ແຂວງວຽງຈັນ-ຈັງຫວັດເລີຍ(ປະເທດໄທ) ກຽມຈັດກອງປະຊຸມການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ຄັ້ງທີ 21
ວັນທີ 16 ສິງຫາ 2024 ທີ່ຫ້ອງວ່າການແຂວງວຽງຈັນ ໄດ້ຈັດກອງປະຊຸມພົບປະ, ປຶກສາຫາລື ເພຶ່ອກະກຽມຄວາມພ້ອມ ສຳລັບກອງປະຊຸມຄະນະກຳມະການຮ່ວມມື ຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ, ແຂວງວຽງຈັນ ກັບ ຈັງຫວັດເລີຍ(ປະເທດໄທ) ຄັ້ງທີ 21 ໂດຍການເປັນປະທານຮ່ວມຂອງ ທ່ານ ພູວົງ ບຸນຊູ ຮອງເຈົ້າແຂວງວຽງຈັນ ແລະ ທ່ານ ອະນຸພົງ ຄຳພູແກ້ວ ຮອງຜູ້ວ່າຈັງຫວັດເລີຍ ຣາຊະອານາຈັກໄທ, ພ້ອມດ້ວຍຄະນະທັງ 2 ຝ່າຍເຂົ້າຮ່ວມ.
ທ່ານ ພູວົງ ບຸນຊູ ຮອງເຈົ້າແຂວງວຽງຈັນ ກ່າວວ່າ: ນັບຕັ້ງແຕ່ກອງປະຊຸມພົບປະສອງຝ່າຍໃນທ້າຍປີ 2023 ຜ່ານມາ, ສັງເກດເຫັນໄດ້ເຖິງຄວາມພະຍາຍາມຂອງທັງສອງຝ່າຍ ແຂວງວຽງຈັນ-ຈັງຫວັດເລີຍ ທີ່ໄດ້ເອົາໃຈໃສ່ໃນການຈັດຕັ້ງຜັນຂະຫຍາຍເນື້ອໃນຂອງບົດບັນທຶກ ທີ່ໄດ້ລົງນາມຮ່ວມກັນ ເພື່ອຊຸກຍູ້ສົ່ງເສີມໃຫ້ເກີດມີການຮ່ວມມືດ້ານຕ່າງໆລະຫວ່າງກັນໄດ້ເປັນຢ່າງດີ, ສາມາດຕີລາຄາໄດ້ວ່າ ສາຍພົວພັນການຮ່ວມມືລະຫວ່າງແຂວງວຽງຈັນ ກັບ ຈັງຫວັດເລີຍ ບັນລຸຜົນສຳເລັດໃນຫຼາຍດ້ານເປັນຕົ້ນການຢ້ຽມຢາມຂອງຄະນະຜູ້ແທນສອງຝ່າຍ ທັງໃນລະດັບແຂວງ, ລະດັບເມືອງ, ການຮ່ວມກັນຈັດງານປະເພນີຕ່າງໆ, ການສົ່ງເສີມການທ່ອງທ່ຽວ, ການປ້ອງກັນ ແລະ ການຮ່ວມມືໃນການຮັກສາສາຄວາມສະຫງົບຮຽບຮ້ອຍຕາມບໍລິເວນຊາຍແດນ, ການໄປມາຢ້ຽມຢາມຂອງປະຊາຊົນທັງສອງຝ່າຍ ແລະ ກິດຈະກຳອື່ນໆ ຊຶ່ງທັງ ໝົດເຫຼົ່ານັ້ນ ໄດ້ປະກອບສ່ວນຢ່າງຕັ້ງໜ້າເຮັດໃຫ້ພື້ນທີ່ຊາຍແດນມີຄວາມສະຫງົບ ແລະ ເປັນລະບຽບຮຽບຮ້ອຍດີ ເປັນການເພີ່ມພູນສາຍພົວພັນມິດຕະພາບ, ສ້າງຄວາມເຂົ້າອົກເຂົ້າໃຈ ແລະ ເຊື່ອໃຈເຊິ່ງກັນ ແລະ ກັນຕະຫຼອດມາ; ໃນກອງປະຊຸມຄັ້ງນີ້ ໄດ້ພ້ອມກັນປຶກສາຫາລື ແລະ ມີການແລກປ່ຽນຄວາມຄິດເຫັນຢ່າງກົງໄປກົງມາ ແລະ ພາວະວິໄສ ເພຶ່ອເຮັດໃຫ້ເນື້ອໃນຕ່າງໆທີ່ຈະກຳນົດໃນບົດບັນທຶກຄັ້ງຕໍ່ໄປທີ່ຝ່າຍຈັງຫວັດເລີຍຈະເປັນເຈົ້າພາບມີຄວາມສົມບູນຍິ່ງຂຶ້ນ.
ໂອກາດດັ່ງກ່າວ, ທ່ານຮອງຜູ້ຈັກຫວັດເລີຍ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ ແລະ ທ່ານເຈົ້າແຂວງວຽງຈັນ ກໍໄດ້ມີຄຳເຫັນໃຫ້ຄະນະກຳມະການຮ່ວມມື ຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ ແຂວງວຽງຈັນ-ຈັງຫວັດເລີຍ ຮ່ວມກັນປຶກສາຫາລື ແລະ ເປັນເອກະພາບກັນເພື່ອພ້ອມກັນຮັກສາໄດ້ຄວາມສະຫງົບຕາມແນວຊາຍແດນ, ພ້ອມກັນພັດທະນາຄວາມຮ່ວມມືໃຫ້ມີອັນໃໝ່ທີີ່ດີຂຶ້ນກວ່າເກົ່າ ແລະ ສ້າງຜົນປະໂຫຍດໃຫ້ແກ່ປະຊາຊົນ ແຂວງວຽງຈັນ – ຈັງຫວັດເລີຍ ທີ່ອາໄສຢູ່ລຽບຕາມຊາຍແດນຂອງ 2 ຝ່າຍໃຫ້ຫຼາຍທີ່ສຸດ. ຫຼັງຈາກນັ້ນຄະນະທັງ 2 ຝ່າຍ ຍັງໄດ້ລົງສຶກສາ, ຢ້ຽມຊົມບໍລິສັດ, ຫ້າງຮ້ານ, ຜູ້ປະກອບການ ໃນພື້ນທີ່ເມືອງວັງວຽງ, ເມືອງເຟືອງ ແລະ ດ່ານທ້ອງຖິ່ນ ບ້ານວັງ ເມືອງໝື່ນຕື່ມອີກ.
