ກອງປະຊຸມຜູ້ນຳປາຊີຟິກກຽມຫາລືອະນາຄົດຂອງພາກພື້ນຈາກວິກິດສະພາບອາກາດ
ກອງປະຊຸມສຸດຍອດ Pacific Islands Forum (PIF) ເຊິ່ງເປັນອີກໜຶ່ງກອງປະຊຸມສໍາຄັນທີ່ສຸດໃນພາກພື້ນປາຊີຟິກ ຈະເລີ່ມຂຶ້ນໃນອາທິດນີ້ຢູ່ປະເທດຕອງກາ ເຊິ່ງກອງປະຊຸມຄັ້ງນີ້ຈະເນັ້ນໃສ່ບັນຫາການປ່ຽນແປງສະພາບອາກາດທີ່ເປັນໄພຄຸກຄາມສໍາຄັນຕໍ່ພາກພື້ນທີ່ມີຄວາມບອບບາງທີ່ສຸດໃນໂລກ ແລະ ບັນຫານີ້ກະທົບຕໍ່ການເພີ່ມຂຶ້ນຂອງລະດັບນໍ້າທະເລ ແລະ ການປ່ຽນແປງຂອງອຸນຫະພູມ.
ກອງປະຊຸມ PIF ເປັນການລວມຕົວຂອງຜູ້ນໍາປະເທດສະມາຊິກ 18 ປະເທດໃນພາກພື້ນປາຊີຟິກ ເພື່ອຕັດສິນໃຈບັນຫາສໍາຄັນທີ່ສົ່ງຜົນກະທົບຕໍ່ພາກພື້ນ ທັງດ້ານເສດຖະກິດ, ການເມືອງ ແລະ ຄວາມໝັ້ນຄົງ ໂດຍກອງປະຊຸມຄັ້ງນີ້ຈະໃຊ້ເວລາໜຶ່ງອາທິດ ແລະ ຈະສິ້ນສຸດໂດຍກອງປະຊຸມປິດຂອງບັນດາຜູ້ນໍາ ເຊິ່ງຈະມີການຕັດສິນໃຈບັນຫາສໍາຄັນຕ່າງໆເຊັ່ນ: ການສະໜັບສະໜູນແນວຄິດລິເລີ່ມກ່ຽວກັບການຮ່ວມມືໃນການບັງຄັບມາດຕະການທີ່ອົດສະຕຣາລີສະເໜີ.
ໃນກອງປະຊຸມຄັ້ງນີ້, ທ່ານ ອັນໂຕນິໂອ ກູເຕີເຣສ ເລຂາທິການສະຫະປະຊາຊາດ ຈະເຂົ້າຮ່ວມ ແລະ ກ່າວສູນທອນພົດກ່ຽວກັບບັນຫາການປ່ຽນແປງສະພາບອາກາດ ເຊິ່ງເປັນຫົວຂໍ້ຕົ້ນຕໍຂອງກອງປະຊຸມ ເຊິ່ງຜູ້ນໍາປາຊີຟິກຄາດຫວັງວ່າຈະໄດ້ຮັບການສະໜັບສະໜູນທາງການເງິນເພີ່ມຕື່ມສໍາລັບໂຄງການດ້ານສະພາບອາກາດ ແລະ ການແກ້ໄຂໄພພິບັດຂອງພາກພື້ນນີ້ ໂດຍທ່ານ ກູເຕີເຣສ ກ່າວໃນການຖະແຫລງຂ່າວຢູ່ຊາມົວກ່ອນເດີນທາງໄປຕອງກາວ່າ: “ຊາຕາກໍາຂອງປາຊີຟິກຂຶ້ນຢູ່ກັບການຈໍາກັດການເພີ່ມຂຶ້ນຂອງອຸນຫະພູມໂລກໄວ້ໃນລະດັບ 1.5 ອົງສາ” ໂດຍທ່ານເນັ້ນວ່າ: ພາກພື້ນປາຊີຟິກມີສ່ວນໃນການປ່ອຍແກັສເຮືອນແກ້ວພຽງ 0.02% ຂອງທົ່ວໂລກ, ແຕ່ພັດຕ້ອງຜະເຊີນວິກິດສະພາບອາກາດຢ່າງຮຸນແຮງ ທັງພາຍຸ ແລະ ຄື້ນຄວາມຮ້ອນໃນມະຫາສະໝຸດ.
ອ້າງອີງ:
