ທ່ານ​ນາຍົກລັດຖະມົນຕີເຄື່ອນ​ໄຫວ​ຢ້ຽມຢາມ​ແຂວງ​ອຸດົມ​ໄຊ

- advert banner 728 90 728x90 - ທ່ານ​ນາຍົກລັດຖະມົນຕີເຄື່ອນ​ໄຫວ​ຢ້ຽມຢາມ​ແຂວງ​ອຸດົມ​ໄຊ

​ວັນ​ທີ 4 ພະຈິກນີ້, ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ພ້ອມ​ດ້ວຍ​ພັນ​ລະ​ຍາ ​ແລະ ຄະນະ ​ໄດ້​ສືບຕໍ່​ຢ້ຽມຢາມ ​ແລະ ​ເຮັດ​ວຽກຢູ່​ແຂວງອຸດົມ​ໄຊ, ​ເຊິ່ງມີ ທ່ານ ຄຳ​ພຽງ ຢາ​ຈົງ​ວາ ​ຮອງເຈົ້າ​ແຂວງອຸດົມ​ໄຊ, ພ້ອມດ້ວຍ​ຄະ​ນະ​ນຳ​ແຂວງໃຫ້ການ​ຕ້ອນຮັບ​ຢ່າງອົບອຸ່ນ.

- new3 - ທ່ານ​ນາຍົກລັດຖະມົນຕີເຄື່ອນ​ໄຫວ​ຢ້ຽມຢາມ​ແຂວງ​ອຸດົມ​ໄຊ

​ໃນໂອກາດດັ່ງກ່າວ, ທ່ານຮອງເຈົ້າແຂວງ​ໄດ້​ລາຍ​ງານສະພາບການຈັດຕັ້ງປະຕິບັດ​ແຜນພັດທະນາເສດຖະກິດ-ສັງຄົມ 9 ເດືອນ​ຜ່ານ​ມາໃຫ້ທ່ານນາຍົກລັດຖະມົນຕີຊາບວ່າ: ເສດຖະກິດຂອງແຂວງໄດ້ຂະຫຍາຍຕົວຢ່າງຕໍ່ເນື່ອງ​ໃນ​ລະດັບ 6,11%, ລວມຍອດຜະລິດຕະພັນພາຍໃນ (GDP) ບັນລຸໄດ້ 3.519 ຕື້ກີບ, ສະເລ່ຍລາຍ​ຮັບຕໍ່ຫົວຄົນໄດ້ 1.368 ໂດລາ ຕໍ່ຄົນ​ຕໍ່ປີ, ສ່ວນລາຍຮັບເຂົ້າງົບປະມານບັນລຸໄດ້ 68,62 ຕື້ກີບ, ເທົ່າກັບ 65% ຂອງແຜນການ, ໃນປີ 2017 ໄດ້ຮັບອະນຸມັດໂຄງການລົງທຶນທັງໝົດ 90 ໂຄງການ, ລວມມີມູນຄ່າ 92,8 ກວ່າ​ຕື້ກີບ, ມາຮອດປັດຈຸບັນປະຕິບັດສໍາເລັດແລ້ວ 78 ໂຄງການ, ເທົ່າ​ກັບ 86,67% ຂອງ​ແຜນ​ການ. ​ດ້ານ​ວຽກງານ​ພັດທະນາ​ຊົນນະບົດ ​ແລະ ​ແກ້​ໄຂ​ຄວາມທຸກ​ຍາກ ແຂວງອຸດົມໄຊ ມີເມືອງທຸກ 2 ເມືອງ ຄື: ເມືອງງາ ແລະ ເມືອງປາກແບງ, ມີ 194 ບ້ານ​ທຸກ​ຍາກ ກວມ​ 41,1%,  ມີພົນລະເມືອງທຸກຍາກ 81,376 ຄົນ ກວມ 26,84%.

