ທີເດັດ…! ໃນກອງປະຊຸມສະພາ

ໂດຍ: ທິດ​ກໍ່າ

ດັ່ງ​ຜູ້​ຂຽນ​ໄດ້​ເວົ້າມາ​ໃນ​ຫລາຍ​ບົດ​ແລ້ວ​ວ່າ, ກອງ​ປະຊຸມ​ສະ​ໄໝ​ທີ 4 ຂອງ​ສະພາ​ແຫ່ງ​ຊາດ​ຊຸດ​ທີ 8 ​ໄດ້​ມີ​ຫລາຍ​ອັນ​ຫລາຍ​ຢ່າງ​ມີ​ທີ​ເດັດ, ບໍ່​ວ່າ​ໃນ​ເລື່ອງ​ການ​ລາຍ​ງານ, ການສະ​ເໜີ​ບັນຫາ​ຕ່າງໆ​ຂອງ​ຜູ້​ເປັນ​ເຈົ້າວຽກ​ເຈົ້າງານ ​ແລະ ການ​ປະກອບ​ຄຳ​ຄິດ​ຄຳ​ເຫັນ​ຂອງ​ບັນດາ​ຜູ້​ແທນ​ໃນ​ສະພາ. ໜຶ່ງ​ໃນ​ບັນຫາ​ທີ່​ກ່າວ​ມາ​ນີ້​ກໍ​ແມ່ນ “ຜູ້​ແທນ​ຖາມ ທ່ານ​ນາຍົກ​ລັດຖະມົນຕີ​ຜູ້​ຕ້ອບ” ຜູ້​ຂຽນ​ຂໍ​ຍົກ​ເອົາບາງ​ຂໍ້​ຊັກ​ຖາມ ​ແລະ ຄຳ​ຕອບ​ມາສະ​ເໜີ​ສູ່​ກັນ​ຟັງ​ດັ່ງ​ນີ້: ຜູ້​ແທນ​ຖາມ: ​ເພື່ອ​ຮັບປະກັນ​ໃຫ້​ແກ່​ການ​ບໍລິຫານ​ລັດ​ໃນ​ທຸກຂະ​ແໜງ​ການ, ອົງການ​ປົກຄອງ​ມີ​ຄຸນ​ນະພາ​ບ ​ແລະ ມີ​ປະສິດທິ​ຜົນ, ສ້າງ​ເງື່ອນ​ໄຂ​ໃຫ້​ແກ່​ປະຊາຊົນ ​ແລະ ຜູ້​ປະກອບ​ການ​ເຂົ້າ​ເຖິງ​ການ​ບໍລິຫານ​ລັດ​ຢ່າງ​ສະດວກ​ວ່ອງ​ໄວ, ຍຸຕິ​ທຳ ​ແລະ ຖືກຕ້ອງ​ຕາມ​ກົດໝາຍ, ລັດຖະບານ​ຈະ​ມີ​ທິດ​ຊີ້​ນຳ ​ແລະ ມາດ​ຕະການ​ແກ້​ໄຂ​ກ່ຽວ​ກັບ​ປາກົດການ​ຫຍໍ້​ທໍ້​ການ​ບໍລິຫານ​ລັດ​ໃນ​ກົງຈັກ​ລັດ​ແຕ່ລະ​ຂັ້ນຄື​ແນວ​ໃດ ? ​ໃນ​ນັ້ນຈະ​ພິຈາລະນາ​ເຖິງ​ຄວາມ​ຮັບຜິດຊອບ​ຂອງ​ຜູ້​ເປັນ​ຫົວໜ້າ​ຂອງ​ທຸກຂະ​ແໜງ​ການ ​ແລະ ອົງການ​ປົກຄອງ​ທີ່​ຍັງ​ເລີ້ນ​ເລີ້​ໃນ​ບໍລິຫານ​ລັດ​ຂອງ​ຕົນ​ຄື​ແນວ​ໃດ ? ທ່ານ​ນາຍົກ​ຕອບ: