ອິດສະລາແອນປະກາດສະຖານະການສຸກເສີນ 48 ຊົ່ວໂມງ ເປີດການໂຈມຕີລີບັງສະກັດກຸ່ມແຮັດໂບລາ
ອິດສະລາແອນເປີດການໂຈມຕີເປົ້າໝາຍຫລາຍແຫ່ງຢູ່ລີບັງ ເພື່ອປ້ອງກັນຕົນເອງຈາກກຸ່ມແຮັດໂບລາ ໂດຍໃນເວລາດຽວກັນມີການປະກາດສະຖານະການສຸກເສີນ 48 ຊົ່ວໂມງ.
ວັນທີ 25 ສິງຫາ, ສໍານັກຂ່າວຕ່າງປະເທດລາຍງານວ່າ: ທ່ານ ໂຢອາບ ກັລລັນ ລັດຖະມົນຕີກະຊວງປ້ອງກັນປະເທດອິດສະລາແອນ ກ່າວວ່າ: ຄະນະລັດຖະບານອິດສະລາແອນມີມະຕິປະກາດສະຖານະການສຸກເສີນທົ່ວປະເທດ ເປັນເວລາ 48 ຊົ່ວໂມງ ນັບແຕ່ເວລາ 06:00 ໂມງ ຕາມເວລາທ້ອງຖິ່ນຂອງວັນທີ 25 ສິງຫາ (10:00 ໂມງ ຕາມເວລາປະເທດລາວ) ເນື່ອງຈາກກອງທັບອິດສະລາແອນຢູ່ລະຫວ່າງປະຕິບັດການໂຈມຕີທາງປ້ອງກັນຕໍ່ເປົ້າໝາຍຫລາຍແຫ່ງຢູ່ລີບັງ ເພື່ອຢັບຢັ້ງການກໍ່ການຮ້າຍໂດຍກຸ່ມແຮັດໂບລາ.
ທັງນີ້, ກອງທັບອິດສະລາແອນໄດ້ເຕືອນປະຊາຊົນຢູ່ພາກໃຕ້ຂອງລີບັງ ເຊິ່ງເປັນຖານທີ່ໝັ້ນຕົ້ນຕໍຂອງກຸ່ມແຮັດໂບລາ ແລະ ປະຊາຊົນຢູ່ແຫ່ງອື່ນຂອງລີບັງ ເຊິ່ງຖືກສົງໄສເປັນສະຖານທີ່ລີ້ຊ້ອນຂອງກຸ່ມແຮັດໂບລາ ໃຫ້ອົບພະຍົບອອກຈາກພື້ນທີ່ໂດຍໄວທີ່ສຸດ.
ຂະນະທີ່ກຸ່ມແຮັດໂບລາອອກຖະແຫລງການວ່າ: ລະດົມຍິງຈະຫລວດຫລາຍກວ່າ 320 ລູກ ໂຈມຕີຖານທັບ ແລະ ຖານປະຈໍາການຂອງອິດສະລາແອນ 11 ແຫ່ງ ທີ່ກະຈາຍຢູ່ຕາມພາກເໜືອຂອງອິດສະລາແອນ.
ສ່ວນແຫລ່ງຂ່າວໃນລັດຖະບານອິດສະລາແອນຢືນຢັນວ່າ: ອິດສະລາແອນບໍ່ເຄີຍມີເປົ້າໝາຍເຮັດສົງຄາມກັບລີບັງ. ດັ່ງນັ້ນ ການໂຈມຕີຄັ້ງນີ້ບໍ່ແມ່ນຈຸດເລີ່ມຕົ້ນຂອງສົງຄາມ, ແຕ່ເປັນການປົກປ້ອງ ແລະ ທໍາລາຍໄພຄຸກຄາມ ເພື່ອບໍ່ໃຫ້ເກີດຂຶ້ນນໍາອິດສະລາແອນອີກ ເຊິ່ງຕະຫລອດເວລາຜ່ານມາ ລ້ວນເປັນຝີມືຂອງກຸ່ມແຮັດໂບລາ.
ສະຖານະການລະຫວ່າງອິດສະລາແອນກັບລີບັງທະວີຄວາມເຄັ່ງຕຶງຂຶ້ນອີກ ນັບແຕ່ອິດສະລາແອນຍອມຮັບເປັນຜູ້ສັງຫານທ່ານ ຟູອັດ ຊູກ ເຊິ່ງເປັນໜຶ່ງໃນສະມາຊິກອາວຸໂສຂອງກຸ່ມແຮັດໂບລາ ແລະ ອິດສະລາແອນກ່າວວ່າ: ຢູ່ເບື້ອງຫລັງການໂຈມຕີໂກລັນໃນທ້າຍເດືອນກໍລະກົດຜ່ານມາ ສົ່ງຜົນເຮັດໃຫ້ເດັກນ້ອຍ ແລະ ໄວໜຸ່ມ ເຊິ່ງກໍາລັງເຕະບານຢູ່ບໍລິເວນນັ້ນ ເສຍຊີວິດຈາກການໂຈມຕີຢ່າງໜ້ອຍ 12 ຄົນ.
