ປກສ ຫລວງນ້ຳທາ ສຶກສາອົບຮົມໄວໜຸ່ມຜູ້ຊື້-ຂາຍ ໃບກະທ່ອມ ແລະ ຕຳນິວິຈານເຈົ້າໜ້າທີ່
ຂ່າວ ປກສ ແຂວງຫລວງນ້ຳທາ ລາຍງານວ່າ: ວັນທີ 12 ສິງຫາ 2024 ກອງພັນປ້ອງກັນເຄື່ອນທີ່ ປກສ ແຂວງຫລວງນໍ້າທາ ໄດ້ນຳເອົາຜູ້ ຊື້-ຂາຍໃບກະທ່ອມ 2 ຄົນ ແລະ ຜູ້ຕຳນິວິຈານ, ໃສ່ຮ້າຍປ້າຍສີການປະຕິບັດໜ້າທີ່ຂອງເຈົ້າໜ້າທີ່ຕຳຫລວດ 1 ຄົນ ມາສຶກສາອົບຮົມ ຢູ່ກອງພັນປ້ອງກັນເຄື່ອນທີ່ ປກສ ແຂວງ.
ພັນໂທ ສິງຄຳ ອຸດົມພອນ ຫົວໜ້າກອງພັນປ້ອງກັນເຄື່ອນທີ່ ປກສ ແຂວງຫລວງນໍ້າທາ ໃຫ້ຮູ້ວ່າ: ວັນທີ 9 ສິງຫານີ້ ໄດ້ຮັບແຫລ່ງຂ່າວວ່າມີກຸ່ມໄວໜຸ່ມຈຳນວນໜຶ່ງໄດ້ພົວພັນ ຊື້-ຂາຍ ແລະ ມົ້ວສຸມນໍ້າກະທ່ອມຢູ່ຫ້ອງແຖວ ເຂດບ້ານທົ່ງໃຈ້ໃຕ້ ເມືອງ ແລະ ແຂວງຫລວງນໍ້າທາ. ເຈົ້າໜ້າທີ່ຈຶ່ງລົງພື້ນທີ່ຕົວຈິງ ພົບເຫັນໄວໜຸ່ມ 2 ຄົນ ທີ່ເຊົ່າຫ້ອງແຖວນັ້ນ ຈຶ່ງຂໍອະນຸຍາດກວດຄົ້ນ, ຜ່ານການກວດຄົ້ນພົບເຫັນໃບກະທ່ອມ ແລະ ນໍ້າຢາ 22 ຊຸດ ດັ່ງນັ້ນຈຶ່ງໄດ້ນຳເອົາພວກກ່ຽວມາສອບສວນ.
ຈາກການສອບສວນພວກກ່ຽວຮັບສາລະພາບວ່າ: ໃບກະທ່ອມດັ່ງກ່າວແມ່ນຂອງຕົນແທ້, ເຊິ່ງໄດ້ສັ່ງຊື້ທາງອອນລາຍ ແລະ ຝາກມາທາງບໍລິສັດຂົນສົ່ງແຫ່ງໜຶ່ງ ເພື່ອນຳມາຂາຍໃຫ້ກຸ່ມໄວໜຸ່ມ ແລະ ໄດ້ຂາຍໄປແລ້ວ 3 ຊຸດ.
ສຳລັບຜູ້ທີ່ວິຈານ, ໃສ່ຮ້າຍປ້າຍສີການປະຕິບັດໜ້າທີ່ວຽກງານຂອງເຈົ້າໜ້າທີ່ຕຳຫລວດແມ່ນໃຫ້ຢຸດເຊົາການສ້າງຄວາມປັ່ນປ່ວນໃຫ້ແກ່ສັງຄົມ, ຮັບຮູ້ໃນສິ່ງທີ່ຜິດ; ພ້ອມທັງໄດ້ແນະນຳໃຫ້ຄອບຄົວກໍຄືພໍ່ແມ່, ຜູ້ປົກຄອງ ເປັນເຈົ້າການຕິດຕາມກວດກາສຶກສາອົບຮົມ ລູກ-ຫລານ ບໍ່ໃຫ້ເຂົາເຈົ້າໄປພົວພັນກັບສິ່ງເສບຕິດທຸກປະເພດ.
