ການກໍານົດ ແລະ ການເບີກຈ່າຍເງິນເດືອນ ຫຼື ຄ່າແຮງງານ ແລະ ນະໂຍບາຍອື່ນ ໃຫ້ແກ່ຜູ້ອອກແຮງງານ ຢູ່ ສປປ ລາວ

ວັນທີ 13 ສິງຫາ 2024 ນີ້ ກະຊວງແຮງງງານ ແລະ ສະຫວັດດີການສັງຄົມ ອອກແຈ້ງການເລກທີ 2721/ຮສສ ເລື່ອງ ການກໍານົດ ແລະ ການເບີກຈ່າຍເງິນເດືອນ ຫຼື ຄ່າແຮງງານ ແລະ ນະໂຍບາຍອື່ນ ໃຫ້ແກ່ຜູ້ອອກແຮງງານ ຢູ່ ສປປ ລາວ.

ອີງຕາມ ກົດໝາຍວ່າດ້ວຍແຮງງານ ສະບັບປັບປຸງ ເລກທີ 43/ສພຊ, ລົງວັນທີ 24 ທັນວາ 2013; ອີງຕາມ ດໍາລັດ ວ່າດ້ວຍຄະນະກໍາມະການແຮງງານແຫ່ງຊາດ ສະບັບເລກທີ 571/ນຍ, ລົງວັນທີ 20 ກັນຍາ 2021;

ອີງຕາມ ຄໍາສັ່ງ ຂອງນາຍົກລັດຖະມົນຕີ ວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດສະບັບເລກທີ 10/ນຍ, ລົງວັນທີ 14 ກໍລະກົດ 2023;

ອີງຕາມ ມະຕິກອງປະຊຸມຄະນະກໍາມະການແຮງງານແຫ່ງຊາດ ສະບັບເລກທີ 0256/ຮສສ, ລົງວັນທີ 24 ມັງກອນ 2024.

ເພື່ອຄວາມເປັນເອກະພາບໃນການກໍານົດ ແລະ ການເບີກຈ່າຍເງິນເດືອນ ຫຼື ຄ່າແຮງງານ ແລະ ນະໂຍບາຍ ອື່ນ ໃຫ້ແກ່ຜູ້ອອກແຮງງານຢູ່ທຸກຫົວໜ່ວຍແຮງງານໃນຂອບເຂດທົ່ວປະເທດ, ແນໃສ່ປົກປ້ອງສິດ ແລະ ຜົນ ປະໂຫຍດຂອງຜູ້ອອກແຮງງານ ແລະ ຜູ້ໃຊ້ແຮງງານ ໃຫ້ໄດ້ຮັບຄວາມເປັນທໍາຕາມກົດໝາຍ ແລະ ລະບຽບການ.

ລັດຖະມົນຕີ, ປະທານຄະນະກໍາມະການແຮງງານແຫ່ງຊາດ ອອກແຈ້ງການ:

1. ຫົວໜ່ວຍແຮງງານໃດ ທີ່ໄດ້ກໍານົດການເບີກຈ່າຍເງິນເດືອນ ຫຼື ຄ່າແຮງງານ ແລະ ນະໂຍບາຍອື່ນ ໃຫ້ຜູ້ອອກ ແຮງງານຂອງຕົນ ເປັນສະກຸນເງິນຕາຕ່າງປະເທດ ແລ້ວຈ່າຍເປັນເງິນກີບ ແມ່ນໃຫ້ຄິດໄລ່ບໍ່ໃຫ້ຫຼຸດຕາມອັດຕາ ແລກປ່ຽນຂອງທະນາຄານທຸລະກິດໃດຫນຶ່ງທີ່ກໍານົດອອກຫຼ້າສຸດໃນວັນໃດໜຶ່ງ ພາຍໃນ 3 ວັນລັດຖະການ ກ່ອນວັນຄິດໄລ່ເງິນເດືອນເປັນພື້ນຖານໃນການຄິດໄລ່ ໂດຍສອດຄ່ອງກັບກົດໝາຍ ແລະ ລະບຽບການຂອງ ທະນາຄານແຫ່ງ ສປປ ລາວ ກໍານົດໃນແຕ່ລະໄລຍະ;

2. ສໍາລັບຫົວໜ່ວຍແຮງງານໃດ ທີ່ປະຕິບັດບໍ່ທັນສອດຄ່ອງ ແມ່ນໃຫ້ປັບປຸງແກ້ໄຂ ສັນຍາແຮງງານ ແລະ ກົດ ລະບຽບພາຍໃນຂອງຕົນໃຫ້ສໍາເລັດ ແລະ ສອດຄ່ອງກັບເນື້ອໃນແຈ້ງການສະບັບນີ້;

3. ຖ້າຫົວໜ່ວຍແຮງງານໃດ ເບີກຈ່າຍເງິນເດືອນ ຫຼື ຄ່າແຮງງານ ແລະ ນະໂຍບາຍອື່ນ ໂດຍກໍານົດອັດຕາແລກ ປ່ຽນຕໍ່າກວ່າອັດຕາແລກປ່ຽນທີ່ທະນາຄານກໍານົດໄວ້ ແມ່ນຈະຖືກກ່າວເຕືອນ ແລະ ປະຕິບັດຕາມກົດໝາຍ ແລະ ລະບຽບການທີ່ກ່ຽວຂ້ອງ, ພ້ອມທັງຕ້ອງຄິດໄລ່ຄືນໃຫ້ແກ່ຜູ້ອອກແຮງງານ ເລີ່ມແຕ່ວັນທີ 1 ຕຸລາ 2024 ເປັນຕົ້ນໄປ;

4. ໃຫ້ຄະນະກໍາມະການແຮງງານແຫ່ງຊາດ, ກອງເລຂາຂອງຄະນະກໍາມະການແຮງງານແຫ ່ງຊາດ, ຄະນະກໍາມະ ການແຮງງານຂັ້ນແຂວງ, ຫ້ອງການແຮງງານ ແລະ ສະຫວັດດີການສັງຄົມຂັ້ນເມືອງ, ເຈົ້າໜ້າທີ່ກວດກາແຮງງານ ໂຄສະນາ, ເຜີຍແຜ່, ຕິດຕາມ, ກວດກາ, ຊຸກຍູ້ ແລະ ແນະນໍາ ໃຫ້ຫົວໜ່ວຍແຮງງານປັບປຸງແກ້ໄຂ ໃຫ້ ຖືກຕ້ອງຕາມແຈ້ງການສະບັບນີ້ ຢ່າງເຂັ້ມງວດ;

5. ແຈ້ງການສະບັບນີ້ ມີຜົນສັກສິດ ນັບແຕ່ວັນລົງລາຍເຊັນເປັນຕົ້ນໄປ.