ບໍລິສັດພັດທະນາວັກຊີນໝາກສຸກລີງພ້ອມຜະລິດສຸງສຸດ 10 ລ້ານໂດສ ພາຍໃນປີ 2025

      ບໍລິສັດຢາຂອງດານມາກ ເຊິ່ງເປັນຜູ້ຜະລິດວັກຊີນປ້ອງກັນພະຍາດໝາກສຸກລີງແຫ່ງດຽວໃນໂລກໃນເວລານີ້ ຢືນຢັນປະສິດທິພາບການຜະລິດສູງສຸດ 10 ລ້ານໂດສ ໃນປີ 2025.

     ວັນທີ 18 ສິງຫາ, ສໍານັກຂ່າວຕ່າງປະເທດລາຍງານວ່າ: ບໍລິສັດ ບາວາຣຽນ ນໍດິກ ຜູ້ພັດທະນາດ້ານເຕັກໂນໂລຊີຊີວະພາບສັນຊາດດານມາກ ເຊິ່ງເປັນຜູ້ຜະລິດວັກຊີນ ອິມວາເນກ (Imvanex) ສໍາລັບພະຍາດໝາກສຸກລີງ ທີ່ອົງການອະນາໄມໂລກ (WHO) ປະເມີນປະສິດທິພາບຕໍ່ພະຍາດໝາກສຸກລີງໄວ້ໃນລະດັບ 85% ອອກຖະແຫລງການວ່າ: ມີປະສິດທິພາບຜະລິດວັກຊີນເພີ່ມອີກ 2 ລ້ານໂດສ ໃນປີນີ້ ແລະ ຜະລິດສູງສຸດ 10 ລ້ານໂດສ ພາຍໃນປີ 2025.

     ຂະນະທີ່ຈໍານວນວັກຊີນອິມວາເນກທີ່ມີຢູ່ໃນສາງຂອງບໍລິສັດໃນເວລານີ້ມີປະມານ 500,000 ໂດສ. ນອກຈາກນີ້ ປັດຈຸບັນວັກຊີນອິມວາເນກເປັນວັກຊີນແບບດຽວທີ່ອາເມລິກາ ແລະ ການາດາອະນຸມັດເປັນກໍລະນີສຸກເສີນ ເພື່ອໃຫ້ໃຊ້ປ້ອງກັນພະຍາດໝາກສຸກລີງ, ສ່ວນລັດຖະບານຂອງຫລາຍປະເທດໃນເອີຣົບ ສັ່ງຊື້ວັກຊີນອິມວາເນກເພື່ອໃຊ້ແບບນອກຂໍ້ບົ່ງໃຊ້ (off-label) ໂດຍຕ້ອງຂຶ້ນຢູ່ກັບຄໍາສັ່ງຂອງແພດໝໍເທົ່ານັ້ນ.

      ດ້ານສູນຄວບຄຸມ ແລະ ປ້ອງກັນພະຍາດອາຟຣິກາ (ອາຟຣິກາ ຊີດີຊີ) ອັບເດດສະຖານະການການແຜ່ລະບາດຂອງພະຍາດໝາກສຸກລີງ ຫລື ເອັມພ໊ອກ ພາຍໃນພາກພື້ນ ນັບແຕ່ຕົ້ນປີນີ້ວ່າມີຜູ້ຕິດເຊື້ອຢືນຢັນສະສົມຢ່າງໜ້ອຍ 18,737 ຄົນ ໃນຢ່າງໜ້ອຍ 12 ປະເທດສະມາຊິກສະຫະພາບອາຟຣິກາ (AU).

     ສ່ວນຈໍານວນຜູ້ເສຍຊີວິດຈາກພະຍາດດັ່ງກ່າວມີຢ່າງໜ້ອຍ 541 ຄົນ ໃນທະວີບອາຟຣິກາ ຄິດເປັນອັດຕາການເສຍຊີວິດ 2.89%. ທັງນີ້ ຄອງໂກມີຜູ້ຕິດເຊື້ອສະສົມຫລາຍທີ່ສຸດ 1,005 ຄົນ ແລະ ມີຜູ້ເສຍຊີວິດແລ້ວ 23 ຄົນ.

     ການແຜ່ລະບາດຂອງພະຍາດໝາກສຸກລີງຢູ່ຄອງໂກ ຄືກຸ່ມເຊື້ອໄວຣັສສາຍພັນໃໝ່ ເຄລດ1ບີ ເຊິ່ງກາຍພັນມາຈາກກຸ່ມສາຍພັນທີ 1 ຫລື ເຄລດ1 ເຮັດໃຫ້ທຸກຝ່າຍກັງວົນວ່າສະຖານະການການແຜ່ລະບາດຂອງພະຍາດຈະຍິ່ງຮຸນແຮງ ເນື່ອງຈາກເຊື້ອເຄລດ1 ມີຄວາມຮຸນແຮງລະດັບສູງສຸດໃນບັນດາທຸກສາຍພັນຢູ່ແລ້ວ ແລະ ມີອັດຕາການເສຍຊີວິດສູງເຖິງ 10%.

     ພະຍາດໝາກສຸກລີງຖືເປັນໜຶ່ງໃນພະຍາດປະຈໍາຖິ່ນຂອງທະວີບອາຟຣິກາ, ແຕ່ສະຖິຕິຜູ້ຕິດເຊື້ອຢືນຢັນໃນປີນີ້ທໍາລາຍຈໍານວນຜູ້ຕິດເຊື້ອສະສົມຂອງປີຜ່ານມາ ເຊິ່ງມີ 14,383 ຄົນ ແລະ ປະເທດໃກ້ຄຽງຂອງຄອງໂກພົບຜູ້ຕິດເຊື້ອເພີ່ມຂຶ້ນຢ່າງຕໍ່ເນື່ອງ. WHO ປະກາດໃຫ້ສະຖານະການການແຜ່ລະບາດຂອງພະຍາດໝາກສຸກລີງເປັນສະຖານະການສຸກເສີນດ້ານສາທາລະນະສຸກສາກົນອີກເທື່ອໜຶ່ງ ພາຍຫລັງເຄີຍປະກາດມາແລ້ວລະຫວ່າງປີ 2022-2023.