​ໂອກາດ​ນີ້, ທ່ານ ທອງ​ລຸນ ສີ​ສຸ​ລິດ ກໍ່​ໄດ້​ສະ​ແດງ​ຄວາມ​ຊົມ​ເຊີຍຕໍ່​ຄະນະພັກ-ຄະນະ​ນຳ​ແຂວງ, ​ໄດ້​ພ້ອມພຽງຮຽງໜ້າກັບ​ປະຊາຊົນ​​ຍາດ​ໄດ້ຜົນ​ງານ​ການ​ພັດທະນາ​ໃນຫຼາຍໆດ້ານ, ອັນ​ສຳຄັນກໍ​ແມ່ນ​ຄວາມ​ເອົາ​ໃຈ​ໃສ່ລົງ​ໃກ້ຊິດຕິດແທດ​ຂອງ​ການ​ນຳ​ແຂວງຕໍ່ກັບ​ການ​ເກີດ​ໄພພິບັດ​ນ້ຳ​ຖ້ວມ​ທີ່​ຫາກໍ່ຜ່ານ​ພົ້ນ​ໄປ ​ໄດ້​ຢ່າງ​ທັນ​ການ. ພ້ອມ​ນີ້, ທ່ານ​ນາຍົກລັດຖະມົນຕີ ໄດ້​ຍົກ​ໃຫ້​ເຫັນຄວາມ​ພະຍາຍາມ ​ແລະ ຄວາມ​ເອົາ​ໃຈ​ໃສ່ຂອງ​ສູນ​ກາງ​ພັກ ​ແລະ ລັດຖະບານ ​ໃນ​ການຈັດຕັ້ງຜັນ​ຂະຫຍາຍມະຕິ​ກອງ​ປະຊຸມ​ໃຫຍ່ ຄັ້ງທີ X ຂອງ​ພັກ ກໍ່ຄື​ແຜນ​ພັດທະນາ​ເສດຖະກິດ-ສັງຄົມ 5 ປີ ຄັ້ງທີ 8 ​ແລະ ​ການວາງ​ແນວທາງ​ນະ​ໂຍບາຍ, ບັນດາ​ນິຕິ​ກຳ, ສ້າງ ​ແລະ ປັບປຸງ​ກົດໝາຍ, ລຸ່ມ​ກົດໝາຍ ​ແລະ ພ້ອມ​ກັນ​ແກ້​ໄຂ​ບັນດາ​ຈຸດ​ອ່ອນ-ຂໍ້ຄົງຄ້າງຕ່າງໆ ​ໃຫ້​ລຸ​ລ່ວງ​ໄປ​ໄດ້​ດ້ວຍ​ດີ; ດ້ວຍ​ຈຸດ​ພິ​ເສດ​ຂອງ​ແຂວງ​ອຸດົມ​ໄຊ ທີ່​ເປັນ​ແຂວງ​ຕັ້ງຢູ່​ຈຸດ​ໃຈກາງ​ຂອງ​ບັນດາ​ແຂວງ​ພາກ​ເໜືອ ​ແລະ ມີຫຼາຍ​ເງື່ອນ​ໄຂ-ຫຼາຍທ່າ​ແຮງ​ບົ່ມ​ຊ້ອນ ​ເພື່ອ​ການ​ດຶງ​ດູດ​ການ​ລົງທຶນ ທັງ​ຄວາມ​ອຸດ​ດົມ​ສົມບູນທາງ​ດ້ານຊັບພະຍາກອນ​ທຳ​ມະ​ຊາດ, ການ​ບໍລິການ​ທາງ​ຜ່ານ, ການທ່ອງທ່ຽວ ​ແລະ ທ່າ​ແຮງ​ການ​ຜະລິດ​ທີ່​ເປັນ​ມູນ​ເຊື້ອ ທ່ານ​ນາຍົກລັດຖະມົນຕີ ຈຶ່ງ​ໄດ້​ເນັ້ນ​ໃຫ້​ຄະນະ​ພັກ-ຄະນະ​ນຳ​ແຂວງ ຕ້ອງ​ໄດ້​ເອົາ​ໃຈ​ໃສ່​ຊີ້ນຳ-ນຳພາປະຊາຊົນ ພ້ອມ​ກັນ​ພັດທະນາ​ແຂວງ ​ໃຫ້​ມີ​ບາດກ້າວ​ອັນ​ໃໝ່; ​​ເອົາ​ໃຈ​ໃສ່​ຖອດ​ຖອນ​ບົດຮຽນ ຈາກ​ບັນດາ​ຈຸດ​ອ່ອນ-ຂໍ້ຄົງ​ຄ້າງ​ທີ່​ຜ່ານ​ມາ ​ເພື່ອ​ບືນ​ຕົວ​ຂຶ້ນຢ່າງ​ຕັ້ງໜ້າ; ພ້ອມ​ນີ້, ກໍ່​ໃຫ້​ສ້າງ​ຂະ​ບວນການ​ນຳພາ ​ໃຫ້​ກາຍ​ເປັນ​ແບບຢ່າງ​ທີ່​ດີ ​ໃຫ້​ແກ່​ສະມາຊິກ​ພັກ ​ແລະ ພະນັກງານ​ທົ່ວ​ໄປ, ຕັດສິນ​ໃຈ​ນຳພາ ຕາມຫຼັກການ​ລວມສູນ​ປະຊາທິປະ​ໄຕ, ນຳພາ​ເປັນໝູ່ຄະນະ ບຸກຄົນ​ຮັບຜິດຊອບ.

ໃນໂອກາດ​ນີ້, ທ່ານ​ນາຍົກລັດຖະມົນຕີ ພ້ອມ​ດ້ວຍ​ຄະນະ ຍັງ​ໄດ້​ເດີນທາງ​ໄປ​ຢ້ຽມຊົມ ​ແລະ ຕິດຕາມ​ຄວາມ​ຄືບໜ້າ ຂອງໂຄງການ​ກໍ່ສ້າງ​ທາງ​ລົດ​ໄຟ ລາວ-ຈີນ ທີ່​ຈຸດ​ກໍ່ສ້າງ​ສະຖານີລົດ​ໄຟ​ໃຫຍ່ ​ແລະ ການຈັດ​ສັນ​ປະຊາຊົນ​ເຂດ​ບ້ານ​ຖິ່ນ ​ເມືອງ​ໄຊ ​ແລະ ຈຸດ​ເຈາະ​ອຸ​ໂມງ​ເຂດຫຼັກ 8 ​ເມືອງ​ໄຊ ​ເຊິ່ງ​ເປັນ​ສອງ​ຈຸດ​ສຳຄັນທີ່​ພວມ​ລົງມື​ກໍ່ສ້າງ​ໃນຊ່ວງ​ໄລຍະ​ຜ່ານ​ແຂວງອຸດົມ​ໄຊ, ມີ​ລວງຍາວ​ທັງ​ໝົດ 126,6 ກິ​ໂລ​ແມັດ, ມີ 9 ສະຖານີ, ຂົວ 57 ​ແຫ່ງ (ຍາວ 12.695 ​ແມັດ), ມີ 34 ອຸ​ມຸງ (ຍາວ 75.722 ​ແມັດ). ປັດຈຸ​ບັນ, ພວມ​ຈັດຕັ້ງປະຕິບັດ 3 ສັນຍາ ​ໂດຍ​ໄດ້​ລົງມື​ເຈາະ​ອຸ​ມຸງ 42 ຈຸດ, ຍາວ 7.679 ​ແມັດ, ສັງ​ລວມ​ແລ້ວມາຮອດປັດຈຸບັນການ​ກໍ່ສ້າງ​ທາງ​ລົດ​ໄຟໃນເຂດດັ່ງກ່າວມີ​ຄວາມ​ຄືບໜ້າແລ້ວ 10%.

+ທ່ານ​ນາຍົກລັດຖະມົນຕີ ​​ຢ້ຽມຢາມ​ແຂວງ​ບໍ່​ແກ້ວ

error: Content is protected !!