ອິດສະລາແອນສັງຫານແກນນໍາສາຍທະຫານຟາຕາ ເຈລະຈາຢຸດຍິງກາຊາຢຸດສະງັກ

     ອິດສະລາແອນຢືນຢັນການສັງຫານໜຶ່ງໃນສະມາຊິກລະດັບສູງຂອງກອງກໍາລັງໃນສັງກັດພັກຟາຕາ. ຂະນະທີ່ລັດຖະມົນຕີຕ່າງປະເທດອາເມລິກາສໍາເລັດພາລະກິດຫລ້າສຸດຢູ່ຕາເວັນອອກກາງ ໂດຍບໍ່ສາມາດຊຸກຍູ້ໃຫ້ການເຈລະຈາຢຸດຍິງຢູ່ເຂດກາຊາຄືບໜ້າໄດ້.

      ວັນທີ 22 ສິງຫາ, ສໍານັກຂ່າວຕ່າງປະເທດລາຍງານວ່າ: ກອງທັບອິດສະລາແອນອອກຖະແຫລງການວ່າ: ປະຕິບັດການໂຈມຕີທາງອາກາດຢູ່ເມືອງໄຊດອນ ທາງພາກໃຕ້ຂອງລີບັງ ໃນວັນທີ 21 ສິງຫາຜ່ານມາ ເພື່ອສັງຫານພີ່ນ້ອງຂອງທ່ານ ມູເນຍ ອັລ ມັກດາ ຜູ້ນໍາກອງກໍາລັງທາງທະຫານຂອງພັກຟາຕາ ເຊິ່ງເປັນພັກລັດຖະບານປາແລັສຕິນ ທີ່ມີຖານຢູ່ເຂດເວສແບງ ເນື່ອງຈາກຢູ່ເບື້ອງຫລັງການໂຈມຕີ ແລະ ການລໍາລຽງອາວຸດເຂົ້າສູ່ເຂດເວສແບງ ແລະ ການຮ່ວມມືກັບກອງກໍາລັງພິທັກປະຕິວັດອີຣານ (IRGC).

      ຂະນະທີ່ພັກຟາຕາອອກຖະແຫລງການວ່າ: ຜູ້ເສຍຊີວິດຄືທ່ານ ຄາລິລ ອັດ ມັກດາ ເຊິ່ງເປັນໜຶ່ງໃນແກນນໍາອາວຸໂສທາງທະຫານຂອງພັກຟາຕາ ແລະ ປະນາມອິດສະລາແອນຕ້ອງການຍົກລະດັບຄວາມຮຸນແຮງຂອງສົງຄາມ ເນື່ອງຈາກຖືເປັນຄັ້ງທໍາອິດໃນຮອບກວ່າ 10 ເດືອນ ນັບແຕ່ສົງຄາມຢູ່ເຂດກາຊາເລີ່ມຂຶ້ນ ໃນເດືອນຕຸລາ 2023 ເຊິ່ງອິດສະລາແອນຕັ້ງເປົ້າໂຈມຕີສະມາຊິກລະດັບສູງຂອງພັກຟາຕາ.

      ນອກຈາກນີ້, ການສັງຫານທ່ານ ຄາລິລ ເກີດຂຶ້ນພຽງບໍ່ເທົ່າໃດຊົ່ວໂມງ ພາຍຫລັງທ່ານ ແອນໂທນີ ບລິງເຄນ ລັດຖະມົນຕີກະຊວງການຕ່າງປະເທດອາເມລິກາ ສໍາເລັດພາລະກິດຢ້ຽມຢາມຕາເວັນອອກກາງຄັ້ງຫລ້າສຸດ ເຊິ່ງລວມທັງການຢ້ຽມຢາມອິດສະລາແອນ ແລະ ກາຕາ ເພື່ອຊຸກຍູ້ການເຈລະຈາຂໍ້ຕົກລົງຢຸດຍິງຄັ້ງໃໝ່ ເຊິ່ງທ່ານ ບລິງເຄນ ກ່າວວ່າ: ລັດຖະບານເທລອາວີບຍອມຮັບຂໍ້ສະເໜີປານີປານອມ ເພື່ອນໍາພາກຸ່ມຮາມັດເຂົ້າສູ່ຂະບວນການ.

      ເຖິງຢ່າງໃດກໍຕາມ, ຍັງມີເງື່ອນໄຂ ແລະ ຈຸດຢືນບາງຢ່າງທີ່ອິດສະລາແອນຍັງເນັ້ນ ແລະ ຢືນຢັນບໍ່ມີທາງເປັນຝ່າຍຍອມຖອຍ ໂດຍແຫລ່ງຂ່າວລະດັບສູງໃນລັດຖະບານວໍຊິງຕັນກ່າວວ່າ: ຫລາຍເກີນໄປ ໜຶ່ງໃນນັ້ນຄືການທີ່ອິດສະລາແອນຍັງຕ້ອງການປະຈໍາການທະຫານໄວ້ຕາມພື້ນທີ່ທີ່ມີຄວາມສໍາຄັນທັງທາງຍຸດທະສາດ ແລະ ການເມືອງຢູ່ເຂດກາຊາ ເຊິ່ງລວມທັງພາກໃຕ້ຂອງເຂດກາຊາທີ່ມີຊາຍແດນຕິດກັບອີຢິບ.

     ທັງນີ້, ເຈົ້າໜ້າທີ່ລະດັບສູງຂອງລັດຖະບານວໍຊິງຕັນສະແດງຄວາມຫວັງວ່າ: ກຸ່ມຮາມັດຈະຍອມຮັບຂໍ້ສະເໜີປານີປານອມເຊັ່ນກັນ ແລະ ອາເມລິກາຂໍໃຫ້ທັງສອງຝ່າຍຜ່ອນສັ້ນຜ່ອນຍາວໃຫ້ຫລາຍທີ່ສຸດ ເພື່ອໃຫ້ການເຈລະຈາເດີນໜ້າຕໍ່ໄປໄດ້ໃນທາງເຕັກນິກ.