ເປີດງານວາງສະແດງມູນເຊື້ອສາຍພົວພັນມິດຕະພາບ ລາວ-ຫວຽດນາມ

ພິທີເປີດງານວາງສະແດງມູນເຊື້ອສາຍພົວພັນມິດຕະພາບ ລາວ-ຫວຽດນາມ ໄດ້ມີຂຶ້ນໃນວັນທີ 30 ຕຸລານີ້ ທີ່ຫໍພິພິຕະພັນໄກສອນ ພົມວິຫານ ໂດຍຫ້ອງວ່າການສູນກາງພັກ ລາວ-ຫວຽດນາມ ເປັນຜູ້ຈັດຂຶ້ນ ພາຍໃຕ້ຫົວຂໍ້: “ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ” ໂດຍການເຂົ້າຮ່ວມຂອງທ່ານ ຄຳຜາ ພິມມະສອນ ຮອງຫົວໜ້າຫ້ອງວ່າການສູນກາງພັກປະຊາຊົນປະຕິວັດລາວ ແລະ ທ່ານ ບູຍວັນແທັດ ຮອງຫົວໜ້າສູນກາງພັກກອມມູນິດຫວຽດນາມ, ມີທ່ານ ສົມສະຫວາດ ເລັ່ງສະຫວັດ ອະດີດຄະນະກຳມາທິການຮ່ວມມື ລາວ-ຫວຽດນາມ ແລະ ບັນດາການນຳຂັ້ນສູງຈາກກະຊວງ ແລະ ອົງການອ້ອມຂ້າງສູນກາງພັກເຂົ້າຮ່ວມນຳດ້ວຍ.
ງານວາງສະແດງດັ່ງກ່າວເປັນການບົ່ງບອກໃຫ້ສື່ມວນຊົນທັງພາຍໃນ ແລະ ຕ່າງປະເທດໄດ້ຮູ້ເຖິງປະຫວັດສາດແຫ່ງສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບ ດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃນຂະບວນວິວັດແຫ່ງການຕໍ່ສູ້ເພື່ອເອກະລາດ, ອິດສະຫລະພາບຂອງສອງປະເທດຜ່ານແຕ່ລະໄລຍະປະຫວັດສາດທີ່ລະອິດລະອ້ຽວ ໂດຍສະເພາະຂະບວນວິວັດແຫ່ງການຕໍ່ສູ້ເພື່ອປົດປ່ອຍຊາດ, ຍາດເອົາຄວາມເປັນເອກະລາດ ແລະ ອິດສະຫລະພາບ ກ້າວເຖິງໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ດ້ວຍໄຊຊະນະອັນສະຫງ່າລາສີ, ໄດ້ກາຍມາເປັນສາຍພົວພັນມິດຕະພາບ ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ເຊິ່ງໃນໂລກບໍ່ເຄີຍມີມາກ່ອນ.
ງານວາງສະແດງໄດ້ສະເໜີເຖິງປັດໄຈຕ່າງໆທີ່ເປັນພື້ນຖານສ້າງສາຍພົວພັນແບບພິເສດ, ຮ່ວມສຳພັນສູ້ຮົບ ລາວ-ຫວຽດນາມ ແລະ ພິເສດແມ່ນບົດບາດຂອງປະທານ ໂຮ່ຈີມິງ, ປະທານໄກສອນ ພົມວິຫານ, ປະທານ ສຸພານຸວົງ ແລະ ບັນດາຜູ້ນຳການປະຕິວັດຂອງສອງພັກ, ສອງລັດ, ນັກຮົບວິລະຊົນ, ທະຫານ-ຕຳຫລວດ ແລະ ປະຊາຊົນຮຸ່ນຄົນຕ່າງໆຂອງສອງປະເທດໄດ້ເປັນຜູ້ສ້າງ ແລະ ປົກປັກຮັກສາຕະຫລອດມາ ແລະ ໄດ້ກາຍເປັນມູນມໍລະດົກຕົກທອດອັນລ້ຳຄ່າຂອງສອງຊາດຕະຫລອດມາ.