ຜູ້ຊ່ຽວຊານດ້ານສິດທິມະນຸດອົງການ ສປຊ ຈະມາຢ້ຽມຢາມ ສປປ ລາວ

- advert banner 728 90 728x90 - ຜູ້ຊ່ຽວຊານດ້ານສິດທິມະນຸດອົງການ ສປຊ ຈະມາຢ້ຽມຢາມ ສປປ ລາວ

ແຫລ່ງຂ່າວ ຂປລ ລາຍງານວ່າ: ຜູ້ຊ່ຽວຊານດ້ານສິດທິມະນຸດຂອງອົງການສະຫະປະຊາຊາດ (ສປຊ) ຈະເດີນທາງມາຢ້ຽມຢາມ ສປປ ລາວ ຢ່າງເປັນທາງການໃນລະຫວ່າງວັນທີ 8-16 ພະຈິກນີ້, ເພື່ອປະເມີນສະພາບສິດທິເດັກໃນ ສປປ ລາວ.

- new3 - ຜູ້ຊ່ຽວຊານດ້ານສິດທິມະນຸດອົງການ ສປຊ ຈະມາຢ້ຽມຢາມ ສປປ ລາວ

ທ່ານນາງ ມາອຸດ ເດິ ໂບແອ໋-ບຸຄິກຊິໂອ໋ (Maud de Boer-Buquicchio), ຜູ້ລາຍງານພິເສດຂອງ ສປຊ ກ່ຽວກັບການຄ້າຂາຍ ແລະ ການກົດຂີ່ຂູດຮີດເດັກ ກ່າວວ່າ: “ຂ້າພະເຈົ້າ ຕີລາຄາສູງຕໍ່ການເຊື້ອເຊີນຂອງລັດຖະບານລາວ ໃນການມາຢ້ຽມຢາມໃນຄັ້ງນີ້, ຂ້າພະເຈົ້າ ຈະປະເມີນກ່ຽວກັບຄວາມສ່ຽງ ແລະ ລວມທັງມາດຕະການທີ່ມີເພື່ອຕ້ານ ແລະ ສະກັດກັ້ນບັນຫາການຂູດຮີດເດັກ ແລະ ສິ່ງທ້າທາຍທີ່ມີໃນປະເທດ.”

ທ່ານ ນາງ ມາອຸດ ເດິ ໂບແອ໋-ບຸຄິກຊິໂອ໋ ກ່າວຕື່ມວ່າ: “ຂ້າພະເຈົ້າຈະຂໍຖືໂອກາດນີ້ເຂົ້າເຖິງເດັກ ທີ່ເຄາະຮ້າຍຈາກການທາລຸນ, ການໃຊ້ຄວາມຮຸນແຮງ, ການກົດຂີ່ຂູດຮີດ ແລະ ເດັກທີ່ຢູ່ໃນສະພາບມີຄວາມສ່ຽງ ເຊັ່ນ: ເດັກທີ່ມີການເຄື່ອນຍ້າຍ, ເດັກຈາກຊົນເຜົ່າ ແລະ ເດັກທີ່ຢູ່ໃນສະຖາບັນຕ່າງໆ ເພື່ອຮັບຟັງຄວາມຄິດເຫັນຂອງເຂົາເຈົ້າ ແລະ ນໍາເອົາຄວາມຄິດເຫັນຂອງເຂົາເຈົ້າເຫລົ່ານັ້ນ ມາປະກອບເຂົ້າໃນຂໍ້ສະເໜີແນະຕໍ່ລັດຖະບານ ແລະ ພາກສ່ວນທີ່ກ່ຽວຂ້ອງ”.

ການມາຢ້ຽມຢາມຄັ້ງນີ້, ຜູ້ລາຍງານພິເສດຂອງ ສປຊ ຈະໄດ້ລົງຢ້ຽມຢາມສູນດູແລ ແລະ ຟື້ນຟູເດັກ, ສະຖານທີ່ພັກເຊົາສໍາລັບຜູ້ເຄາະຮ້າຍຈໍານວນໜຶ່ງຢູ່ນະຄອນຫລວງວຽງຈັນ ແລະ ຈະເດີນທາງໄປແຂວງວຽງຈັນ, ອຸດົມໄຊ, ຈໍາປາສັກ ແລະ ແຂວງສາລະວັນ ເພື່ອພົບກັບບັນດາຜູ້ຕາງໜ້າຈາກພາກລັດ, ໂດຍສະເພາະແມ່ນບັນດາຜູ້ບໍລິຫານ, ເຈົ້າໜ້າທີ່ຍຸຕິທໍາ ແລະ ຝ່າຍຕຸລາການ, ອໍານາດການປົກຄອງແຂວງ, ທ້ອງຖິ່ນ, ຜູ້ຕາງໜ້າຂອງສະມາຄົມ ແລະ ອົງການຈັດຕັ້ງສາກົນ ທີ່ບໍ່ສັງກັດລັດ, ຂະແໜງການເອກະຊົນ ແລະ ສະມາຊິກຂອງອົງກອນສາກົນອື່ນໆ.

ວັນທີ 16 ພະຈິກ 2017, ຜູ້ລາຍງານພິເສດ ຈະນໍາສະເໜີກ່ຽວກັບຂໍ້ສັງເກດເບື້ອງຕົ້ນຂອງລາວຕໍ່ສື່ມວນຊົນລາວ, ຊຶ່ງຈະຈັດຂຶ້ນຢູ່ສໍານັກງານຂອງອົງການສະຫະປະຊາຊາດ. ພາຍຫລັງສຳເລັດການຢ້ຽມຢາມ, ຜູ້ລາຍງານພິເສດຈະໄດ້ນໍາສະເໜີບົດລາຍງານລະອຽດກ່ຽວກັບການມາຢ້ຽມຢາມ ສປປ ລາວ ຕໍ່ສະພາສິດທິມະນຸດຂອງອົງການ ສປຊ.

error: Content is protected !!