ຟີລິບປິນພົບຜູ້ຕິດເຊື້ອພະຍາດໝາກສຸກລີງຄົນທໍາອິດຂອງປີນີ້ ຍັງບໍ່ແນ່ນອນເປັນເຊື້ອສາຍພັນໃໝ່ ຫລື ບໍ່

      ໜ່ວຍງານສາທາລະນະສຸກຂອງຟີລິບປິນກວດພົບຜູ້ຕິດເຊື້ອພະຍາດໝາກສຸກລີງຄົນທໍາອິດຂອງປີນີ້ ແລະ ກໍາລັງລໍຖ້າການຢືນຢັນຢ່າງເປັນທາງການອີກເທື່ອໜຶ່ງຈາກຜູ້ຊ່ຽວຊານວ່າເປັນເຊື້ອສາຍພັນໃໝ່ທີ່ທຸກຝ່າຍກໍາລັງກັງວົນຢູ່ຕອນນີ້ ຫລື ບໍ່.

  ວັນທີ 19 ສິງຫາ 2024, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກຟີລິບປິນອອກຖະແຫລງການ ຢືນຢັນການກວດພົບຜູ້ຕິດເຊື້ອໄວຣັດ ໝາກສຸກລີງ ຫລື ເອັມພັອກ ຄົນທໍາອິດຂອງປະເທດໃນປີນີ້, ເປັນຜູ້ຊາຍອາຍຸ 33 ປີ ເຊິ່ງບໍ່ມີປະຫວັດເດີນທາງໄປຕ່າງປະເທດໃນໄລຍະຜ່ານມາ.

ທັງນີ້, ໜ່ວຍງານທີ່ກ່ຽວຂ້ອງກໍາລັງກວດຢ່າງລະອຽດວ່າເຊື້ອໄວຣັດດັ່ງກ່າວເປັນກຸ່ມສາຍພັນໃໝ່ ເຄລດ 1B ຫລື ບໍ່. ສະວີເດັນເປັນປະເທດທໍາອິດທີ່ຢືນຢັນໃນອາທິດຜ່ານມາວ່າພົບຜູ້ຕິດເຊື້ອພະຍາດໝາກສຸກລີງຈາກເຊື້ອໄວຣັດສາຍພັນດັ່ງກ່າວ ນອກທະວີບອາຟຣິກາ.

ສ່ວນອົງການອະນາໄມໂລກ (WHO) ປະກາດໃນອາທິດຜ່ານມາໃຫ້ການແຜ່ລະບາດຂອງພະຍາດ ໝາກສຸກລີງເປັນສະຖານະການສຸກເສີນດ້ານສາທາລະນະສຸກລະຫວ່າງປະເທດ, ນີ້ເປັນຄັ້ງທີສອງ ຕໍ່ຈາກການປະກາດໃນປີ 2022ຜ່ານມາ, ເນື່ອງຈາກມີຄວາມກັງວົນກ່ຽວກັບເຊື້ອ ເຄລດ 1B ເຊິ່ງມີສູນກາງການແຜ່ລະບາດຢູ່ ປະເທດ ກົງໂກ ແລະ ກໍາລັງລຸກລາມຢ່າງຕໍ່ເນື່ອງ.