ໂອກາດ ແລະ ສິ່ງທ້າທາຍສຳລັບເພດຍິງໃນບາງປະເທດ

- 2017 09 26T234208Z 838051788 RC19A5D8BFB0 RTRMADP 3 SAUDI WOMEN DRIVING - ໂອກາດ ແລະ ສິ່ງທ້າທາຍສຳລັບເພດຍິງໃນບາງປະເທດ
- Untitled design - ໂອກາດ ແລະ ສິ່ງທ້າທາຍສຳລັບເພດຍິງໃນບາງປະເທດ

ໂດຍ: ວິ​ເສດ ສະ​ແຫວ​ງສຶກສາ

ມື້ນີ້ ພວກ​ເຮົາລອງ​ຍິງ​ສາຍຕາ​ຂ້າມ​ຊາຍ​ແດນ​ໄປ​ເບິ່ງ​ບັນຫາ​ທັງ​ດີ​ທັງ​ດ້ອຍ​ທີ່​ມີ​ຕໍ່​ແມ່ຍິງ​ໃນ​ບາງ​ປະ​ເທດ​ເຊັ່ນ: ດ້ານ​ສຸຂະພາບ ຂໍ​ໃຫ້​ເບິ່ງ​ມາດ​ຕະການທີ່​ຟີ​ລິບ​ປິນ ​ເຊິ່ງ​ໄດ້​ເລີ່​ມປະຕິບັດ​ມາ​ແຕ່​ວັນ​ທີ 24 ກັນຍາ​ເປັນຕົ້ນມາ ນັ້ນຄື​ຄຳ​ສັ່ງ​ຂອງ​ລັດຖະບານ​ຫ້າມ​ບໍລິສັດ​ຕ່າງໆ​ບັງຄັບ​ໃຫ້​ພະນັກງານ​ເພດ​ຍິງ​ໃສ່​ເກີບ​ສົ້ນສູງ ​ເພາະ​ມັນ​ຈະ​ເປັນ​ອັນຕະລາຍ​ຕໍ່​ສຸຂະພາບ​ຂອງ​ແມ່ຍິງ​ທີ່​ປະຕິບັດ​ໜ້າ​ທີ່​ດ້ວຍ​ການ​ເຄື່ອນ​ໄຫວ ຫລື ຢືນ​ເປັນ​ເວລາ​ດົນ​ນານ ​ເຊັ່ນ​ພະນັກງານ​ຍິງ​ຕາມ​ຮ້ານ​ສັບພະ​ສິນ​ຄ້າ, ​ໃນ​ຂະ​ແໜງ​ຕ້ອນຮັບຕາມ​ໂຮງ​ແຮມ. ຄຳ​ສັ່ງ​ຫ້າມ​ໄດ້​ກຳນົດ​ວ່າ ຄວາມ​ສູງ​ຂອງ​ສົ້ນ​ເກີບ​ສຳລັບ​ພະນັກງານ​ຍິງ​ໃນ​ຂະ​ແໜງ​ວຽກ​ທີ່​ກ່າວ​ມາ​ຂ້າງ​ເທິງ​ນັ້ນຄວນ​ຢູ່​ໃນ​ຂອບ 2,54 ຊັງ​ຕີ​ແມັດ ຫລື ສູງ​ກວ່າ​ນັ້ນ​ແດ່​ຕາມ​ຄວາມ​ປະສົງ​ຂອງ​ຜູ້​ໃສ່. ບັນດາ​ບໍລິສັດ​ຄວນ​ມີ​ຂໍ້​ກຳນົດ​ຢ່າງ​ເປັນ​ທາງ​ການ​ຄັກ​ແນ່ ກ່ຽວ​ກັບ​ຂະໜາດ​ຄວາມ​ສູງ​ຂອງ​ສົ້ນ​ເກີບ​ສຳລັບ​ພະນັກງານ​ຍິງ ຄື​ໃຫ້​ມີ​ຄວາມ​ເໝາະ​ສົມ ​ແລະ ສອດຄ່ອງ​ກັບ​ຄວາມ​ເປັນ​ຈິງ. ນອກຈາກ​ນັ້ນ ທາງ​ກະຊວງ​ແຮງ​ງານ​ຟີ​ລິບ​ປິນຍັງ​ໄດ້​ສະ​ເໜີ​ບັນດາ​ບໍລິສັດ​ໃຫ້​ຄົນ​ງານ​ມີ​ເວລາ​ພັກຜ່ອນ, ມີ​ເວລາ​ໄດ້​ນັ່ງ ​ເພື່ອ​ຊົດ​ເຊີຍ​ເວລາ​ທີ່​ພວກ​ເຂົາ​ເຈົ້າ​ໄດ້​ຍ່າງ​ເຮັດ​ວຽກ. ພະນັກງານ​ບັນຊີ, ຂາຍ​ສິນຄ້າ, ​ເກັບ​ລາຍ​ຮັບ ​ແລະ ການ​ຕະຫລາດ​ໃນ​ຟີ​ລິບ​ປິນນັ້ນສ່ວນ​ໃຫຍ່​ແມ່ນ​ເພດ​ຍິງ. ​ໃນ​ດ້ານ​ສິດທິ​ສະ​ເໝີ​ພາບ​ກັບ​ເພດ​ຊາຍ​ນັ້ນ ​ໄດ້​ມີ​ປາກົດການ​ໃໝ່​ເກີດ​ຂຶ້ນຢູ່​ປະ​ເທດ​ອາຣາບີ​ ຊາ​ອຸ​ດິດ ຄື​ທາງ​ການຂອງ​ປະ​ເທດ​ນີ້​ໄດ້​ປະກາດ​ໃນ​ວັນ​ທີ 26 ​ເດືອນ​ກັນຍາ​ປີ​ນີ້ ​ໃຫ້​ແມ່ຍິງ​ສາມາດ​ຂັບ​ລົດ​ໄດ້ ​ແຕ່​ຄຳ​ສັ່ງ​ດັ່ງກ່າວ​ຈະ​ມີ​ຜົນ​ທາງ​ປະຕິບັດ​ນັບ​ແຕ່​ເດືອນ​ມິຖຸນາ​ປີ 2018 ​ເປັນຕົ້ນ​ໄປ. ​ໃນ​ໄລຍະ​ແຕ່​ນີ້​ຮອດ​ເວລາ​ນັ້ນ, ທາງ​ການ​ກ່ຽວຂ້ອງ​ຈະ​ກະກຽມ​ຄວາມ​ພ້ອມ​ຕ່າງໆ ​ເຊັ່ນ​ເອກະສານ​ກ່ຽວ​ກັບ​ໃບ​ອະນຸຍາດ​ຂັບ​ຂີ່, ພັດທະນາພື້ນຖານ​ໂຄງ​ລ່າງ​ສຳລັບ​ໂຊ​ເຟີ​ມື​ໃໝ່ ​ແລະ ​ໃຫ້​ແມ່ຍິງ​ມີ​ໂອກາດ​ໄດ້​ຮຽນ​ຂັບ​ລົດ​ດ້ວຍ​ຄວາມ​ຊຳນານ. ຢູ່​ປະ​ເທດ​ອາຣາບີ ຊາ​ອຸ​ດິດ ​ໄດ້​ມີ​ຄຳ​ສັ່ງ​ຫ້າມ​ແມ່ຍິງ​ຂັບ​ລົດ, ມີ​ແຕ່​ຜູ້​ຊາຍ​ເທົ່າ​ນັ້ນຂັບ​ໄດ້. ຍ້ອນ​ແນວ​ນີ້​ເອງ​ຈຶ່ງ​ມີ​ການ​ນຳ​ເຂົ້າ​ໂຊ​ເຟີ​ເພດ​ຊາຍ​ຈາກ​ຕ່າງປະ​ເທດ​ໃນ​ຈຳນວນ​ສູງ​ເກືອບ 8 ​ແສນ​ຄົນ. ຄາດ​ວ່າການ​ອະນຸຍາດ​ໃຫ້​ແມ່ຍິງ​ຂັບ​ລົດ​ເອງ​ໄດ້​ນີ້​ຈະ​ເຮັດ​ໃຫ້​ຕະຫລາດ​ຊື້-ຂາຍ​ລົດ​ເພີ່ມ​ສູງ​ຂຶ້ນທັນຕາ​ເຫັນ​ໃນ​ປະ​ເທດ​ນີ້. ບັດ​ນີ້​ລອງ​ມາ​ເບິ່ງ​ບັນຫາ​ການຈຳ​ແນ​ກຕໍ່​ເພດ​ຍິງ ຢູ່​ປະ​ເທດ​ເນ​ປານ ທັງໆ​ທີ່​ປະ​ເທດ​ນີ້​ມີ​ມາດ​ຕະການ​ທາງ​ກົດໝາຍ​ຫ້າມ​ຈຳ​ແນ​ກ. ປະ​ເພນີ​ທີ່​ຖື​ວ່າ​ເປັນ​ການຈຳ​ແນ​ກ ​ແລະ ກັ່ນ​ແກ້ງ​ຕໍ່​ເພດ​ຍິງ​ຢ່າງ​ຮ້າຍ​ແຮງ​ໃນ​ເນ​ປານ ກໍ​ຄື​ການ​ແຍກ​ປ່ຽວ​ແມ່ຍິງ​ທີ່​ເປັນ​ລະດູ (​ເວລາ​ລະດູ​ມາ) ​ແລະ ​ເວລາ​ອອກ​ລູກ​ໃຫ້​ໄປ​ຢູ່​ຕາມ​ລຳພັງ. ການຈຳ​ແນ​ກດັ່ງກ່າວ​ເອີ້ນ​ເປັນ​ພາສາ​ເນ​ປານ​ວ່າ ຈາວ​ປາ​ດີ (Chhaupadi). ສະຖານ​ທີ່​ທີ່​ແມ່ຍິງ​ທີ່​ຖືກ​ແຍກ​ປ່ຽວ​ຢູ່​ອາ​ໄສ ກໍ​ຄື​ປ່າ ​ແລະ ຄອກ​ສັກ​ທີ່​ນອກຈາກ​ມີ​ສະພາບ​ສົກກະປົກ ​ແລະ ຍັງ​ມີ​ອັນຕະລາຍ​ຮ້ອຍ​ແປດ ​ເຊັ່ນ​ກິ່ນ​ເໝັນ, ​ເຊື້ອພະຍາດ ​ແລະ ສ່ຽງ​ຖືກ​ງູ ​ແລະ ສັດ​ມີ​ພິດ​ກັດ​ຕ່ອຍ. ​ໃນ​ເດືອນ​ກໍລະກົດ​ປີ​ນີ້ ​ເດັກ​ຍິງ​ທີ່​ແຍກ​ປ່ຽວ​ໃຫ້​ຢູ່​ຄອກ​ສັດ​ຖືກ​ງູ​ກັດ​ຕາຍ. ​ໃນ​ຕົວ​ຈິງ​ແລ້ວ ສານ​ເນ​ປານ​ໄດ້​ສັ່ງ​ຫ້າມ​ປະ​ເພນີ​ຈາວ​ປາ​ດີ​ມາ​ໄດ້ 10 ປີ​ແລ້ວ ​ແຕ່​ໃນ​ຕົວ​ຈິງ​ພັດ​ຍັງ​ຢຸດ​ບໍ່​ໄດ້. ຍ້ອນ​ແນວ​ນີ້​ເອງ, ລັດຖະສະພາ​ເນ​ປານ​ຈຶ່ງ​ໄດ້​ຍົກ​ລະດັບ​ການ​ສັ່ງ​ຫ້າມ​ໃຫ້​ກາຍ​ເປັນ​ກົດໝາຍ ຫວ່າງ​ບໍ່​ດົນ​ມາ​ນີ້ ​ເຊິ່ງ​ໄດ້​ກຳນົດ​ໂທດ​ຕໍ່​ຜູ້​ແຍກ​ປ່ຽວ​ແມ່ຍິງ​ດ້ວຍ​ໂທດ​ຈຳ​ຄຸກ 3 ​ເດືອນ ຫລື ປັບ​ໄໝ​ເປັນ​ເງິນ​ຈຳນວນ​ສູງ ຫລື ທັງ​ຈຳ​ຄຸກ​ທັງ​ປັບ. ກໍ​ຕ້ອງ​ລໍ​ຟັງ​ເບິ່ງ​ວ່າການ​ປະຕິບັດ​ກົດໝາຍ​ນີ້​ຈະ​ມີ​ຜົນ​ສັກສິດ​ໜ້ອຍ​ຫລາຍ​ປານ​ໃດ.

- Wave100S AD to Website 2020 0 - ໂອກາດ ແລະ ສິ່ງທ້າທາຍສຳລັບເພດຍິງໃນບາງປະເທດ
- WhatsApp Image 2020 05 27 at 5 - ໂອກາດ ແລະ ສິ່ງທ້າທາຍສຳລັບເພດຍິງໃນບາງປະເທດ
- WhatsApp Image 2020 05 27 at 5 - ໂອກາດ ແລະ ສິ່ງທ້າທາຍສຳລັບເພດຍິງໃນບາງປະເທດ
error: Alert: ເນື້ອຫາຂ່າວມີລິຂະສິດ !!