ມາເລເຊຍຍົກລະດັບຄັດກອງຕາມຈຸດຜ່ານແດນ ສະກັດພະຍາດໝາກສຸກລີງ

      ລັດຖະບານມາເລເຊຍເພີ່ມການເຝົ້າລະວັງຕາມຈຸດຜ່ານແດນລະຫວ່າງປະເທດ ພາຍຫລັງອົງການອະນາໄມໂລກປະກາດສະຖານະການສຸກເສີນຈາກພະຍາດໝາກສຸກລີງອີກເທື່ອໜຶ່ງ.

      ວັນທີ 19 ສິງຫາ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກມາເລເຊຍອອກຖະແຫລງການກ່ຽວກັບການຍົກລະດັບມາດຕະການກວດຄັດກອງພະຍາດໝາກສຸກລີງ ຫລື ເອັມພັອກ ຢູ່ຈຸດຜ່ານແດນລະຫວ່າງປະເທດທຸກແຫ່ງ ລວມທັງຂໍການຮ່ວມມືໃຫ້ນັກເດີນທາງທີ່ມາຈາກປະເທດທີ່ມີການຢືນຢັນວ່າພົບຜູ້ຕິດເຊື້ອພະຍາດໝາກສຸກລີງສັງເກດອາການຂອງຕົນເອງຢ່າງໃກ້ຊິດເປັນເວລາ 21 ວັນ ນັບແຕ່ເດີນທາງມາເຖິງມາເລເຊຍ, ແຕ່ຍັງບໍ່ມີການລະບຸຈະແຈ້ງວ່າໜ່ວຍງານລັດຈະຕິດຕາມຜົນແນວໃດ.

      ຂະນະດຽວກັນ, ກະຊວງສາທາລະນະສຸກມາເລເຊຍຢືນຢັນວ່າ: ຫ້ອງປະຕິບັດການທາງວິທະຍາສາດທັງ 10 ແຫ່ງ ເຊິ່ງລວມທັງຫ້ອງປະຕິບັດການຂອງເອກະຊົນ 2 ແຫ່ງ ມີຄວາມພ້ອມໃນການວິເຄາະ ແລະ ຢືນຢັນການຕິດເຊື້ອ ໂດຍໃຊ້ຂະບວນການທາງວິທະຍາສາດ.

      ນອກຈາກນີ້, ກະຊວງສາທາລະນະສຸກມາເລເຊຍຂໍການຮ່ວມມືໃຫ້ປະຊາຊົນທີ່ມີອາການສົງໄສເຊັ່ນ: ມີຜືນ ແລະ ຕຸ່ມຕາມຮ່າງກາຍ ໃຫ້ຟ້າວໄປພົບແພດ.

      ທັງນີ້, ອົງການອະນາໄມໂລກ (WHO) ປະກາດໃນອາທິດຜ່ານມາ ໃຫ້ການແຜ່ລະບາດຂອງພະຍາດໝາກສຸກລີງເປັນສະຖານະການສຸກເສີນລະຫວ່າງປະເທດອີກ ພາຍຫລັງເຄີຍປະກາດມາແລ້ວ ລະຫວ່າງປີ 2022-2023 ໂດຍການປະກາດຄັ້ງນີ້ກ່ຽວຂ້ອງກັບກຸ່ມເຊື້ອໄວຣັສສາຍພັນໃໝ່ ເຄລດ 1 ບີ ເຊິ່ງກາຍພັນມາຈາກກຸ່ມສາຍພັນທີ 1 ຫລື ເຄລດ 1 ເຮັດໃຫ້ທຸກຝ່າຍກັງວົນວ່າສະຖານະການການແຜ່ລະບາດຂອງພະຍາດຈະຍິ່ງຮຸນແຮງ ເນື່ອງຈາກເຊື້ອເຄລດ 1 ມີຄວາມຮຸນແຮງລະດັບສູງສຸດໃນບັນດາທຸກສາຍພັນຢູ່ແລ້ວ ແລະ ມີອັດຕາການເສຍຊີວິດສູງເຖິງ 10%.