ອິດສະລາແອນໂຈມຕີສາງອາທິດຂອງກຸ່ມແຮັດໂບລາຢູ່ພາກໃຕ້ຂອງລີບັງ ມີຜູ້ເສຍຊີວິດແລ້ວ 10 ຄົນ
ມີຜູ້ເສຍຊີວິດຢ່າງໜ້ອຍ 10 ຄົນ ພາຍຫລັງກອງທັບອິດສະລາແອນໂຈມຕີເປົ້າໝາຍຢູ່ລີບັງ ທີ່ເປັນສາງອາວຸດຂອງກຸ່ມແຮັດໂບລາ.
ວັນທີ 17 ສິງຫາ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກລີບັງລາຍງານວ່າ: ກອງທັບອິດສະລາແອນປະຕິບັດການໂຈມຕີທາງອາກາດຢູ່ເຂດນາບາຕິເຢ ທາງພາກໃຕ້ຂອງລີບັງ ໂດຍຄວາມຮຸນແຮງຂອງການໂຈມຕີດັ່ງກ່າວຖືວ່າໜັກໜ່ວງທີ່ສຸດນັບແຕ່ກຸ່ມແຮັດໂບລາເລີ່ມຍິງຈະຫລວດຂ້າມຊາຍແດນທາງພາກໃຕ້ຂອງລີບັງໄປພາກເໜືອຂອງອິດສະລາແອນ ຄູ່ຂະໜານກັບສົງຄາມຢູ່ເຂດກາຊາ ເຊິ່ງເລີ່ມຂຶ້ນໃນວັນທີ 7 ຕຸລາ 2023.
ການໂຈມຕີດັ່ງກ່າວສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 10 ຄົນ ລວມທັງຜູ້ຍິງຄົນໜຶ່ງ ແລະ ລູກສອງຄົນລາວ. ອີກທັງມີຜູ້ໄດ້ຮັບບາດເຈັບອີກ 5 ຄົນ ໂດຍຜູ້ໄດ້ຮັບບາດເຈັບສ່ວນຫລາຍຍັງເປັນຊາວຊິຣີ.
ຂະນະທີ່ສໍານັກຂ່າວແຫ່ງຊາດລີບັງ (LNA) ລາຍງານອີກວ່າ: ຜູ້ເສຍຊີວິດ ແລະ ຜູ້ໄດ້ຮັບບາດເຈັບສ່ວນຫລາຍເປັນຜູ້ລີ້ໄພ ແລະ ແຮງງານຊາວຊິຣີ.
ສ່ວນກອງທັບອິດສະລາແອນອອກຖະແຫລງການກ່ຽວກັບເຫດການຄັ້ງນີ້ວ່າ: ເປັນການໂຈມຕີສາງອາວຸດຂອງກຸ່ມແຮັດໂບລາຢູ່ເຂດນາບາຕິເຢ ທາງພາກໃຕ້ຂອງລີບັງ ເຊິ່ງຢູ່ຫ່າງຈາກຊາຍແດນໃກ້ທີ່ສຸດຂອງອິດສະລາແອນພຽງ 12 ກິໂລແມັດ.
ທັງນີ້, ອິດສະລາແອນ ແລະ ລີບັງ ເຄີຍເຮັດສົງຄາມກັນມາແລ້ວຄັ້ງໜຶ່ງ ໃນປີ 2006 ເຊິ່ງໃນທາງປະຕິບັດຄືການສູ້ຮົບລະຫວ່າງອິດສະລາແອນກັບກຸ່ມແຮັດໂບລາຫລາຍກວ່າ, ສ່ວນການສູ້ຮົບລະຫວ່າງທັງສອງຝ່າຍນັບແຕ່ສົງຄາມຢູ່ເຂດກາຊາເລີ່ມຂຶ້ນ ສົ່ງຜົນເຮັດໃຫ້ມີຜູ້ເສຍຊີວິດຢູ່ລີບັງແລ້ວ 58 ຄົນ ໃນຈໍານວນນີ້ຢ່າງໜ້ອຍ 128 ຄົນ ເປັນພົນລະເຮືອນ, ສ່ວນຢູ່ອິດສະລາແອນມີພົນລະເຮືອນເສຍຊີວິດຢ່າງໜ້ອຍ 26 ຄົນ ແລະ ທະຫານອີກຢ່າງໜ້ອຍ 22 ຄົນ.
