ກອງປະຊຸມສະພາບໍລິຫານ ຄັ້ງທີ 34 ສະຖາບັນສັນຕິພາບ ແລະ ຄວາມປອງດອງອາຊຽນ ທີ່ຫລວງພະບາງ
ໃນຕອນບ່າຍຂອງວັນທີ 18 ສິງຫາ 2024 ທີ່ນະຄອນຫລວງພະບາງ, ທ່ານ ບໍວອນທັດ ດວງຈັກ, ເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອາຊຽນ ໃນນາມປະທານສະພາບໍລິຫານ ສະຖາບັນສັນ ຕິພາບ ແລະ ຄວາມປອງ ດອງອາຊຽນ ສໍາລັບປີ 2024 ໄດ້ເປັນປະທານກອງປະຊຸມສະພາບໍລິຫານ ຄັ້ງທີ 34 (34th Meeting of the ASEAN-IPR Governing Council). ຜູ້ແທນ ທີ່ເຂົ້າ ຮ່ວມກອງປະຊຸມດັ່ງກ່າວ ປະກອບມີບັນດາສະມາຊິກສະພາບໍລິຫານ ທີ່ເປັນຜູ້ຕາງ ໜ້າຈາກປະເທດສະມາຊິກອາຊຽນ, ຕີມໍແລັດສະເຕ ໃນນາມຜູ້ສັງເກດການ, ກອງເລ ຂາ ASEAN-IPR ແລະ ກອງເລຂາອາຊຽນ.
ກອງປະຊຸມສະພາບໍລິຫານຄັ້ງທີ 34 ໄດ້ປຶກສາຫາລື ຄວາມຄືບໜ້າການເຄື່ອນ ໄຫວວຽກງານຂອງ ສະຖາ ບັນ ສັນຕິພາບ ແລະ ຄວາມປອງດອງອາຊຽນ ໃນໄລຍະຜ່ານມາ ເຊັ່ນ: ບົດລາຍງານປະຈໍາປີ 2023, ບົດລາຍງານການເງິນ ປະຈໍາປີ 2023, ແຜນວຽກປະຈໍາປີຕັ້ງແຕ່ຕົ້ນປີ 2024 ມາຮອດປັດຈຸບັນ ແລະ ແຜນງົບປະມານປະຈໍາປີ 2025.
ນອກຈາກນີ້, ຍັງມີການລາຍງານ ຜົນການຈັດຕັ້ງປະຕິບັດບັນດາໂຄງ ການ ທັງພາຍໃນສະຖາບັນ ແລະ ໂຄງການຮ່ວມມືກັບບັນດາຄູ່ຮ່ວມມືພາຍນອກອາຊຽນ ແລະ ບົດສະເໜີໂຄງການໃໝ່ໆ ຈໍານວນໜຶ່ງ ເຊັ່ນ: ບົດສະເໜີໂຄງການຂອງສູນປະ ຕິບັດການສັນຕິພາບສາກົນຂອງເຢຍລະມັນ (ZIF) ແລະ ບົດສະເໜີໂຄງການຂອງມູນນິທິອາຊີກ່ຽວກັບການສ້າງຄວາມສາມາດໃນການພົວພັນຄູ່ຮ່ວມມືຍຸດທະສາດ ແລະ ຄວາມປອງດອງລະຫວ່າງອັງກິດ-ອາຊຽນ; ເຊິ່ງທັງໝົດນີ້ ແມ່ນຕ້ອງໄດ້ຮັບການພິຈາລະນາ ອະນຸມັດ ຈາກສະພາບໍລິຫານ ກ່ອນດໍາເນີນການຈັດຕັ້ງປະຕິບັດ ຕາມລໍາດັບ.
ປະທານກອງປະຊຸມ ຍັງໄດ້ຖືໂອກາດນີ້ນໍາສະເໜີ ແລະ ຊຸກຍູ້ໃຫ້ຜູ້ເຂົ້າຮ່ວມກອງປະຊຸມ ທີ່ມານະຄອນຫຼວງພະບາງເປັນຄັ້ງທໍາອິດ ຍາດໂອກາດໄປຢ້ຽມຢາມສະຖານທ່ອງທ່ຽວທີ່ສໍາຄັນທາງດ້ານວັດທະນະທໍາ, ທໍາມະຊາດ ແລະ ວິຖີການດໍາລົງຊີວິດຂອງປະຊາຊົນທ້ອງຖິນ ເຊິ່ງເປັນການປະກອບສ່ວນໃນການໂຄສະນາປີທ່ຽວທ່ຽວລາວ 2024 ອີກດ້ວຍ.
