ການປະຕິບັດພັນທະການເງິນຂອງບໍລິສັດບໍ່ແຮ່ຍັງໜ້ອຍ
ທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ຄໍາມະນີ ອິນທິລາດ ໃຫ້ຮູ້ວ່າ: ມາຮອດປັດຈຸບັນ, ລັດຖະບານໄດ້ອະນຸມັດໃຫ້ບໍລິສັດລົງທຶນດ້ານບໍ່ແຮ່ດຳເນີນການຂຸດຄົ້ນ, ຜະລິດ ແລະ ຈຳໜ່າຍມີ 81 ບໍລິສັດ. ໃນນັ້ນ 20 ບໍລິສັດຢູ່ໃນໄລຍະກໍ່ສ້າງບໍ່ແຮ່ ແລະ ໂຮງງານ, 61 ບໍລິສັດຢູ່ໃນໄລຍະຂຸດຄົ້ນ, ຜະລິດ ແລະ ຈຳໜ່າຍ ແລະ ໃນຈຳນວນ 61 ບໍລິສັດນີ້ມີ 13 ບໍລິສັດໄດ້ຂໍໂຈະການດຳເນີນກິດຈະການຊົ່ວຄາວເນື່ອງຈາກລາຄາແຮ່ທາດຕົກຕໍ່າ, 9 ບໍລິສັດບໍ່ມີການເຄື່ອນໄຫວ, 6 ບໍລິສັດສະໜອງວັດຖຸດິບໃຫ້ໂຮງງານຊີມັງ ແລະ ໂຮງງານພະລັງງານໄຟຟ້າຄວາມຮ້ອນ ແລະ 33 ບໍລິສັດຢູ່ໃນໄລຍະຂຸດຄົ້ນ, ຜະລິດ ແລະ ຈຳໜ່າຍ, ເຊິ່ງສ່ວນຫລາຍເປັນບໍລິສັດຂະໜາດນ້ອຍ ແລະ ບໍລິສັດຂະໜາດໃຫຍ່ທີ່ສ້າງລາຍຮັບຕົ້ນຕໍໃຫ້ລັດມີພຽງ 2 ບໍລິສັດເທົ່ານັ້ນຄື: ບໍລິສັດລ້ານຊ້າງມິເນໂຣນຈຳກັດ ແລະ ບໍລິສັດພູເບ້ຍມາຍນິງຈຳກັດ ແລະ ການສົ່ງອອກແຮ່ທາດທີ່ມີຄຸນຄ່າສູງກໍໄດ້ແກ່ຄຳປະສົມເງິນ, ທອງເຂັ້ມຂຸ້ນ ແລະ ທອງແຜ່ນຄື: ໃນ 10 ປີຜ່ານມາ, ບັນດາບໍລິສັດແຮ່ທາດສາມາດປະຕິບັດພັນທະດ້ານການເງິນໃຫ້ລັດໄດ້ປະມານ 1,89 ຕື້ໂດລາສະຫະລັດ ແລະ ສຳລັບສົກປີ 2015-2016 ລາຍຮັບລັດຖະບານຈາກທາງກົງ ແລະ ທາງອ້ອມໄດ້ຈາກຂະແໜງບໍ່ແຮ່ມີພຽງ 136 ລ້ານກວ່າໂດລາສະຫະລັດ, ຊຶ່ງປະກອບມີຄ່າຊັບພະຍາກອນ, ຄ່າສຳປະທານ, ທຶນຄຸ້ມຄອງໂຄງການ ແລະ ເຝິກອົບຮົມ ແລະ ອາກອນຕ່າງໆເຊັ່ນ: ອາກອນກໍາໄລ, ອາກອນເງິນເດືອນ, ເງິນປັນຜົນ, ອາກອນມູນຄ່າເພີ່ມ, ອາກອນຂຸດຄົ້ນ, ອາກອນຊົມໃຊ້, ອາກອນຂົນສົ່ງ, ອາກອນສົ່ງອອກ ແລະ ພັນທະອື່ນໆ. ສຳລັບປີ 2017 ນີ້, ລາຍຮັບຈາກຂະແໜງແຮ່ທາດຍັງຈະສືບຕໍ່ຫລຸດລົງຕື່ມອີກ, ຍ້ອນວ່າ 2 ໂຄງການໃຫຍ່ພວມ ເຂົ້າສູ່ໄລຍະທ້າຍຂອງການຂຸດຄົ້ນ ແລະ ກ້າວສູ່ການປິດບໍ່ແຮ່ໃນລະຫວ່າງປີ 2020-2021, ຂະນະດຽວກັນລາຄາແຮ່ທາດໃນຕະຫລາດໂລກກໍບໍ່ມີທ່າອ່ຽງຈະສູງຂຶ້ນ.
ທ່ານລັດຖະມົນຕີກະຊວງດັ່ງກ່າວ ໃຫ້ຮູ້ວ່າ: ການປະຕິບັດພັນທະການເງິນຂອງບໍລິສັດລົງທຶນດ້ານບໍ່ແຮ່ທີ່ທ້ອງຖິ່ນອອກອະນຸຍາດແມ່ນຍັງບໍ່ທັນສາມາດປະຕິບັດໄດ້ຢ່າງຖືກຕ້ອງ ແລະ ຄົບຖ້ວນ, ເຊິ່ງຈະຕ້ອງໄດ້ສືບຕໍ່ກວດກາຢ່າງລະອຽດ. ໃນຈຳນວນ 443 ບໍລິສັດທີ່ທ້ອງຖິ່ນອະນຸຍາດໃຫ້ລົງທຶນດ້ານບໍ່ແຮ່ ສາມາດປະຕິບັດພັນທະການເງິນເຂົ້າງົບປະມານແຂວງໄດ້ພຽງ 9.390 ລ້ານກວ່າກີບ, ສະເລ່ຍແລ້ວບໍລິສັດໜຶ່ງປະຕິບັດພັນທະຕໍ່ລັດ, ແຂວງ, ນະຄອນຫລວງມີແຕ່ 21 ລ້ານກີບຕໍ່ປີ ແລະ ປັດຈຸບັນ, ໜີ້ຄ້າງຊຳລະຂອງບໍລິສັດລົງ ທຶນດ້ານບໍ່ແຮ່ທີ່ສູນກາງອະນຸຍາດ ເປັນຕົ້ນ: ຄ່າສຳປະທານ, ຄ່າຊັບພະຍາກອນ ແລະ ພັນທະກອງທຶນມີປະມານ 25 ລ້ານໂດລາສະຫະລັດ. ນອກນັ້ນ ຍັງມີໜີ້ຄ້າງຈາກອາກອນຕ່າງໆຕາມຕົວເລກທີ່ກົມກ່ຽວຂ້ອງຂອງກະຊວງການເງິນແຈ້ງໃຫ້ຮູ້ມີປະມານ 23 ລ້ານໂດລາສະຫະລັດ, ເຊິ່ງກະຊວງການເງິນ ແລະ ກະຊວງກ່ຽວຂ້ອງຈະປະສານກັນເພື່ອເລັ່ງເກັບກູ້ໜີ້ສິນດັ່ງກ່າວໃຫ້ໄດ້ໂດຍໄວ ແລະ ຖ້າບໍລິສັດໃດບໍ່ປະຕິບັດຕາມຂັ້ນຕອນການແຈ້ງເຕືອນແລ້ວແມ່ນຈະດໍາເນີນການຮ້ອງຟ້ອງຕາມລະບຽບກົດໝາຍ.
