ມອບຮັບໂຄງການປັບປຸງ ແລະ ຍົກລະດັບໂຮງໝໍແຂວງຫລວງພະບາງ

ພິທີ ມອບ – ຮັບ ກະແຈ ເພື່ອເປັນສັນຍາລັກ ໃນການມອບໂຄງການປັບປຸງ ແລະ ຍົກລະດັບໂຮງໝໍແຂວງຫລວງພະບາງ ໄດ້ຈັດຂຶ້ນໃນວັນທີ 16 ສິງຫາ 2024 , ມີ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ, ທ່ານ ນາງ ຟ່າງຫົງ ເອກອັກຄະລັດຖະທູດ ສປ ຈີນ ປະຈໍາລາວ, ພ້ອມດ້ວຍການນຳຂອງແຂວງ, ບໍລິສັດຮັບເໝົາ ແລະພາກສ່ວນກ່ຽວຂ້ອງເຂົ້າຮ່ວມ.

ໂຄງການປັບປຸງ ແລະ ຍົກລະດັບໂຮງໝໍແຂວງຫລວງພະບາງ ເປັນໂຄງການທີ່ໄດ້ຮັບການສະໜັບສະໜູນຢ່າງເຕັມທີ່ ຈາກອົງການພາກລັດທຸກຂັ້ນຂອງທັງລາວ ແລະ ຈີນ, ລວມມີການສ້າງໃໝ່ບັນດາອາຄານຮອງຮັບການປີ່ນປົວລວມ 50 ຕຽງ, ເປັນຕົ້ນ ຕຶກພະແນກພາຍນອກ ແລະ ພະແນກເສັ້ນເລືອດຫົວໃຈ, ຫໍພັກຊ່ຽວຊານຈີນ, ເຂດບໍາບັດນໍ້າເປື້ອນ, ອ່າງນໍ້າສໍາລັບການດັບເພີງ ແລະ ຫ້ອງຈັກປ້ຳສູບນໍ້າດັບເພີງ, ນອກນັ້ນ ໄດ້ມີການບູລະນະສ້ອມແປງຕຶກອາຄານເກົ່າ ແລະ ໂຄງການກາງແຈ້ງຂອງໂຮງໝໍ, ທັງໄດ້ສະໜອງເຄື່ອງອຸປະກອນການແພດທີ່ຈຳເປັນຈຳນວນໜຶ່ງ, ພ້ອມນີ້ ໂຮງໝໍປະຊາຊົນເລກໜຶ່ງແຂວງຢູນນານ ຈະໃຫ້ການຊ່ວຍເຫລືອດ້ານເຕັກນິກການແພດເປັນເວລາ 3 ປີ ແລະ ຈັດສົ່ງຄະນະຊ່ຽວຊານມາປະຈຳຢູ່ໂຮງໝໍຫລວງພະບາງ ເພື່ອໃຫ້ບໍລິການດ້ານການແພດ ແລະ ສົ່ງພະນັກງານພະຍາບານຂອງໂຮງໝໍແຂວງຫລວງພະບາງ ໄປຝຶກອົບຮົມຢູ່ຈີນອີກດ້ວຍ.

ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ໄດ້ສະແດງຄວາມຂອບໃຈເປັນຢ່າງສູງ ທີ່ລັດຖະບານຈີນ ໄດ້ຊ່ວຍເຫລືອການປັບປຸງ ແລະ ຍົກລະດັບໂຮງໝໍແຂວງຫລວງພະບາງ ເຊິ່ງຈະເຮັດໃຫ້ການບໍລິການດ້ານສາທາລະນະສຸກຂອງລາວ ໂດຍສະເພາະບັນດາແຂວງພາກເໜືອໄດ້ຮັບການພັດທະນາຫລາຍຂຶ້ນ ແລະ ເປັນອີກໂຄງການ ຂີດໝາຍດ້ານການຮ່ວມມື ແບບຕິດແທດຕົວຈິງ ລະຫວ່າງ ສອງປະເທດລາວ-ຈີນ ຕື່ມອີກ.