ຄຳ​ສົນ​ໃຈ​ຂອງ​ສະມາຊິກ​ສະພາ​ແຫ່ງ​ຊາດ​ຕໍ່​ກັບ​ຄຸນ​ນະພາ​ບ ​ແລະ ປະສິດທິ​ຜົນ​ຂອງ​ອົງການ​ບໍລິຫານ​ລັດ​ຂອງ​ພວກ​ເຮົາ​ໃນ​ປັດຈຸບັນ ​ເປັນ​ຄຳ​ສົນ​ໃຈ​ທີ່​ດີ ​ແລະ ສະ​ແດງ​ອອກ​ເຖິງ​ຄວາມ​ຮັບຜິດຊອບ​ທາງ​ການ​ເມືອງ​ຂອງ​ສະມາຊິກ​ພັກ, ພະນັກງານ​ໃນ​ແຕ່ລະ​ຂັ້ນ ຕະຫລອດ​ເຖິງ​ປະຊາຊົນ, ຜູ້​ປະກອບ​ການ, ນັກທຸລະກິດ​ລະດັບ​ຕ່າງໆ​ຂອງ​ທົ່ວ​ສັງຄົມ​ເຮົາ. ນະ​ໂຍບາຍ​ຂອງ​ພັກ ​ໂດຍ​ສະ​ເພາະ​ມະຕິ 10 ກໍ​ສືບ​ຕໍ່​ຖື​ເອົາ​ບັນຫາ​ນີ້​ເປັນ 1 ​ໃນ 4 ບຸກທະລຸ, ລັດຖະບານ​ຊຸດ​ນີ້​ຈຶ່ງ​ຖື​ສຳຄັນ​ການ​ປັບປຸງ​ກົງຈັກ​ຂອງລັ​ດ​ໃຫ້​ກະທັດ​ຮັດ​ທາງ​ດ້ານ​ການຈັດຕັ້ງ, ​ແບ່ງ​ຄວາມ​ຮັບຜິດຊອບ ​ແລະ ມອບ​ສິດ​ອຳນາດ​ໃຫ້​ກົງຈັກ​ແຕ່​ສູນ​ກາງ​ລົງ​ຮອດ​ທ້ອງ​ຖິ່ນ ​ເພື່​ອ​ໃຫ້​ປະຕິບັດ​ໜ້າ​ທີ່​ດ້ວຍ​ຄວາມ​ເປັ​ນ​ເຈົ້າ, ​ແກ້​ໄຂ​ບັນຫາ​ຂອງ​ຕົນ​ດ້ວຍ​ຄວາມ​ຮັບຜິດຊອບ​ສູງ​ຂຶ້ນ, ບໍ່​ໃຫ້​ເອື່ອຍ​ອີງ, ບໍ່​ຖິ້ມພຸ້ນ​ຖິ້ມພີ້ ລວມທັງ​ບັນຊາ, ອຳນວຍ​ຄວບ​ຄຸມ​ວຽກ​ຂອງ​ຕົນ​ທີ່​ຖືກ​ມອບ​ໝາຍ​ດ້ວຍ​ຄວາມ​ເປັນ​ເຈົ້າຢ່າງ​ແທ້​ຈິງ, ມອບ​ສິດ​ໃຫ້​ປັບປຸງ​ກົງຈັກ​ຕົນ​ເອງ ​ເພາະ​ເປັນ​ຜູ້​ບັງຄັບ​ບັນຊາ ຫລືວ່າ ການ​ນຳ​ຂະ​ແໜງ​ການ​ນັ້ນ, ທ້ອງ​ຖິ່ນ​ນັ້ນ​ເທົ່າ​ນັ້ນຈະ​ເປັນ​ຜູ້​ຮູ້​ດີກ​ວ່າ​ຜູ້​ອື່ນ ທັງ​ວຽກ​ທັງ​ຄົນ​ທີ່​ຕົນ​ນຳ​ໃຊ້​ຢູ່​ນັ້ນຈະ​ປະຕິ​ເສດ​ບໍ່​ໄດ້.

