ມອບເງິນສ່ວນແບ່ງ 10% ເປັນເງິນ 664 ລ້ານກວ່າກີບ ເຂົ້າກອງທຶນ ຄວບຄຸມ, ສະກັດກັ້ນ ແລະ ຕ້ານຢາເສບຕິດ ຂັ້ນສູນກາງ
ວັນທີ 13 ສິງຫາ 2024 ກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ ນະຄອນຫລວງວຽງຈັນ ໄດ້ມອບເງິນສ່ວນແບ່ງ 10% ລວມເປັນເງິນ 664 ລ້ານກວ່າກີບ ທີ່ໄດ້ຈາກການລະດົມທຶນທົ່ວສັງຄົມ ແລະ ການຂາຍຊັບສິນຂອງລັດ ເຂົ້າກອງທຶນຄວບຄຸມ ສະກັດກັ້ນ ແລະ ຕ້ານຢາເສບຕິດ ຂັ້ນສູນກາງ; ມອບໂດຍ ພົຈວ ປອ. ບົວພັນ ຟອງມະນີ ຫົວໜ້າກອງບັນຊາການ ປກສ ນະຄອນຫລວງວຽງຈັນ, ທັງເປັນຮອງປະທານສະພາບໍລິຫານກອງທຶນ ຄວບຄຸມ, ສະກັດກັ້ນ ແລະ ຕ້ານຢາເສບຕິດ ນະຄອນຫລວງວຽງຈັນ; ຮັບໂດຍ ພັອ ສາລີ ພຸດທະວົງ ຮອງຫົວໜ້າກົມໃຫຍ່ຕໍາຫລວດ, ຄະນະຊີ້ນໍາສະພາບໍລິຫານກອງທຶນ ຄວບຄຸມ, ສະກັດກັ້ນ ແລະ ຕ້ານຢາເສບຕິດ ຂັ້ນສູນກາງ.
ຜ່ານການເຄື່ອນໄຫວຈັດຕັ້ງປະຕິບັດ ວຽກງານນັບແຕ່ປີ 2021 ຫາ 2023 ມີຍອດເງິນເຂົ້າໃນບັນຊີຕົວຈິງ ທີ່ເຫລືອຈາກການຫັກ 30% ເຂົ້າງົບປະມານຂອງ ລັດ, ແລ້ວ ຍັງເຫລືອ 70% ທີ່ຂະແໜງ ຄຸ້ມຄອງຊັບສິນຂອງລັດ ໄດ້ໂອນເຂົ້າໃນບັນຊີຢູ່ຄັງເງິນແຫ່ງຊາດປະຈຳນະຄອນ ຫລວງວຽງຈັນ ຈໍານວນ 6 ຕື້ 643 ລ້ານກວ່າກີບ ແລະ ໄດ້ແບ່ງ 10% ມອບໃຫ້ກອງທຶນ ຂັ້ນສູນກາງ ເປັນຈໍານວນ 664 ລ້ານກວ່າກີບ.
ສຳລັບທິດທາງໃນຕໍ່ໜ້າ ຈະສືບຕໍ່ເຄື່ອນໄຫວຕາມພາລະບົດບາດສິດ ແລະ ໜ້າທີ່ ຕາມຂໍ້ຕົກລົງ 377/ຈນວ.(ປັບປຸງ)2024 ເພື່ອຈັດຕັ້ງປະຕິບັດຕາມ ດຳລັດ 267/ລບ ແລະ ລະບຽບກອງທຶນນະຄອນ ຫລວງວຽງຈັນ ໃຫ້ມີສິທິພາບ, ປະສິດທິຜົນດີຂຶ້ນເທື່ອລະກ້າວ ແລະ ໃຫ້ມີຄວາມເຂັ້ມແຂງ, ຍືນຍົງດີຂຶ້ນກວ່າເກົ່າ, ໝູນໃຊ້ເຂົ້າໃນວຽກງານສະກັດກັ້ນ ແລະ ຕ້ານຢາເສບຕິດ ໃຫ້ບັນລຸຜົນສຳເລັດ.
ກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ ນະຄອນຫລວງວຽງຈັນ ໄດ້ຮັບອະນຸມັດສ້າງຕັ້ງຂຶ້ນຕາມຂໍ້ຕົກລົງ ສະບັບເລກທີ0525/ຈນວ, ລົງວັນທີ 02 ມິຖຸນາ 2015 ແລະ ຕົ້ນປີ 2017 ໄດ້ມອບໂອນວຽກກວດກາ ແລະ ຄວບຄຸມຢາເສບຕິດ ມາຂຶ້ນກັບກອງບັນຊາການປ້ອງກັນຄວາມສະຫງົບ ກໍຄືຫ້ອງຕຳຫຼວດ, ມາຮອດປີ 2020 ໄດ້ປັບປຸງຄະນະກອງທຶນຕາມທິດຊີ້ນໍາຂອງທ່ານເຈົ້າຄອງນະ ຄອນຫຼວງວຽງຈັນ ພ້ອມທັງເຄື່ອນໄຫວປະສານສົມທົບຕາມພາລະບົດບາດ ສິດ-ໜ້າທີ່ ປີ 2021 ໄດ້ເປີດບັນຊີເງິນກອງທຶນ ຢູ່ຄັງເງິນແຫ່ງຊາດປະຈຳ ນະຄອນຫຼວງວຽງຈັນ ຕາມການຕົກລົງ ແລະ ໄດ້ເຄື່ອນໄຫວນັບແຕ່ 2021 ເປັນຕົ້ນມາ.
