ອິດສະລາແອນລະເບີດທຳລາຍອຸໂມງຮາມັດ
ກອງທັບອິດສະລາແອນລະເບີດທຳລາຍອຸໂມງທີ່ສະມາຊິກກຸ່ມຮາມັດຂຸດຈາກເຂດກາຊາ ເປັນເຫດໃຫ້ມີຜູ້ເສຍຊີວິດຢ່າງໜ້ອຍ 7 ຄົນ.
ສຳນັກຂ່າວຕ່າງປະເທດລາຍງານຈາກນະຄອນຫລວງເຢຣູຊາເລມ ປະເທດອິດສະລາແອນ ໃນວັນທີ 31 ຕຸລາວ່າ: ກອງທັບອິດສະລາແອນອອກຖະແຫລງການໃນວັນທີ 30 ຕຸລາວ່າ: ໄດ້ລະເບີດທຳລາຍອຸໂມງແຫ່ງໜຶ່ງ ເຊິ່ງຢູ່ຫ່າງຈາກບ້ານຄິສຊູຟູມ ປະມານ 2 ກິໂລແມັດ ແລະ ເຊື່ອວ່າຕົ້ນທາງຂອງການຂຸດອຸໂມງມາຈາກເຂດກາຊາ. ທັງນີ້ ລາຍງານຂອງກອງທັບອິດສະລາແອນບໍ່ໄດ້ລະບຸວ່າມີການຄົ້ນພົບອຸໂມງແຫ່ງນີ້ຕອນໃດ, ແຕ່ຜົນຈາກການລະເບີດອຸໂມງຂ້າຊີວິດ “ຜູ້ກໍ່ການຮ້າຍ” ຢ່າງໜ້ອຍ 7 ຄົນ.
The IDF neutralized a Gazan terror tunnel today. This is what you need to know: pic.twitter.com/P47nhO2WGO
— Israel Defense Forces (@IDF) October 30, 2017
ຂະນະທີ່ກະຊວງສາທາລະນະສຸກຂອງເຂດກາຊາ ເຊິ່ງຢູ່ພາຍໃຕ້ການປົກຄອງຂອງກຸ່ມຮາມັດ ຢືນຢັນວ່າ: ເຫດການດັ່ງກ່າວເປັນຄວາມຈິງ ແລະ ຜູ້ເສຍຊີວິດ 2 ຄົນ ເປັນສະມາຊິກກຸ່ມເອສຊາດິນ ອັດ ກັດເຊັມ ເຊິ່ງເປັນກອງກຳລັງຫລັກຂອງກຸ່ມຮາມັດ, ສ່ວນທີ່ເຫລືອອີກ 5 ຄົນເປັນນັກຮົບສັງກັດກອງກຳລັງກຸ່ມຍ່ອຍ. ສ່ວນກຸ່ມຮາມັດອອກຖະແຫລງການປະນາມເຫດການທີ່ເກີດຂຶ້ນຢ່າງໜັກ, ແຕ່ຍັງຮັກສາທ່າທີກ່ຽວກັບ “ມາດຕະການຕອບໂຕ້”.
ທັງນີ້, ການຄົ້ນພົບອຸໂມງລັກສະນະນີ້ບໍ່ຄ່ອຍເກີດຂຶ້ນ ນັບແຕ່ສິ້ນສຸດສົງຄາມຢູ່ເຂດກາຊາ ທີ່ເປັນການສູ້ຮົບຢ່າງດຸເດືອດລະຫວ່າງກອງທັບອິດສະລາແອນກັບກຸ່ມຮາມັດ ໃນປີ 2014 ໂດຍການຄົ້ນພົບ ແລະ ທຳລາຍອຸໂມງຄັ້ງຫລ້າສຸດກ່ອນໜ້ານີ້ເກີດຂຶ້ນໃນເດືອນເມສາປີຜ່ານມາ. ນອກຈາກນີ້ ເຫດການຍັງເກີດຂຶ້ນໃນໄລຍະທີ່ລັດຖະບານປາແລັສຕິດ ແລະ ກຸ່ມຮາມັດພະຍາຍາມປະຕິບັດຕາມຂໍ້ຕົກລົງປານີປານອມທີ່ລົງນາມຮ່ວມກັນໃນຕົ້ນເດືອນນີ້ ເພື່ອຫລຸດຜ່ອນຄວາມຂັດແຍ່ງທີ່ຍືດເຍື້ອມາເຖິງ 1 ທົດສະວັດ.
