ປະຊາຊົນ 1,300 ກວ່າຄົນ ໃນ 9 ບ້ານ ຢູ່ເມືອງຊຽງຮ່ອນ ໄດ້ຮັບຜົນກະທົບນໍ້າຖ້ວມນໍ້າໄຫລຊຸ

ວັນທີ 20-21 ສິງຫາ 2024, ຢູ່ເມືອງຊຽງຮ່ອນ ແຂວງໄຊຍະບູ ມີຝົນຕົກຕິດຕໍ່ກັນຫລາຍວັນ ເຮັດໃຫ້ນໍ້າສາຍຫລັກຄື: ນໍ້າງື່ມ, ນໍ້າມ່າວ, ນໍ້າຄ່ອມ, ນໍ້າແໜ່ນ ແລະ ນໍ້າສາຍ ອື່ນໆອີກຈຳນວນໜຶ່ງເພີ່ມຂຶ້ນຖ້ວມເນື້ອທີ່ການຜະລິດ ແລະ ເຮືອນຊານຂອງປະຊາຊົນ 9 ບ້ານ ໄດ້ຮັບຜົນກະທົບ ຄື: ບ້ານ ນາອອນ, ບ້ານ ດອນເຟືອງ, ບ້ານປົ່ງ, ບ້ານ ຄໍ້າ, ບ້ານຂິ່ງ, ບ້ານທາດ, ບ້ານ ປ່າຫວ້ານ, ທົ່ງກາບ ແລະ ບ້ານຫ້ວຍຮາກ, ມີ 300 ກວ່າຄອບຄົວ ແລະ ພົນລະເມືອງ 1,319 ຄົນ ໄດ້ຮັບຜົນກະທົບ.

ນ້ຳຖ້ວມຄັ້ງນີ້ໄດ້ຖ້ວມທີ່ຢູ່ອາໄສຂອງປະຊາຊົນຢູ່ເຂດພື້ນທີ່ຕໍ່າຕັ້ງລຽບຕາມແຄມສາຍນໍ້າ, ເນື້ອທີ່ນາ, ເນື້ອທີ່ສວນ, ໜອງປາ ຂອງປະຊາຊົນເປັນບໍລິເວນກວ້າງ, ຊົນລະປະທານຈໍານວນໜຶ່ງໄດ້ຮັບຜົນເສຍຫາຍ, ຕົ້ນໄມ້ຫັກລົ້ມທັບສາຍໄຟຟ້າ, ດິນເຈື່ອນຖົມເສັ້ນທາງເປັນບາງຈຸດ, ເຮັດໃຫ້ການສັນຈອນໄປມາພົບຄວາມຫຍຸ້ງຍາກ. ແລະ ມີຜົນເສຍຫາຍຫລາຍພໍສົມຄວນ,ສ່ວນມູນຄ່າຄວາມເສຍຫາຍທັງໝົດ ຄະນະກຳມະການຄຸ້ມຄອງໄພພິບັດຂັ້ນເມືອງ ແລະ ໜ່ວຍງານທີ່ກ່ຽວຂ້ອງ ພວມເກັບກໍາຂໍ້ມູນປະເມີນຄວາມເສຍຫາຍ.