ຫລວງພະບາງ ເປີດສູນໂຄງການເກັບກູ້ລະເບີດ ໃຫ້ນັກທ່ອງທ່ຽວເຂົ້າຢ້ຽມຊົມ

ວັນທີ 19 ສິງຫາ 2024 ທີ່ຫ້ອງການໂຄງການເກັບກູ້ລະເບີດ ປະຈໍາແຂວງຫລວງພະບາງ, ໄດ້ມີພິທີເປີດສູນຢ້ຽມຢາມ ໂຄງການເກັບກູ້ລະເບີດແຫ່ງຊາດ ໃຫ້ເປັນໜຶ່ງໃນສະຖານທີ່ທ່ອງທ່ຽວ-ສຶກສາຂໍ້ມູນ ຢູ່ແຂວງຫລວງພະບາງ ພາຍໃນສູນໄດ້ຈັດວາງສະແດງຮາງລະເບີດລູກຫວ່ານ, ຮູບພາບ ແລະ ແຜ່ນແພ ທີ່ບອກເລົ່າເລື່ອງລາວ ຂອງຜູ້ທີ່ຖືກເຄາະຮ້າຍ ຈາກລະເບີດບໍ່ທັນແຕກ ທີ່ຕົກຄ້າງ ໂດຍຜ່ານການແກະສະລັກ ແລະ ການຕໍ່າແຜ່ນແພດ້ວຍຄວາມປານີດ ສະທ້ອນໃຫ້ເຫັນເຖິງຄວາມໂຫດຮ້າຍຂອງສົງຄາມ ແລະ ໄພຂົມຂູ່ ຈາກລະເບີດບໍ່ທັນແຕກທີ່ຕົກຄ້າງ ທີ່ປະຊາຊົນລາວບັນດາເຜົ່າຕ້ອງປະເຊີນ ເຖິງແມ່ນວ່າສົງຄາມຈະສິ້ນສຸດລົງ 50 ກວ່າປີແລ້ວກໍຕາມ, ການແກະສະຫລັກ ແລະ ການຕ່ຳແຜນ ໄດ້ສະແດງໃຫ້ເຫັນສະພາບການດຳລົງຊີວິດ ຂອງປະຊາຊົນລາວ ໃນເຂດທີ່ມີລະເບີດບໍ່ທັນແຕກຕົກຄ້າງ ທີ່ຕົກຢູ່ໃນສະພາບຄວາມຫຍຸ້ງຍາກ ຢ້ານກົວ ແລະໃນບາງກໍລະນີ ໄດ້ພົບກັບການສູນເສຍ ຈາກການເກີດອຸບັດຕິເຫດຍ້ອນລະເບີດບໍ່ທັນແຕກທີ່ຕົກຄ້າງ.

ນອກນັ້ນ, ຍັງມີການວາງສະແດງບັນດາລູກລະເບີດເປົ່າ ທີ່ສາມາດທ້ອນໂຮມໄວ້ໄດ້ຈຳນວນໜຶ່ງ ເຊິ່ງເປັນລະເບີດທີ່ປອດໄພແລ້ວ ເພື່ອໃຫ້ຜູ້ເຂົ້າທ່ຽວຊົມ ໄດ້ເຫັນລະເບີດແຕ່ລະຊະນິດ ແລະ ບັນດາສຳພະວຸດ ທີ່ຕົກຄ້າງຢູ່ ສປປ ລາວ, ທັງມີການປັບປຸງຫ້ອງສາຍວີດີໂອ ເຊິ່ງຈະເປັນວີດີໂອບອກເລົ່າເລື່ອງລາວ ກ່ຽວກັບ ປະຫວັດຂອງສົງຄາມອິນດູຈີນ ຄັ້ງທີ 2 ແລະ ມີວີດີໂອ ກ່ຽວກັບການເຄື່ອນໄຫວວຽກງານ ຂອງໂຄງການເກັບກູ້ລະເບີດແຫ່ງຊາດ ອີກຈຳນວນໜື່ງ.

ສູນຢ້ຽມຢາມໂຄງການເກັບກູ້ລະເບີດດັ່ງກ່າວສ້າງຂື້ນປີ 2009, ນັບແຕ່ມື້ສ້າງຕັ້ງມາຮອດປັດຈຸບັນ ມີນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າຢ້ຽມຊົມທັງໝົດ 117,764 ຄົນ ສ່ວນໃຫຍ່ແມ່ນນັກທ່ອງທ່ຽວທີ່ມາແຕ່ບັນດາປະເທດໃນເຂດເອີຣົບ.