ເມືອງແບງ ຮື້-ຖອນ ປ້າຍໂຄສະນາບໍ່ຖືກລະບຽບການ 200 ກວ່າປ້າຍ ພ້ອມທັງເຮັດບົດບັນທຶກກ່າວເຕືອນເຈົ້າຂອງຮ້ານ

ທ້າຍອາທິດຜ່ານມາ, ຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເມືອງແບງ ແຂວງອຸດົມໄຊ ໄດ້ລົງຕິດຕາມ, ກວດກາ ຫ້າງຮ້ານທີ່ໃຊ້ປ້າຍໂຄສະນາ ບໍ່ຖືກຕາມລະບຽບການ ຢູ່ພາຍໃນຂອບເຂດເມືອງແບງ, ນໍາໂດຍ ທ່ານ ທອງເພັດ ຈັນທະວົງ ຫົວໜ້າຫ້ອງການ ຖວທ ເມືອງແບງ ພ້ອມດ້ວຍວິຊາການ.

ການລົງກວດກາຄັ້ງນີ້ຄະນະຮັບຜິດຊອບໄດ້ເອົາໃຈໃສ່ກວດກາປ້າຍໂຄສະນາຈຳນວນໜຶ່ງ ທີ່ບໍ່ຖືກຕ້ອງຕາມລະບຽບການ ເປັນຕົ້ນ ປ້າຍມີແຕ່ພາສາຕ່າງປະເທດ, ບາງປ້າຍພາສາຕ່າງປະເທດໃຫຍ່ກວ່າພາສາລາວ ແລະ ບາງປ້າຍການອອກແບບ, ສີ, ຂະໜາດ ບໍ່ຖືກຕ້ອງຕາມລະບຽບການ ພ້ອມນີ້, ຍັງມີ ຫ້າງຮ້ານ ທີ່ນໍາໃຊ້ປ້າຍໂຄສະນາ ທີ່ບໍ່ຖືກຕາມລະບຽບການ ເປັນຈໍານວນຫລາຍ, ຊຶ່ງຄະນະຮັບຜິດຊອບໄດ້ສຶກສາອົບຮົມ ແລະ ກ່າວເຕືອນຜູ້ປະກອບການ ພ້ອມທັງຮື້-ຖອນ ປ້າຍໂຄສະນາດັ່ງກ່າວອອກ ຈໍານວນ 200 ກວ່າປ້າຍ ພ້ອມທັງໄດ້ຮຽກຮ້ອງໃຫ້ຜູ້ປະກອບການ ທັງພາກລັດ ແລະ ເອກະຊົນ, ທີ່ນໍາໃຊ້ປ້າຍ ຈົ່ງໃຫ້ການຮ່ວມມືໃນການຕິດຕັ້ງປ້າຍໃຫ້ຖືກຕ້ອງຕາມລະບຽບການ ເພື່ອເຮັດໃຫ້ເມືອງແບງ ມີຄວາມງົດງາມ ທັງນີ້ກໍເພື່ອເຮັດໃຫ້ການຄຸ້ມຄອງການໂຄສະນາດ້ວຍປ້າຍ, ປ້າຍໂຄສະນາສິນຄ້າ ແລະ ບໍລິການຢູ່ເມືອງແບງ ມີຄວາມເປັນລະບຽບຮຽບຮ້ອຍ ຖືກຕ້ອງຕາມລະບຽບການ ແລະ ກົດໝາຍ.