ສໍາເລັດການເຝຶກອົບຮົມວິທີການສືບສວນ-ສອບສວນຄະດີຄ້າມະນຸດ
ຊຸດເຝຶກອົບຮົມວິທີການສືບສວນ-ສອບສວນຄະດີຄ້າມະນຸດໄດ້ສໍາເລັດລົງໃນວັນທີ 1 ພະຈິກນີ້, ພາຍຫລັງດຳເນີນມາເປັນເວລາ 3 ວັນທີ່ນະຄອນຫລວງວຽງຈັນ, ໂດຍການເປັນປະທານຂອງທ່ານພັນໂທ ຈິດວິໄຊ ແກ້ວມະນີວົງ ຫົວໜ້າຄະນະວິຊາສືບສວນ-ສອບສວນຄະດີອາຍາວິທະຍາຄານຕຳຫລວດປະຊາຊົນ, ທ່ານນາງ ມະນີຈັນ ແກ້ວວິລິຍະວົງ ຜູ້ຕາງໜ້າແຜນການອົດສະຕຣາລີ-ອາຊີ (AAPTIP), ມີນັກສຳມະນາກອນຈາກໂຮງຮຽນ ປກສ ຊັ້ນກາງ 4 ແຫ່ງຄື: ແຂວງອຸດົມໄຊ, ຫລວງພະບາງ, ສະຫວັນນະເຂດ ແລະ ຈຳປາສັກເຂົ້າຮ່ວມຢ່າງພ້ອມພຽງ.
ທ່ານຮອງຫົວໜ້າວິຊາສືບສວນ-ສອບສວນຄະດີອາຍາວິທະຍາຄານຕຳຫລວດປະຊາຊົນ ໃຫ້ຮູ້ວ່າ: ການເຝຶກອົບຮົມຄັ້ງນີ້, ເພື່ອເລັ່ງຍົກສູງຄວາມອາດສາມາດໃນວຽກງານຕ້ານການຄ້າມະນຸດ, ໂດຍສະເພາະພາລະບົດບາດ, ຂອບເຂດ-ສິດ ແລະ ໜ້າທີ່ຂອງຕຳຫລວດສະກັດກັ້ນ ແລະ ຕ້ານການຄ້າມະນຸດ, ຄວາມສາມາດດ້ານການສືບສວນ-ສອບສວນຄະດີຄ້າມະນຸດ, ສົນທິສັນຍາ, ກົດໝາຍ ແລະ ນິຕິກຳຕ່າງໆທີ່ພົວພັນວຽກງານສືບສວນ-ສອບສວນ, ອົງປະກອບຂອງການກະທຳຜິດ, ຄວາມແຕກຕ່າງ ແລະ ເລ່ລ່ຽມຂອງພວກຄ້າມະນຸດ, ວິທີການ ແລະ ຂັ້ນຕອນຂອງການສືບສວນ-ສອບສວນ ເພື່ອເຮັດໃຫ້ນັກສຳມະນາກອນມີຄວາມສາມາດນໍາໄປປະຕິບັດວຽກງານຕົວຈິງມີປະສິດທິພາບສູງຂຶ້ນກວ່າເກົ່າ.
ຂ່າວ-ພາບ : ຫນັງສືພິມ ປກສ
