ວາງສະແດງໜ້າກາກສາກົນອິມາໂກທີ່ວຽງຈັນ

- advert banner 728 90 728x90 - ວາງສະແດງໜ້າກາກສາກົນອິມາໂກທີ່ວຽງຈັນ

ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວຮ່ວມກັບກະຊວງວັດທະນະທຳ, ກິລາ ແລະ ທ່ອງທ່ຽວ ສ.ເກົາຫລີ, ໄດ້ຈັດກອງປະຊຸມສິລະປະວັດທະນະທຳໜ້າກາກສາກົນອິມາໂກ (IMACO) ຄັ້ງທີ 6 ແລະ ງານວາງສະແດງໜ້າກາກຈາກ 21 ປະເທດ, ໃນນີ້ ສປປ ລາວ ໄດ້ນໍາເອົາໜ້າກາກປູ່ເຍີ່-ຍ່າເຍີ່, ພະລັກ-ພະລາມ ທີ່ເປັນລັກສະນະຂອງຊາດເຂົ້າຮ່ວມວາງສະແດງ ແລະ ໄດ້ຮັບຄວາມສົນໃຈຈາກແຂກທີ່ເຂົ້າຮ່ວມງານຢ່າງຫລວງຫລາຍ.ກອງປະຊຸມດັ່ງກ່າວ, ຈັດຂຶ້ນໃນວັນທີ 1 ພະຈິກນີ້, ທີ່ນະຄອນຫລວງວຽງຈັນ, ເພື່ອຮີບໂຮມບັນດາສິລະປະໜ້າກາກຂອງໂລກ ແລະ ເຜີຍແຜ່ວັດທະນະທຳທີ່ສະແດງອອກຜ່ານເອກະລັກທາງດ້ານຮີດຄອງປະເພນີຕ່າງໆຂອງຕົນ, ໂດຍການເປັນປະທານຂອງທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ຍັງແຊ ເກວອນ ປະທານອົງການອິມາໂກ, ມີບັນດາຮອງລັດຖະມົນຕີ, ຜູ້ຕາງໜ້າຈາກສະມາຊິກອົງການ ອີມາໂກເຂົ້າຮ່ວມຢ່າງພ້ອມພຽງ.
ທ່ານ ບໍ່ແສງຄຳ ວົງດາລາ ກ່າວວ່າ: ດັ່ງຮູ້ແລ້ວວ່າປະຊາຊາດຕ່າງໆ ລ້ວນແຕ່ມີຄວາມອຸດົມສົມ ບູນທາງດ້ານວັດທະນະທໍາ, ເຊິ່ງສະແດງອອກຜ່ານເອກະລັກ ທາງດ້ານຮີດຄອງປະເພນີຕ່າງໆຂອງຕົນ, ອັນໄດ້ກາຍເປັນຫລາຍຮູບແບບ ທາງດ້ານວັດທະນະທໍາຂອງໂລກ, ໂດຍສະເພາະສິລະປະວັດທະນະທໍາໜ້າກາກ ກໍເປັນໜຶ່ງໃນບັນດາຄວາມອຸດົມສົມບູນດັ່ງກ່າວ. ດັ່ງນັ້ນ, ການຈັດກອງປະຊຸມສີລະປະວັດທະນະທໍາໜ້າກາກສາກົນ ຄັ້ງທີ 6 ຢູ່ ສປປ ລາວ ໄດ້ເປັນການເຕົ້າໂຮມບັນດາສິລະປະໜ້າກາກຂອງໂລກ ເພື່ອສະແດງໃຫ້ເຫັນວິວັດທະນາການ ຂອງມວນມະນຸດຫລາຍຍຸກສະໄໝ ໃນການສະແດງອອກທາງວັດທະນະທໍາໜ້າກາກຂອງຕົນເອງ, ພ້ອມທັງເປັນການອະນຸຮັກ ປົກປັກຮັກສາຄຸນຄ່າຂອງສິລະປະເຫລົ່ານີ້ໃຫ້ຍືນຍົງ ປະກອບສ່ວນສ້າງຄວາມເຂົ້າອົກເຂົ້າໃຈ ເຊິ່ງກັນ ແລະ ກັນ ລະຫວ່າງປະຊາຊາດໃນໂລກ.
ຜູ້ເຂົ້າຮ່ວມກອງປະຊຸມດັ່ງກ່າວ, ຍັງໄດ້ຊົມການສະແດງສິລະປະໜ້າກາກ ສ.ເກົາຫລີ ແລະ ການສະແດງໂຂນໂຮງຮຽນສິລະປະແຫ່ງຊາດ. ພ້ອມນີ້, ຍັງມີການວາງສະແດງໜ້າກາກຈາກ 21 ປະເທດ ຄື: ສປປ ລາວ, ສ.ເກົາຫລີ, ສປຈີນ, ອິນໂດເນເຊຍ, ອາເມລິກາ, ໄທ, ຟີລິປີນ ແລະ ອື່ນໆ. ສໍາລັບ ສປປ ລາວ ກໍໄດ້ນໍາເອົາໜ້າກາກປູ່ເຍີ່-ຍ່າເຍີ່, ພະລັກ-ພະລາມ ທີ່ເປັນລັກສະນະຊາດເຂົ້າຮ່ວມວາງສະແດງ ແລະ ກໍໄດ້ຮັບຄວາມສົນໃຈຈາກແຂກທີ່ເຂົ້າຮ່ວມງານຢ່າງຫລວງຫລາຍ.

- new3 - ວາງສະແດງໜ້າກາກສາກົນອິມາໂກທີ່ວຽງຈັນ
error: Content is protected !!