ສະພາຮັບຮອງເອົາກົດໝາຍວ່າດ້ວຍການຈັດຊື້-ຈັດຈ້າງດ້ວຍທຶນຂອງລັ
ວັນທີ 2 ພະຈິກນີ້, ກອງປະຊຸມສະພາສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII, ໂດຍການເປັນປະທານຂອງທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ, ໄດ້ເປັນເອກະພາບຮັບຮອງເອົາກົດ ໝາຍວ່າດ້ວຍການຈັດຊື້-ຈັດຈ້າງດ້ວຍທຶນຂອງລັດ, ທີ່ປະກອບມີ 11 ພາກ, 15 ໝວດ ແລະ 90 ມາດຕາ, ດ້ວຍຄະແນນສຽງສ່ວນຫລາຍ.
ທ່ານ ສົມດີ ດວງດີ ລັດຖະມົນຕີກະຊວງການເງິນ ໄດ້ຂຶ້ນສະເໜີເຫດຜົນ ແລະ ຄວາມຈຳເປັນຂອງການສ້າງຮ່າງກົດໝາຍດັ່ງກ່າວຕໍ່ທີ່ປະຊຸມວ່າ: ເພື່ອແນໃສ່ເຮັດໃຫ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນແຕ່ລະໄລຍະໃຫ້ມີປະສິດທິຜົນ ແລະ ເຂັ້ມງວດໃນການປະຕິບັດລັດຖະທຳມະນູນ, ກົດໝາຍ ແລະ ນິຕິກຳຕ່າງໆທີ່ກ່ຽວຂ້ອງ, ແກ້ໄຂບັນຫາທີ່ບໍ່ສາມາດຈັດຕັ້ງປະຕິບັດໄດ້ໃນໄລຍະຜ່ານມາ, ພ້ອມທັງປັບປຸງລະບົບຈັດຊື້-ຈັດຈ້າງດ້ວຍທຶນຂອງລັດໃຫ້ມີປະສິດທິພາບ ແລະ ປະສິດທິຜົນສູງ, ປະຢັດ, ໂປ່ງໃສ ແລະ ຍຸຕິທຳ, ສາມາດປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ, ໂດຍລວມແລ້ວ ການຄົ້ນຄວ້າສ້າງຮ່າງກົດໝາຍດັ່ງກ່າວນີ້, ເນື້ອໃນຫລັກແມ່ນບົນພື້ນຖານການປັບປຸງຈາກເນື້ອໃນຂອງດຳລັດວ່າດ້ວຍການຈັດຊື້-ຈັດຈ້າງສິນຄ້າ, ການກໍ່ສ້າງ-ສ້ອມແປງ ແລະ ການບໍລິການດ້ວຍທຶນຂອງລັດ (ສະບັບປັບປຸງ), ໂດຍໄດ້ປ່ຽນແທນຊື່ຈາກດຳລັດດັ່ງກ່າວມາເປັນກົດໝາຍວ່າດ້ວຍການຈັດຊື້-ຈັດຈ້າງດ້ວຍທຶນຂອງລັດ ເພື່ອໃຫ້ກະທັດຮັດ ແລະ ສອດຄ່ອງກັບຫລາຍປະເທດ, ມີຄວາມຈະແຈ້ງ, ຄົບຖ້ວນ ແລະ ຮັດກຸມ, ພ້ອມນັ້ນ ໄດ້ປັບປຸງດ້ານໂຄງສ້າງໃຫ້ສອດຄ່ອງກັບກົດໝາຍວ່າດ້ວຍການສ້າງນິຕິກຳອື່ນໆ.
ແນວໃດກໍຕາມ ເມື່ອກົດໝາຍດັ່ງກ່າວ ຖືກປະກາດໃຊ້ຢ່າງເປັນການແລ້ວ ຈະເປັນບ່ອນອີງທີ່ໜັກແໜ້ນໃຫ້ແກ່ການຄຸ້ມຄອງ ແລະ ຕິດຕາມກວດກາການ ຈັດຕັ້ງປະຕິບັດວຽກງານຈັດຊື້-ຈັດຈ້າງດ້ວຍທຶນຂອງລັດ ໃຫ້ມີປະສິດທິຜົນ ແລະ ມີປະສິດທິພາບສູງຂຶ້ນ, ມີຄວາມໂປ່ງໃສ ແລະ ຍຸຕິທຳ; ການຄຸ້ມຄອງ ແລະ ການນຳໃຊ້ງົບປະມານຂອງລັດ ລວມທັງທຶນຈາກການກູ້ຢືມ ແລະ ຊ່ວຍເຫລືອລ້າເຂົ້າໃນການຈັດຊື້-ຈັດຈ້າງ ມີປະສິດທິຜົນກວ່າເກົ່າ; ເຮັດໃຫ້ອົງການຈັດຕັ້ງລັດຂັ້ນສູນກາງ, ຂັ້ນທ້ອງຖິ່ນ ແລະ ລັດວິສາຫະກິດເຂົ້າໃຈເຖິງຄວາມສຳຄັນໃນການຄຸ້ມຄອງວຽກງານຈັດຊື້-ຈັດຈ້າງດ້ວຍທຶນຂອງລັດ ດ້ວຍກົດໝາຍຫລາຍຂຶ້ນ, ພ້ອມນີ້ ການກຳນົດແຜນງານ ແລະ ໂຄງການຂອງອົງການຈັດຕັ້ງລັດຂັ້ນສູນກາງ, ຂັ້ນທ້ອງຖິ່ນ ແລະ ລັດວິສາຫະກິດສອດຄ່ອງກັບເປົ້າໝາຍ ແລະ ຂອບເຂດຂອງການນຳໃຊ້ທຶນຂອງລັດ, ຊຶ່ງຈະເຮັດໃຫ້ມີຄວາມສະດວກໃນການຄຸ້ມຄອງ, ກວດກາ ແລະ ຕິດຕາມວຽກງານດັ່ງກ່າວ, ພ້ອມທັງສ້າງຄວາມເຊື່ອໝັ້ນໃຫ້ແກ່ນັກລົງທຶນທັງພາຍໃນ ແລະ ຕ່າງປະເທດກ່ຽວກັບວຽກງານຈັດຊື້-ຈັດຈ້າງດ້ວຍທຶນຂອງລັດນຳອີກ.
