ບຸນທາດຫລວງມົນສະເໜ່ແຫ່ງເມືອງລາວ

- advert banner 728 90 728x90 - ບຸນທາດຫລວງມົນສະເໜ່ແຫ່ງເມືອງລາວ

​ໂດຍ: ທິດ​ກໍ່າ

- new3 - ບຸນທາດຫລວງມົນສະເໜ່ແຫ່ງເມືອງລາວ

​ເທົ່າ​ທີ່​ທິດ​ກໍ່າ​ໄດ້​ຕິດຕາມ​ການສະ​ເຫລີ​ມສະຫລອງ​ບຸນທາດຫລວງ ອັນ​ເປັນ​ບຸນ​ປາງ​ໃຫຍ່​ຂອງ​ຊາວ​ນະຄອນຫລວງ​ວຽງ​ຈັນ ກໍ​ຄື​ຂອງ​ປະຊາຊົນ​ບັນດ​າ​ເຜົ່າ​ໃນ​ທົ່ວ​ປະ​ເທດ​ແມ່ນ​ມີ​ອັນ​ແຕກ​ຕ່າງ ​ແລະ ດີ​ຂຶ້ນ​ໃນ​ທຸກໆ​ປີ. ​ໂອກາດ​ບຸນທາດຫລວງ​ນອກຈາກ​ມີ​ປະຊາຊົນ​ບັນດາ​ເຜົ່າ​ໃນ​ທົ່ວ​ປະ​ເທດ​ໄດ້​ເຂົ້າມາ​ຮ່ວມ​ເພື່ອ​ທຳບຸນ​ສິນ​ກິນ​ທານ ​ແລ້ວ​ກໍ​ຍັງ​ມີ​ນັກ​ທ່ອງ​ທ່ຽວ​ຈາກ​ຕ່າງ​ແດນ​ເຂົ້າມາ​ທ່ຽວ​ມາ​ຊົມ​ຢ່າງ​ຫລວງຫລາຍ​ພາຍ​ມາກ. ສະ​ເພາະ​ປີ​ນີ້ ຕາມ​ທິດ​ກໍ່າ​ວາດ​ພາບ​ຄິດ​ໄລ່​ເບິ່ງ​ຄົນ​ພາຍ​ໃນ ​ແລະ ຕ່າງປະ​ເທດ​ທີ່​ໄດ້​ເຂົ້າມາ​ທ່ອງ​ທ່ຽວ​ໃນ​ງານ​ບຸນ​ນັບ​ແຕ່​ມື້ວັນ​ທີ 28 ຕຸລາ​ຫາ​ວັນ​ທີ 3 ພະຈິກ ​ແມ່ນ​ຈະ​ຢູ່​ໃນ​ລະດັບ​ຫ້າ​ແສນ​ເທື່ອ​ຄົນ​ຕໍ່​ມື້​ໂດຍ​ສະ​ເລ່ຍ. ສ່ວນວ່າ​ໃນ​ມື້ 14 ຫາມື້ 15 ຄໍ່າ​ເດືອນ 12 ລາວ ​ເຊິ່ງກົງ​ກັບ​ວັນ​ທີ 2 ກັບ​ວັນ​ທີ 3 ​ເດືອນ​ພະຈິກ​ແມ່ນ​ຈະ​ມີ​ຫລວງຫລາຍ​ຈົນ​ແອ​ອັດ​ຍັດ​ແຍ່​ເຂົ້າ-ອອກ​ ທັງ​ລົດ​ທັງ​ຄົນ​ເປັນ​ໝື່ນ​ເປັນ​ແສນ.

