ແຈ້ງການ ການຊໍາລະພັນທະ ດ້ວຍເງິນຕາຕ່າງປະເທດ ພາຍໃນປະເທດ

ອີງຕາມ ກົດໝາຍວ່າດ້ວຍ ການຄຸ້ມຄອງສ່ວຍສາອາກອນ ສະບັບເລກທີ 66/ສພຊ, ລົງວັນທີ 17 ມິຖຸນາ 2019; ອີງຕາມ ລັດຖະບັນຍັດຂອງປະທານປະເທດ ວ່າດ້ວຍ ຄ່າທໍານຽມ ແລະ ຄ່າບໍລິການ ສະບັບເລກທີ 002/ປປທ, ລົງວັນທີ 17 ມິຖຸນາ 2021;

ອີງຕາມຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຫ້ອງການກະຊວງການເງິນ ສະບັບເລກທີ 6118/ກງ ລົງວັນທີ 10 ທັນວາ 2021;

ອີງຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 779/ຫສນຍ, ລົງວັນທີ13 ກໍລະກົດ 2021;

ອີງຕາມ ໜັງສືແຈ້ງຕອບ ຂອງທະນາຄານແຫ່ງ ສປປ ລາວ ສະບັບເລກທີ 109/ທຫລ,ລົງວັນທີ 10 ສິງຫາ 2021; ອີງຕາມ ຄໍາເຫັນຊີ້ນໍາຂອງທ່ານ ລັດຖະມົນຕີ ກະຊວງການເງິນ ຄັ້ງວັນທີ 02 ສິງຫາ 2024 ຕໍ່ກັບ ໜັງສືລາຍງານ ຂອງກົມສ່ວຍສາອາກອນ ສະບັບເລກທີ 5258/ກສອ, ລົງວັນທີ 26 ກໍລະກົດ 2024.

ເພື່ອໃຫ້ການຊໍາລະພັນທະປະເພດຕ່າງໆ ຢູ່ພາຍໃນປະເທດ ສອດຄ່ອງຕາມກົດໝາຍ ແລະ ຕາມສັນຍາທີ່ ກໍານົດໄວ້ ຖືກຈັດຕັ້ງປະຕິບັດ ໃຫ້ເປັນເອກະພາບກັນໃນຂອບເຂດທົ່ວປະເທດ, ຫ້ອງການກະຊວງການເງິນຂໍຖືເປັນກຽດແຈ້ງມາຍັງ ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ດໍາເນີນທຸລະກິດ ຢູ່ ສປປ ລາວ ໃນຂອບເຂດທົ່ວປະເທດ ຊາບດັ່ງນີ້:

1. ບຸກຄົນ, ນິຕິບຸກຄົນ ຫຼື ການຈັດຕັ້ງ ຕ້ອງມອບ ພັນທະອາກອນ, ຊັບສິນ, ຄ່າທໍານຽມ ແລະ ຄ່າບໍລິການ ລວມ ທັງຄ່າປັບໃໝ ຜ່ານລະບົບທະນາຄານ ຫຼື ຄັງເງິນແຫ່ງຊາດ ດ້ວຍ ເງິນສົດ, ແຊັກ, ເງິນໂອນ ຫຼື ຮູບການອື່ນ ຕາມ ສັນຍາທີ່ໄດ້ກໍານົດໄວ້ ລະຫວ່າງເຈົ້າຂອງໂຄງການ ແລະ ຜູ້ຮັບເຫມົາ ຫຼື ຕາມການຊື້-ຂາຍຕົວຈິງ ໂດຍອີງຕາມ ມາດຕາ 31 ຂອງກົດໝາຍວ່າດ້ວຍການຄຸ້ມຄອງສ່ວຍສາອາກອນ ສະບັບເລກທີ 66/ສພຊ, ລົງວັນທີ 17 ມິຖຸນາ 2019 ແລະ ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ເລກທີ 799/ຫສນຍ, ລົງວັນທີ 13 ກໍລະກົດ 2021, ແຕ່ຕ້ອງບັນທຶກເປັນລາຍຮັບງົບປະມານເປັນສະກຸນເງິນກີບ ເພື່ອການສົມທຽບກັບຄັງເງິນ ແຫ່ງຊາດ ຕາມການແຈ້ງເສຍອາກອນແຕ່ລະປະເພດບົນພື້ນຖານອັດຕາແລກປ່ຽນຂອງທະນາຄານ ທີ່ປະກາດ ໃຊ້ໃນແຕ່ລະໄລຍະ;

2. ສໍາລັບ ຄ່າເຊົ່າ ແລະ ຄ່າສໍາປະທານ ທີ່ດິນຂອງລັດເທົ່ານັ້ນ ທີ່ສາມາດຊໍາລະເປັນເງິນຕາຕ່າງປະເທດ ຫຼື ເງິນກີບ ກໍໄດ້ ຕາມລັດຖະບັນຍັດປະທານປະເທດ ສະບັບເລກທີ 02/ປປທ, ລົງວັນທີ 18 ພະຈິກ 2009 ວ່າດ້ວຍ ອັດຕາຄ່າເຊົ່າ ແລະ ສໍາປະທານທີ່ດິນຂອງລັດ ໃນມາດຕາ 15 ແມ່ນກໍານົດໄວ້;

3. ມອບໃຫ້ ກົມສ່ວຍສາອາກອນ, ກົມຄຸ້ມຄອງຊັບສິນແຫ່ງລັດ, ກົມຄຸ້ມຄອງວິສາຫະກິດລັດລົງທຶນ ແລະ ການ ປະກັນໄພ ແລະ ພາກສ່ວນທີ່ກ່ຽວຂ້ອງ ເພື່ອຊຸກຍູ້ ແລະ ເຜີຍແຜ່ ການຈັດຕັ້ງປະຕິບັດ ໃຫ້ມີປະສິດທິຜົນ, ໂປ່ງ ໃສ ແລະ ຮັບປະກັນການເກັບລາຍຮັບດັ່ງກ່າວ ເຂົ້າງົບປະມານແຫ່ງລັດໃຫ້ຄົບຖ້ວນ.

ດັ່ງນັ້ນ, ຈຶ່ງແຈ້ງມາເພື່ອຊາບ ແລະປະຕິບັດຕາມແຈ້ງການສະບັບນີ້ຢ່າງເຂັ້ມງວດ.