ພາກຕາເວັນອອກຂອງບັງກະລາເທດນໍ້າຖ້ວມໜັກຄັ້ງໃຫຍ່ ມີຜູ້ເສຍຊີວິດແລ້ວ 13 ຄົນ
ມີຜູ້ເສຍຊີວິດຢ່າງໜ້ອຍ 13 ຄົນ ແລະ ອີກຫລາຍລ້ານຄົນໄດ້ຮັບຄວາມເດືອດຮ້ອນຈາກອຸທົກກະໄພຄັ້ງໃຫຍ່ຢູ່ພາກຕາເວັນອອກຂອງບັງກະລາເທດ.
ວັນທີ 23 ສິງຫາ, ສໍານັກຂ່າວຕ່າງປະເທດລາຍງານວ່າ: ກະຊວງບໍລິຫານຈັດການສະຖານະການສຸກເສີນບັງກະລາເທດລາຍງານ ສະຖານະການອຸທົກກະໄພຢູ່ທາງພາກຕາເວັນອອກຂອງປະເທດ ເຊິ່ງເປັນຜົນມາຈາກຝົນຕົກຢ່າງໜັກໃນອາທິດນີ້ ສົ່ງຜົນເຮັດໃຫ້ມີຜູ້ເສຍຊີວິດແລ້ວ 13 ຄົນ ແລະ ປະຊາຊົນອີກປະມານ 4.5 ລ້ານຄົນໄດ້ຮັບຜົນກະທົບ ໂດຍທາງການຕ້ອງອົບພະຍົບປະຊາຊົນປະມານ 190,000 ຄົນ ອອກຈາກທີ່ຢູ່ອາໄສໄປຢູ່ສູນຊົ່ວຄາວກ່ອນ.
ທັງນີ້, ປະຊາຊົນຢູ່ເມືອງເຟນີ ເຊິ່ງຕັ້ງຢູ່ຫ່າງຈາກເມືອງຈິດຕະກອງ ທີ່ເປັນເມືອງໃຫຍ່ອັນດັບສອງຂອງປະເທດຂອງບັງກະລາເທດປະມານ 100 ກິໂລແມັດ ໄດ້ຮັບຄວາມເດືອດຮ້ອນຫລາຍທີ່ສຸດ.
ປັດຈຸບັນ, 11 ເຂດ ຈາກ 64 ເຂດຢູ່ບັງກະລາເທດຜະເຊີນນໍ້າຖ້ວມຢ່າງໜັກ. ຂະນະທີ່ລັດຖະບານ ແລະ ກອງທັບບັງກະລາເທດສົ່ງທະຫານລົງພື້ນທີ່ ເພື່ອຊ່ວຍເຫລືອຜູ້ປະສົບໄພ.
ສ່ວນກົມອຸຕຸນິຍົມວິທະຍາບັງກະລາເທດເຕືອນວ່າ: ລະດັບນໍ້າໃນແມ່ນໍ້າຫລາຍສາຍທີ່ໄຫລຜ່ານພາກຕາເວັນອອກຂອງປະເທດຍັງເພີ່ມສູງຂຶ້ນຢ່າງຕໍ່ເນື່ອງ ພາຍຫລັງຝົນທີ່ຕົກຢ່າງໜັກເຮັດໃຫ້ປະລິມານນໍ້າຝົນສະສົມສູງເຖິງ 200 ມິນລີແມັດ ໃນບາງພື້ນທີ່.
ດັດຊະນີຄວາມສ່ຽງດ້ານສະພາບອາກາດໂລກ ຈັດອັນດັບໃຫ້ບັງກະລາເທດ ເຊິ່ງມີປະຊາກອນປະມານ 170 ລ້ານຄົນ ຢູ່ໃນກຸ່ມມີຄວາມສ່ຽງສູງສຸດຂອງສະພາບອາກາດປ່ຽນແປງ.