ຕາມ​ທິດ​ກໍ່າ​ວ່າ, ບຸນ​ນະມັດສະການ​ພະທາດ​ຫລວງ​ປີ​ນີ້​ຍິ່ງມີ​ອັນ​ພິ​ເສດ ​ແລະ ມີ​ອັນ​ແຕກ​ຕ່າງ​ກວ່າ​ປີຜ່ານມາ​ຫລາຍ​ຢ່າງ​ເຊັ່ນ​ວ່າ: ​ພະທາດ​ຫລວງ​ໄດ້​ຮັບ​ການ​ປະຕິສັງຂອນ​ອີກ​ເທື່ອ​ໃໝ່ ​ແລະ ​ເປັນ​ໂຄງການ​ທີ່​ໃຫຍ່​ກວ່າ​ເກົ່າ ​ເຊິ່ງ​ເບິ່ງ​ແລ້ວ​ກໍ​ເຫັນ​ວ່າ​ທັງ​ຈົບ​ທັງ​ງາມ, ທັງ​ມີ​ສີສັນ ​ແລະ ມີ​ສະ​ເໜ່ຢູ່​ໃນ​ຕົວ​ຂອງ​ອົງ​ພະທາດ. ຖື​ໄດ້​ວ່າການ​ປະຕິສັງຂອນ​ໃນ​ເທື່ອ​ນີ້​ແມ່ນ​ເປັນຄັ້ງທີ 4 ​ແລະ ນອນ​ຢູ່​ໃນ​ໂຄງການ​ນີ້, ທາງ​ການ​ເຮົາ​ຍັງ​ໄດ້​ມີ​ການ​ຫລໍ່​ພະ​ຄຳ​ທີ່​ມີນ້ຳໜັກ 9 ກິ​ໂລ ​ເຊິ່ງ​ເປັນ​ຄຳ​ທີ່​ຍັງ​ເຫລືອ​ໂອບ​ໃສ່​ຍອດ​ພະທາດ​ຫລວງ. ພະ​ຄຳ​ທີ່​ໄດ້​ຫລໍ່​ຂຶ້ນມາ​ໃໝ່​ນີ້​ກໍ​ເພື່ອ​ເປັນ​ປາລະມີ​ຄູ່​ກັບ​ອົງ​ພະທາດ​ໃນ​ຍຸກ​ສັນຕິພາບ ​ແລະ ການ​ພັດທະນາ​ຂອງ​ປະ​ເທດ​ຊາດ​ໃນ​ຍຸກ​ໃໝ່, ສ່ວນວ່າ​ພິ​ເສດ​ອີກ​ອັນ​ໜຶ່ງ​ກໍ​ພໍດີ​ເໝາະ​ກັບ​ງານ​ເປີດ​ປີ​ທ່ອງ​ທ່ຽວ​ລາວ 2018 ​ເຊິ່ງ​ໄດ້​ກຳນົດ​ເອົາ​ບຸນ​ນະມັດສະການ​ພະທາດ​ຫລວງ​ມາ​ເປັນ​ຕົວ​ຕັ້ງ. ສະນັ້ນ ຈຶ່ງ​​ເວົ້າ​ໄດ້​ວ່າ​ງານ​ບຸນ​ນະມັດສະການ​ພະທາດ​ຫລວງ​ປີ​ນີ້​ມັນ​ຄື​ເໝາະ​ເຈາະ ​ແລະ ລົງ​ຕົວ​ປານ​ປີ່​ກັບ​ຂຸ່ຍ.

