍາລັບຂອດຄົນນັ້ນໃນຜ່ານມາກໍມີຫລາຍອັນຫລາຍຢ່າງ ແລະ ຫລາຍບັນຫາທີ່ຕ້ອງໄດ້ແກ້, ແຕ່ອັນສໍາຄັນທີ່ພົ້ນເດັ່ນໃນກອງປະຊຸມຊຸດນີ້ກໍແມ່ນເລື່ອງຄູອາສາທີ່ຍັງຕົກຄ້າງຢູ່ຫລາຍພັນຄົນໃນທົ່ວປະເທດ. ສ່ວນເວົ້າເລື່ອງເງິນນັ້ນກໍຍັງມີອັນເຮ່ຍຮວາຍໄປຫລາຍສິບຫລາຍຮ້ອຍຕື້ ແລະ ຍັງມີໂຄງການນອກແຜນທີ່ບໍ່ເຂົ້າລ໊ອກເຂົ້າເກຍຫລາຍກວ່າ 100 ໂຄງການ. ປາກົດການຫຍໍ້ທໍ້ອັນນີ້ກໍມີລາມຂຶ້ນມາແຕ່ຂັ້ນທ້ອງຖິ່ນຮອດຂັ້ນສູນກາງ. ນີ້ຄືພາລະອັນໜັກໜ່ວງຊິ້ນໜຶ່ງຂອງສະພາ ແລະ ລັດຖະບານຊຸດນີ້ຕ້ອງໄດ້ແກ້. ຕາມຜູ້ຂຽນຄິດກ່ຽວກັບໂຄງການນອກແຜນໃນຜ່ານມາມັນເກືອບເວົ້າໄດ້ວ່າເປັນປະເພນີຈົນເຂົ້າກະດູກດໍາແລ້ວ. ອັນສາເຫດຕົ້ນຕໍກໍເປັນຍ້ອນນ້ຳບໍ່ຍ້ອຍຫອຍກໍບໍ່ໄຕ່. ຍ້ອນຫຍັງຈຶ່ງວ່າແນວນັ້ນ ? ຍ້ອນວ່າມີບາງໂຄງການມີແຜນ ແລະ ໄດ້ເງິນໄປແລ້ວມັນກໍຍັງຄ້າງຕະເຫລິ່ງເຢີ່ງ, ຊໍ້າບໍ່ໜໍາມີບາງໂຄງການໄດ້ເງິນໄປແລ້ວໄປຊອກຫາບໍ່ເຫັນຈັກວ່າເຂົາໄປລີ້ເຮັດຢູ່ໃສ. ອັນນີ້ຜູ້ຂຽນພຽງຍົກໃຫ້ເຫັນຕອນສິບຊາວປີຜ່ານມາພຸ້ນດອກ. ສະນັ້ນ, ຜ່ານກອງປະຊຸມສະພາຊຸດນີ້ເຮົາໄດ້ຍິນສຽງທ່ານນາຍົກລັດຖະມົນຕີກ່າວອອກມາຢ່າງເຕັມສົບເຕັມປາກວ່າ ຂັ້ນຕໍ່ໄປຈະບໍ່ຮັບພິຈາລະນາໂຄງການນອກແຜນອີກ. ມັນກໍໝາຍຄວາມວ່າຖ້າຜູ້ໃດເຮັດຜູ້ນັ້ນກໍຈະຕ້ອງໄດ້ຮັບຮັບຜິດຊອບເອົາເອງ. ຖ້າຫາກກອງປະຊຸມສະພາເທື່ອໃດກໍຕ້ອງໄດ້ແກ້ແຕ່ບັນຫາໂຄງການນອກແຜນກໍເປັນອັນວ່າມັນຈະບໍ່ສິ້ນສຸດຈັກເທື່ອ ຈະກາຍເປັນບັນຫາມະຍຸມະຍະລາມພະລາມຈົວລວາດແຂ້ວເຕົ່າໄປຕະຫລອດ. ເມື່ອເຫັນທ່ານນາຍົກມີຄໍາເຫັນຕັດບັນຫາຄືແນວນີ້ປະຊາຊົນຕ່າງກໍພູມໃຈ ແລະ ພາກັນຕົບມືພືຜ້າສະໜັບສະໜູນ.
ນີ້ລະຄືບັນຍາກາດ ແລະ ທີເດັດເຜັດມັນຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 8. ສ່ວນວ່າບັນຍາກາດການປະກອບຄໍາເຫັນຂອງບັນດາຜູ້ແທນໃນແຕ່ລະເຂດເລືອກຕັ້ງນັ້ນ ທຸກທ່ານກໍສະແດງຄວາມຄິດເຫັນ ແລະ ເປັນຫ່ວງເປັນໄຍໃນເຊີງສ້າງສັນໃນທຸກຂົງເຂດວຽກງານ. ຜູ້ແທນທຸກທ່ານໃຜກໍໃຊ້ສິດໃນການເປັນຜູ້ຕາງໜ້າໃຫ້ປະຊາຊົນໃນເຂດເລືອກຕັ້ງຂອງຕົນຢ່າງເຕັມສ່ວນ ເພື່ອນໍາເອົາຄວາມຄິດເຫັນຕ່າງໆນາໆເຂົ້າມາເວົ້າວ່າໃນສະພາສົມກັບວ່າເປັນຜູ້ແທນຂອງປະຊາຊົນ ແລະ ເພື່ອປະຊາຊົນຢ່າງແທ້ຈິງ.