ລັດຖະບານ​ໄດ້​ຕິດຕາມ​ກວດກາ, ຊີ້​ນຳ​ໃກ້ຊິດ ​ແລະ ​ໄດ້​ອອກ​ມະຕິ​ຄຳ​ສັ່ງ ທັງ​ການ​ໃຊ້​ບັນດາ​ກົງຈັກ​ຕິດຕາມ​ກວດກາ​ການ​ປະຕິບັດ​ໜ້າ​ທີ່​ຂອງ​ຂະ​ແໜງ​ການ, ທ້ອງ​ຖິ່ນ​ຢ່າງ​ເປັນ​ປະຈຳ ຈຶ່ງ​ຍັງ​ເຫັນ​ມີ​ຫລາຍ​ຈຸດ​ອ່ອນ, ຂໍ້ຄົງຄ້າງ, ບໍ່​ທັນ​ບຸກທະລຸ​ໄດ້ ​ເຊິ່ງສັງ​ລວມ​ໄດ້​ຄື ກົງຈັກ​ຍັງ​ເກະ​ກະ, ບໍ່​ກະທັດ​ລັດ​ຮັດກຸມ, ຄົນ​ໃນ​ກົງຈັກ​ຍັງ​ສືບ​ຕໍ່​ເຮັດ​ວຽກ​ຕາມ​ຄວາມ​ຊິ​ນ​ເຄີຍ​ເກົ່າ, ຄວາມ​ຮັບຜິດຊອບ​ບໍ່​ທັນ​ສູງ, ອາດຍາ​ສິດ, ຫ່າງ​ເຫີ​ນມະຫາຊົນ, ຫ່າງ​ເຫີ​ນຄວາມ​ເປັນ​ຈິງ, ບໍ່​ຕັ້ງໜ້າ​ແກ້​ບັນຫາ, ຍັງ​ຈົມ​ຢູ່​ໃນ​ວົງ​ຈອນ​ແຫ່ງ​ການ​ສວຍ​ໃຊ້​ຖານະ​ຕຳ​ແໜ່​ງ, ວົງວຽນ​ນຳ​ການ​ສໍ້​ລາດ​ບັງ​ຫລວງ, ສະ​ແຫວ​ງຫາ​ຜົນ​ປະ​ໂຫຍ​ດ ຍ້ອນ​ວ່າ​ກົງຈັກ​ຫລາຍ​ບ່ອນ, ຫລາຍ​ອົງ​ກອນ​ຍັງ​ບໍ່​ທັນ​ຫລຸດ​ອອກ​ຈາກ​ວົງ​ຈອນ​ດັ່ງກ່າວ ຈຶ່ງ​ໄປ​ກະທົບ​ເຖິງ​ວຽກ​ງານ​ບໍລິການ​ຊັກ​ຊ້າ, ​ແກ່ຍາວ​ຂາດ​ປະສິດທິ​ຜົນ, ປະສິດທິພາບ​ຕໍ່າ, ຍັງ​ເປັນ​ລັກສະນະ​ທົ່ວ​ໄປ ​ແລະ ​ແຜ່​ລາມ​ກວ້າງຂວາງ. ທ່ານ​ນາຍົກລັດຖະມົນຕີ​ຍັງ​ໄດ້​ເນັ້ນຕື່ມ​ຢ່າງ​ເດັດຂາດ​ວ່າ: ຂັ້ນຕໍ່​ໄປ​ເພື່ອ​ປັບປຸງ​ເຮັດ​ໃຫ້​ກົງຈັກ​ສືບ​ຕໍ່​ປອດ​ໃສ, ມີ​ປະສິດທິພາບ ລັດຖະບານ​ກໍ​ໄດ້​ມີ​ກົນ​ໄກ​ກວດກາ​ເປັນ​ປະຈຳ. ພວກ​ເຮົາ​​ໃນ​ການ​ນຳ​ເວົ້າ​ເປັນ​ເອກະ​ພາບ​ກັນ​ແລ້ວ​ວ່າ: ​ໃນ​ຕໍ່​ໄປ​ນີ້ ຖ້າ​ກວດ​ເຫັນ​ຢູ່​ໃສ, ອົງການ​ໃດ, ທ້ອງ​ຖິ່ນ​ໃດ​ກໍ​ຕ້ອງ​ມອບ​ໃຫ້​ເປັນ​ພາລະ ​ແລະ ຄວາມ​ຮັບຜິດຊອບ​ຂອງ​ອົງການ​ນັ້ນ, ທ້ອງ​ຖິ່ນ​ນັ້ນຊີ້​ນຳ​ແກ້​ໄຂ. ຖ້າ​ບໍ່​ຢາກ​ແກ້, ບໍ່​ກ້າ​ແກ້ ຫລື ບໍ່​ມີ​ຄວາມ​ສາມາດ​ແກ້ ຂັ້ນ​ເທິງ​ທີ່​ສູງ​ກວ່າ​ນັ້ນຈະ​ເປັນ​ຜູ້​ແກ້ ​ແລະ ກ້າວ​ໄປ​ເຖິງ​ແກ້​ຜູ້​ເປັນ​ຫົວໜ້າ​ຢູ່​ທີ່​ນັ້ນ, ກົມ​ກອງ​ນັ້ນ, ຕ້ອງ​ເວົ້າ​ເຖິງ​ຄວາມ​ຮັບຜິດຊອບ​ຕໍ່​ພັກ​ຕໍ່​ກົດໝາຍ. ຂໍ​ໃຫ້​ສະມາຊິກ​ສະພາ​ແຫ່ງ​ຊາດ, ສະພາ​ທ້ອງ​ຖິ່ນ​ຕິດຕາມ​ເປັນ​ຫູ​ເປັນຕາ ​ແລະ ປະກອບສ່ວນ​ສຳຄັນ​ເຂົ້າ​ໃນ​ການ​ແກ້​ໄຂ​ບັນຫາ​ເຫລົ່າ​ນີ້​ໃຫ້​ໝົດ​ໄປ​ເປັນ​ກ້າວໆ. ພວກ​ເຮົາ​ບໍ່​ສາມາດ​ປະ​ປ່ອຍ​ໃຫ້​ເປັນ​ຊຳ​ເຮື້ອ​ແບບ​ນີ້​ຕໍ່​ໄປ​ໄດ້​ອີກ​ແລ້ວ. ນີ້​ລະ​ຄື​ຄຳ​ຕອບ​ທີ​ເດັດ​ຂອງ​ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ​ຢູ່​ໃນ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 4 ຂອງ​ສະພາ​ແຫ່ງ​ຊາດ​ຊຸດ​ທີ 8 ​ໃນ​ອາທິດ​ຜ່ານ​ມາ.

​ເຖິງ​ຢ່າງ​ໃດ​ກໍ​ດີ, ຕາມ​ຜູ້​ຂຽນ​ຄິດ​ເມື່ອ​ເວົ້າ​ເຖິງ​ການ​ບໍລິຫານ​ລັດ​ໃນ​ທຸກ​ຂົງ​ເຂດ ​ແລະ ທຸກຂະ​ແໜງ​ການ​ແມ່ນ​ຕ້ອງ​​ເດັດຂາດ​ເອົາ​ແຕ່​ຂັ້ນຮາກ​ຖານ​ຂຶ້ນມາ​ ​ເປັນຕົ້ນນັບ​ແຕ່​ທ່ານ​ເຈົ້າ​ເມືອງ, ທ່ານ​ເຈົ້າ​ແຂວງ ​ແລະ ທ່ານ​ຫົວໜ້າ​ຂະ​ແໜງ​ການ, ພະ​ແນ​ກການ ​​ເພາະ​ໃນ​ຜ່ານ​ມາ​ຜູ້​ພາ​ໝູ່​ເພ​ກໍ​ແມ່ນ​ຂັ້ນ​ແກນ​ນຳ, ສະມາຊິກ​ພັກ​ພະນັກງານ​ໃນ​ຂັ້ນຮາກ​ຖານ​ນັ້ນ​ເປັນຕົ້ນ​ເຫດ. ຖ້າ​ຈະ​ສົມ​ກັບ​ວ່າ​ແຂວງ​ເປັນ​ຫົວໜ່ວຍ​ຍຸດ​ທະ​ສາດ, ​ເມືອງ​ເປັນ​ຫົວໜ່ວຍ​ເຂັ້ມ​ແຂງ​ຮອບດ້ານ, ບ້ານ​ເປັນ​ຫົວໜ່ວຍ​ພັດທະນາ​ໄປ​ຕາມ​ທິດ​ສາມ​ສ້າງ. ​ໃນ​ຜ່ານ​ມາ ບັນດາ​ປາກົດການ​ຫຍໍ້​ທໍ້​ທີ່​ມັນ​ໄດ້​ເກີດ​ຂຶ້ນ ​ແລະ ​ເກາະ​ຫ້ອຍ​ໃນ​ສັງຄົມ​ແບບ​ລາມ​ພະ​ລາມ​ຈົວ​ກໍ​ແມ່ນ​ມາ​ຈາກ​ບັນດາ​ທ່ານ, ບັນດາ​ສະຫາຍ​ທີ່​ເປັນ​ເຈົ້າວຽກ​ເຈົ້າງານ​ເປັນ​ຕົວ​ການ ​ແລະ ​ເປັນຕົ້ນ​ເຫດ​ກັນ​ທັງ​ນັ້ນ, ສ່ວນ​ພາກ​ປາຍ​ແຖວ​ມະ​ເຂ​ມະ​ຂາ​ເຂົາ​ກໍ​ພໍ​ໄດ້​ແຕ່​ແຫ່​ປ້າຍ.

error: Alert: Content is protected !!