ຖະແຫລງ ກ່ຽວກັບງານວາງສະແດງດ້ານພະລັງງານຂອງອາຊຽນ ທີ່ຈະຈັດຂຶ້ນວັນທີ 24-27 ກັນຍານີ້
ວັນທີ 19 ສິງຫາ 2024 ນີ້, ກົມແຜນການ ແລະ ການຮ່ວມມື ກະຊວງ ພະລັງງານ ແລະ ບໍ່ແຮ່ ໄດ້ຈັດຖະແຫລງ ກ່ຽວກັບງານວາງສະແດງດ້ານພະລັງງານຂອງອາຊຽນ ຫລື ASEAN Energy Business Forum (24-AEBF) ທີ່ຈະຈັດຂຶ້ນພ້ອມກັບກອງປະຊຸມລັດຖະມົນຕີພະລັງງານອາຊຽນ ວັນທີ 24-27 ກັນຍາ 2024.
ທ່ານ ປອ ອາຄົມເດດ ວົງໄຊ ຫົວໜ້າກົມແຜນການ ແລະ ການຮ່ວມມື ກະຊວງ ພະລັງງານ ແລະ ບໍ່ແຮ່, ຫົວໜ້າເຈົ້າໜ້າທີ່ອາວຸໂສພະລັງງານອາຊຽນ ສປປ ລາວ ກ່າວວ່າ: ກອງປະຊຸມລັດຖະມົນຕີພະລັງງານອາຊຽນ AMEM ຄັ້ງທີ 42 ທີ່ຈະຈັດຂຶ້ນໃນລະຫວ່າງວັນທີ 24-27 ກັນຍາ 2024 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ. ເຊິ່ງກອງປະຊຸມ AMEM ຄັ້ງທີ 42 ນີ້ຈັດຂຶ້ນທຸກປີ ໂດຍການຜັດປ່ຽນກັນເປັນເຈົ້າພາບຈັດຂອງແຕ່ລະປະເທດສະມາຊິກອາຊຽນ. ທັງນີ້ກໍເພື່ອສຸມໃສ່ການປຶກສາຫາລືບັນດາເນື້ອໃນທີ່ສຳຄັນຂອງການຮ່ວມມືດ້ານພະລັງງານພາຍໃນອາຊຽນ ພ້ອມທັງການຜັນຂະຫຍາຍແຜນການດຳເນີນງານການຮ່ວມມືດ້ານພະລັງງານຂອງອາຊຽນ (APAEC) ໄລຍະທີ 2 (2016-2025), ລວມທັງໝາກຜົນ ແລະ ຄວາມຮຽກຮ້ອງຕ້ອງການ ຫລື ຂໍ້ສະເໜີຂອງອາຊຽນ ໃນໄລຍະຜ່ານມາຈາກກອງປະຊຸມ ແລະ ຈຸດປະສານງານຕ່າງໆ.
ຄຽງຄູ່ກັບກອງປະຊຸມລັດຖະມົນຕີພະລັງງານອາຊຽນ AMEM ຄັ້ງທີ 42 ຈະມີງານສໍາຄັນອີກງານໜຶ່ງຄື ການຈັດງານວາງສະແດງດ້ານພະລັງງານຂອງອາຊຽນ ຫລື ເອີ້ນວ່າ ASEAN Energy Business Forum, ເຊິ່ງເປັນງານວາງສະແດງທາງດ້ານພະລັງງານ ແລະ ຍັງມີການຈັດກອງປະຊຸມສໍາມະນາທີ່ສໍາຄັນໄປພ້ອມໆກັນ ໂດຍເປັນການສົ່ງເສີມການພັດທະນາຂະແໜງພະລັງງານຂອງອາຊຽນ. AEBF ເປັນເວທີທີ່ສໍາຄັນໃນການແລກປ່ຽນຂໍ້ມູນຂ່າວສານ ແລະ ເປັນການເປີດໂອກາດໃນການຮ່ວມມືສໍາລັບຜູ້ມີສ່ວນຮ່ວມທາງດ້ານພະລັງງານຂອງອາຊຽນລວມທັງນັກທຸລະກິດ, ຜູ້ສ້າງນະໂຍບາຍ, ນັກຄົ້ນຄວ້າຈາກພາກພື້ນ ແລະ ສາກົນ.
ໂອກາດນີ້, ທ່ານ Andy Tirta ຫົວໜ້າສູນພະລັງງານອາຊຽນ ໄດ້ນຳສະເໜີລາຍລະອຽດກ່ຽວກັບງານວາງສະແດງດ້ານພະລັງງານຂອງອາຊຽນ ຫລື AEBF-24 ເພື່ອເປັນການເຊີນຊວນ ຜູ້ເຂົ້າຮ່ວມຈາກຂະ ແໜງການຕ່າງໆ.
