ກົມຄຸ້ມຄອງບໍ່ແຮ່ ແຈ້ງໃຫ້ບໍລິສັດລົງທຶນດ້ານແຮ່ທາດ ທົ່ວປະເທດ ຕິດຕາມ-ກວດກາ ດິນເຊາະເຈື່ອນ, ດິນຊຸດຕົວ, ອ່າງບັນຈຸສານເຄມີ, ອ່າງຫາງແຮ່, ອ່າງຫາງແຮ່, ອ່າງດັກຕະກອນ ໃນຊ່ວງລະດູຝົນ

ວັນທີ 20 ສິງຫາ 2024, ກົມຄຸ້ມຄອງບໍ່ແຮ່, ກະຊວງພະລັງງານ ແລະ ບໍ່ແຮ່ ໄດ້ອອກແຈ້ງການເຖິງ ປະທານ/ອໍານວຍການ ບໍລິສັດລົງທຶນດ້ານແຮ່ທາດ ໃນຂອບເຂດທົ່ວປະເທດຊາບວ່າ: ອີງຕາມຂໍ້ມູນຈາກກົມອຸຕຸນິຍົມ ແລະ ອຸທົກກະ ສາດ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຄັ້ງວັນທີ 20 ສິງຫາ 2024 ໃຫ້ຮູ້ວ່າ ຮ່ອງຄວາມກົດດັນອາກາດຕໍ່າຍັງພາດຜ່ານຢູ່ພາກເໜືອຂອງປະເທດລາວ, ສົມທົບກັບກະແສລົມມໍລະສຸມຕາເວັນຕົກສ່ຽງໃຕ້ພັດປົກຄຸມ, ເຊິ່ງຍັງຈະມີຝົນຕົກຟ້າຮ້ອງ ຟ້າເຫລື້ອມໃນລະດັບຄ່ອຍຢູແຕ່ລະພາກ ແລະ ຈະມີຝົນຕົກ ໃນລະດັບປານກາງ ຫາ ຕົກໜັກ ສືບຕໍ່ອີກຫລາຍວັນ ຢູ່ບາງທ້ອງຖິ່ນ ທາງແຂວງພາກເໜືອ ແລະ ພາກກາງ ແລະ ອາດຈະ ເຮັດໃຫ້ເກີດມີນ້ຳຖ້ວມ, ດິນເຊາະເຈື່ອນ.

ສະນັ້ນ, ເພື່ອຮັບມືກັບສະພາບການທີ່ອາດສົ່ງຜົນກະທົບຕໍ່ໂຄງການບໍ່ແຮ່, ກົມຄຸ້ມຄອງບໍ່ແຮ່ ຈຶ່ງແຈ້ງໃຫ້ບໍລິສັດລົງທຶນດ້ານແຮ່ທາດ ເອົາໃຈໃສ່:

1. ເພີ່ມທະວີມາດຕະການຕິດຕາມ-ກວດກາ ອ່າງບັນຈຸສານເຄມີ, ອ່າງຫ່າງແຮ່, ອ່າງດັກຕະກອນ ໃນເຂດໂຄງການຂອງຕົນໃນລະດູຝົນນີ້ ເພື່ອຮັບປະກັນໃຫ້ມີຄວາມໝັ້ນຄົງ, ແໜ້ນໜາ ແລະ ປອດໄພ ໂດຍມີການສ້າງຕັ້ງໜ່ວຍງານ ຕິດຕາມ-ກວດກາ ແລະ ເຝົ້າລະວັງ;

2. ໃຫ້ບໍລິສັດເອົາໃຈໃສ່ຕິດຕາມ-ກວດກາ ແລະ ເຝົ້າລະວັງ ການເຊາະເຈື່ອນ, ການຍຸບຕົວຂອງດິນ (Land Slide) ໃນເຂດຂຸດຄົ້ນ ໂດຍສະເພາະໂຄງການຂຸດຄົ້ນແຮ່ທາດຫາຍາກ ຢູ່ແຂວງຊຽງຂວາງ ແລະ ຫົວພັນ ທີ່ມີການຂຸດຄົ້ນ ແບບລະລາຍແຮ່ກັບທີ່ (In Situ Leaching) ໂດຍການຄວບຄຸມປະລິມານສານເຄມີທີ່ໃຊ້ ລະລາຍແຮ່ ເພື່ອເປັນການຫຼຸດປະລິມານນໍ້າທີ່ສະສົມຢູ່ໃນດິນ;

3. ໃຫ້ບໍລິສັດສ້າງແຜນຮັບມືສຸກເສີນ ໃນກໍລະນີເກີດເຫດການ ດິນເຈື່ອນ, ດິນຍຸບຕົວ, ອ່າງບັນຈຸສານເຄມີ, ອ່າງຫ່າງແຮ່, ອ່າງດັກຕະກອນ ຫາກມີການແຕກຫັກ ຫລື ຮົ່ວຊຶມ, ເພື່ອຫລຸດຜ່ອນຜົນກະທົບທີ່ອາດຈະເກີດຂຶ້ນ, ພ້ອມນັ້ນກໍໃຫ້ບໍລິສັດເອົາໃຈໃສ່ຕິດຕາມການລາຍງານສະພາບພະຍາກອນອາກາດເປັນລາຍວັນ ເພື່ອວາງແຜນຮັບມືໃນກໍລະນີມີຝົນຕົກໜັກຕິດຕໍ່ກັນຫລາຍວັນ;

4. ໃນກໍລະນີເກີດເຫດການສຸກເສີນເປັນຕົ້ນ: ດິນເຈື່ອນ, ດິນຍຸບຕົວ, ອ່າງບັນຈຸສານເຄມີ, ອ່າງຫ່າງແຮ່, ອ່າງດັກຕະກອນ ຫາກມີການແຕກຫັກ ຫລື ຮົ່ວຊຶມ ໃຫ້ ບໍລິສັດຮີບຮ້ອນແກ້ໄຂບັນຫາທີ່ເກີດຂຶ້ນ ແລະ ລາຍງານ ໃຫ້ພາກສ່ວນທີ່ກ່ຽວຂ້ອງຂອງລັດຮັບຊາບ ພາຍໃນ 24 ຊົ່ວໂມງ ຕາມທີ່ໄດ້ກໍານົດໄວ້ໃນມາດຕາ 95 ຂອງ ກົດໝາຍວ່າດ້ວຍແຮ່ທາດ.