​ແນວ​ໃດ​ກໍ​ຕາມ, ບຸນທາດຫລວງ​ປີ​ນີ້​ທິດ​ກໍ່າ​ເຫັນ​ບາງ​ຢ່າງ​ທີ່​ໜ້າ​ຊົມ​ເຊີຍ ​ແລະ ຍົກ​ໂປ້. ປັດ​ໄຈ​ອັນ​ໃໝ່​ທີ່​ມາ​ໃຫ້​ເຫັນ​ນັ້ນຄື​ມີ​ຖົງ​ຮອງ​ຮັບ​ຂີ້​ເຫຍື້ອທີ່​ຖືກ​ຢັ່ງຢາຍ​ໄວ້​ແຕ່ລະ​ຈຸດ​ແຕ່​ລະ​ບ່ອນ, ຄວາມ​ຊະຊາຍ​ຈາກ​ສິ່ງ​ເສດ​ເຫລືອ​ໃນ​ງານ​ບຸນ​ໄດ້​ຫລຸດຜ່ອນ​ໄປ​ຫລາຍ​ເຕີບ ​ແລະ ທັງ​ຮັບປະກັນ​ຄວາມ​ສວຍ​ຄວາມ​ງາມ​ຂອງ​ສິ່ງ​ແວດ​ລ້ອມ. ອີກ​ສິ່ງ​ໜຶ່ງ​ທີ່​ທິດ​ກໍ່າ​ເຫັນ​ມົນ​ສະ​ເໜ່ຂອງ​ບຸນ​ພະທາດ​ຫລວງ​ປີ​ນີ້​ແມ່ນ​ບໍ່​ມີ​ການ​ຊັກ​ແງະ​ຊັກ​ແງ້ນ​ເມົາ​ສຸລາ​ເຮ​ຮາ​ຊະຊາຍ​ອຶກ​ກະ​ທຶກ​ນຶກ​ນອງ​ຄື​ດັ່ງ​ປີຜ່ານໆ​ມາ. ນອກຈາກ​ນັ້ນ ກໍ​ແມ່ນ​ຄວາມ​ສະຫງົບ​ຈົບງາມ, ຄວາມ​ເປັນ​ລະບຽບ​ຮຽບຮ້ອຍ ຕະຫລອດ​ຮອດ​ການຈັດ​ສັນ​ຫ້າງ​ຮ້ານ​ກໍ​ເຫັນ​ວ່າ​ເປັນ​ລະບົບ​ຈົບງາມ ​​ແລະ ລົງ​ຕົວທຸກ​ຢ່າງ. ຂໍ​ຊົມ​ເຊີຍ​ຕໍ່​ຜູ້​ໃຈ​ບຸນ​ກ້າ​ລົງທຶນ​ຫລາຍ​ພັນຕື້ ​ເພື່ອ​ສ້າງ​ບ້ານ​ລາວ​ໃຫ້​ເປັນ​ເອກະລັກ​ໃຫ້​ນັກ​ທ່ອງ​ທ່ຽວ ນັບ​ທັງ​ຊາວ​ລາວ ​ແລະ ຄົນ​ຕ່າງ​ຊາດ​ໄດ້​ເຫັນ​ວິຖີ​ຊີວິດ, ຮີດຄອງ​ປະ​ເພນີ ​ແລະ ວັດທະນະທຳ​ຂອງ​ຊາດ​ລາວ, ຄົນ​ລາວ ​ເຮັດ​ໃຫ້​ບຸນທາດຫລວງ​ປີ​ນີ້​ມີ​ຫລາກ​ຫລາຍ​ສີສັນ ​ແລະ ມີ​ມົນ​ສະ​ເໜ່ດຶງ​ດູດ​ຈິດ​ໃຈ​ໃຫ້​ຄົນ​ຕ່າງ​ດ້າວ​ທ້າວ​ຕ່າງ​ແດນ​ເຫັນ​ໄດ້​ຄວາມ​ສວຍ​ສົດ​ງົດ​ງາມ, ຮີດຄອງ​ປະ​ເພນີ ​ແລະ ວັດທະນະທຳ​ທີ່​ມີ​ເອກະລັກ​ສະ​ເພາະ​ຂອງ​ຊາດ​ລາວ, ຄົນ​ລາວ ​ແລະ ຫັນ​ໜ້າ​ມາ​ທ່ອງ​ທ່ຽວ​ເມືອງ​ວຽງ​ຈັນ​ສີ​ສັດຕະນາຄະນະ​ຮຸດ​ອັນ​ເປັນ​ນະຄອນຫລວງ​ຂອງ​ປະ​ເທດ​ລາວ​ໃຫ້​ນັບ​ມື້ນັບ​ຫລາຍ. ຄາດ​ວ່າ​ບຸນ​ນະມັດສະການ​ພະທາດ​ຫລວງ​ໃນ​ປີໜ້າ​ອາດ​ຈະ​ມ່ວນ​ຊື່ນ​ລື່ນ​ເລີງ​ກວ່າ​ປີ​ນີ້ ສົມ​ກັບ​ວ່າ​ມົນ​ສະ​ເໜ່​ແຫ່ງ​ເມືອງ​ລາວ​ອັນຍະ​ມະນີ​ແຫ່ງ​ລຸ່ມ​ແມ່ນ້ຳຂອງທີ່​ແທ້​ຈິງ.

error: Content is protected !!