6 ເດືອນຕົ້ນປີ ດ່ານພາສີສາກົນນໍ້າເງິນ ຈັດເກັບລາຍຮັບໄດ້ 358 ຕື້ກວ່າກີບ ຕົ້ນຕໍແມ່ນຈາກການນໍາເຂົ້ານໍ້າມັນເຊື້ອໄຟ

ທ່ານ ຕຸ້ຍ ຄໍາວັນດີ ຫົວໜ້າດ່ານພາສີສາກົນນໍ້າເງິນ ແຂວງໄຊຍະບູລີ ລາຍງານວ່າ: ປີ 2024ນີ້ ດ່ານພາສີສາກົນນໍ້າເງິນໄດ້ຮັບຕົວເລກແຜນການເກັບລາຍຮັບເຂົ້າງົບປະມານທັງໝົດ 703 ຕື້ກວ່າກີບ ແລະໃນ 6 ເດືອນຜ່ານມາ, ສາມາດປະຕິບັດໄດ້ທັງໝົດ 358 ຕື້ກວ່າກີບ ກວມເກືອບ51% ຂອງແຜນການປີ; ລາຍຮັບຕົ້ນຕໍຂອງດ່ານແມ່ນການນໍາເຂົ້ານໍ້າມັນເຊື້ອໄຟກວມເກືອບ 96% ຂອງລາຍຮັບທັງໝົດຍ້ອນວ່າບໍລິສັດທີ່ນໍາເຂົ້ານໍ້າມັນເຊື້ອໄຟຜ່ານດ່ານພາສີສາກົນນໍ້າເງິນເຖິງ 6 ບໍລິສັດ.

ສຳລັບທິດທາງແຜນການໃນ 6 ເດືອນທ້າຍປີນີ້ຈະສູ້ຊົນເກັບລາຍຮັບໃຫ້ໄດ້ຕາມແຜນ ຫລື ລື່ນແຜນການປີ, ພ້ອມທັງເພີ່ມທະວີຄວາມເຂັ້ມງວດ, ຕິດຕາມ ແລະ ກວດກາການປະຕິບັດໜ້າທີ່ຂອງພະນັກງານ, ເອົາໃຈໃສ່ຕິດຕາມກວດກາ-ຄຸ້ມຄອງການເສຍພາສີໃຫ້ຖືກຕ້ອງ, ຊອກຫາຖານຂໍ້ມູນລາຍຮັບທີ່ເປັນທ່າແຮງບົ່ມຊ້ອນ, ສືບຕໍ່ປຸກລະດົມ ແລະ ຊຸກຍູ້ຜູ້ປະກອບການໃຫ້ປະຕິບັດມອບພັນທະເຂົ້າງົບປະມານ; ສືບຕໍ່ໂຄສະນາເຜີຍແຜ່ກົດໝາຍພາສີ, ມະຕິຄໍາສັ່ງຕ່າງໆກ່ຽວກັບພາສີໃຫ້ຜູ້ປະກອບການ ແລະ ບຸກຄົນເພື່ອພ້ອມກັນນໍາໄປຈັດຕັ້ງປະຕິບັດໃຫ້ມີປະສິດທິພາບປະສິດທິຜົນ.

ປີ 2024 ນີ້ ການເກັບລາຍຮັບເຂົ້າງົບປະມານຂອງລັດ ຂອງດ່ານພາສີສາກົນນໍ້າເງິນ ເມືອງເງິນ ແຂວງໄຊຍະບູລີ ພົບຄວາມຫຍຸ້ງຍາກທາງດ້ານເສດຖະກິດ ເຮັດໃຫ້ເສດຖະກິດບໍ່ຂະຫຍາຍຕົວ, ລາຄານໍ້າມັນ, ລາຄາອາຍແກັສເພີ່ມຂຶ້ນ, ການແລກປ່ຽນເງິນຕາມີການເໜັງຕີງ, ບັນຫາເງິນເຟີ້ ບວກໃສ່ທ່າອ່ຽງການນໍາເຂົ້າສິນຄ້າໝວດຕ່າງໆຫລຸດລົງໂດຍສະເພາະການນໍາເຂົ້ານໍ້າມັນເຊື້ອໄຟ, ເຊິ່ງເປັນລາຍຮັບຕົ້ນຕໍຂອງດ່ານຫລຸດລົງ.