ຫລວງພະບາງ ສຳເລັດຍົກລະດັບການຫັນເປັນດິຈິຕອນເຂົ້າໃນການປະຕິບັດວຽກງານຕົວຈິງ

ກອງປະຊຸມເຜີຍແຜ່ກ່ຽວກັບ ຄວາມຮູ້ພື້ນຖານການຫັນເປັນດິຈິຕອນ ໃຫ້ແກ່ພະນັກງານພະແນກການ ແລະ ຂະແໜງການຕ່າງໆ ພາຍໃນ ແຂວງ ຫລວງພະບາງ ດຳເນີນໄປ ແຕ່ວັນທີ 14 – 16 ສິງຫາ 2024ນີ້, ທີພະແນກຖະແຫລງຂ່າວ, ວັດທະນະທໍາ ແລະ ການທ່ອງທ່ຽວ ແຂວງ ຫລວງພະບາງ ໂດຍການເປັນຄະນະປະທານຂອງທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ຄໍາຂັນ ຈັນທະວີສຸກ ເຈົ້າແຂວງ ຫລວງພະບາງ. ມີຜູ້ຕາງໜ້າ ຈາກ ພະແນກການ, ມະຫາວິທະຍາໄລ ແລະ ຂະແໜງການຕ່າງໆ ພາຍໃນແຂວງ ເຂົ້າຮ່ວມທັງໝົດ 144 ທ່ານ, ຍິງ ຈຳນວນ 56 ທ່ານ.

ທ່ານນາງ ເກສອນ ສຸລິວົງ ຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ ລາຍງານໃຫ້ຊາບວ່າ: ຫົວຂໍ້ການນຳສະເໜີ ແມ່ນໄດ້ກຳນົດຕາມເອກກະສານຝຶກອົບຮົມຄວາມຮູ້ພື້ນຖານການຫັນເປັນດິຈິຕອນ 3 ເຫລັ້ມ ລວມທັງໝົດ 15 ບົດ ຄື: ການປະຕິວັດອຸດສາຫະກໍາ 4.0, ເຕັກໂນໂລຊີ ແລະ ນະວັດຕະກໍາ, ເຕັກໂນໂລຊີຂໍ້ມູນຂ່າວສານ ແລະ ການສື່ສານ, ເຕັກໂນໂລຊີດິຈິຕອນ ແລະ ເຕັກໂນໂລຊີ ອັດສະລິຍະ, ເຕັກໂນໂລຊີ ໂລຈິສຕິກ ແລະ ການໄປສະນີ, ອິນເຕີເນັດ ແລະ ສື່ສັງຄົມອອນລາຍ, ຖານຂໍ້ມູນ (Database) ແລະ ເຕັກໂນໂລຊີກຸ່ມຂໍ້ມູນຜູກພັນ (Blockchain), ຄວາມປອດໄພໄຊເບີ, ຄວາມຮູ້ພື້ນຖານການບໍລິຫານລັດດິຈິຕອນ (Digital Government), ເສດຖະກິດດິຈິຕອນ ແລະ ທຸລະກໍາຊັບສິນດິຈິຕອນ, ສັງຄົມດິຈິຕອນ, ຍຸດທະສາດການຫັນເປັນດິຈິຕອນ ຂອງ ສປປ ລາວ, ການພັດທະນາຊັບພະຍາກອນມະນຸດດ້ານດິຈິຕອນ, ບັນດານິຕິກໍາ ກ່ຽວກັບການຫັນເປັນດິຈິຕອນ ຂອງ ສປປ ລາວ ແລະ ວຽກກວດກາຫັນເປັນດິຈິຕອນ. ຜ່ານຜົນການປະເມີນພາຍຫຼັງການ ການເຜີຍແຜ່ ເຫັນໄດ້ວ່າ ຄວາມຮັບຮູ້ຜູ້ເຂົ້າຮ່ວມ ຈັດຢູ່ໃນລະດັບຫຼາຍທີ່ສຸດ.

ໂອກາດນີ້, ທ່ານ ບໍ່ວຽງຄໍາ ວົງດາລາ ໄດ້ຍົກໃຫ້ເຫັນສະພາບການພັດທະນາທາງດ້ານເຕັກໂນໂລຊີດິຈິຕອນ ຂອງ ໂລກ ກໍຄື ສປປ ລາວ ໂດຍສະເພາະແມ່ນວຽກງານທີ່ເປັນບູລິມະສິດຂອງລັດຖະບານ ໃນການຫັນເປັນລັດຖະບານດິຈິຕອນ ຊຶ່ງເປັນວຽກອັນລວມທີ່ທຸກພາກສ່ວນຈະຕ້ອງໄດ້ພ້ອມໃຈກັນຈັດຕັ້ງປະຕິບັດ.